وڭتۇستىك كورەيا پارلامەنتى ەل پرەزيدەنتىن تەرگەۋ ءۇشىن ارنايى پروكۋرور تاعايىنداۋدى ماقۇلدادى
استانا. KAZINFORM - وڭتۇستىك كورەيا پارلامەنتى پرەزيدەنت يۋن سوك يەلعا قاتىستى ايىپتاۋلاردى تەكسەرۋ ءۇشىن ارنايى پروكۋرور تاعايىنداۋ تۋرالى زاڭ جوباسىن قابىلدادى.
سونداي-اق پرەزيدەنت مەملەكەتكە وپاسىزدىق جاسادى جانە بيلىگىن اسىرا پايدالاندى دەگەن كۇدىككە ىلىنگەن جانە ەلدەن شىعۋعا تىيىم سالىنعان.
وڭتۇستىك كورەيانىڭ ۇلتتىق اسسامبلەياسى (پارلامەنت) اسكەري جاعدايدىڭ ەنگىزىلۋىنە بايلانىستى پرەزيدەنت يۋن سوك يەلعا قاتىستى تەرگەۋ جۇرگىزۋ ءۇشىن تۇراقتى ارنايى پروكۋرور تاعايىنداۋ تۋرالى زاڭ جوباسىن قابىلدادى، دەپ حابارلايدى Yonhap.
باستامانى 210 دەپۋتات قولداسا، 63- ءى قارسى شىقتى، 14- ءى قالىس قالدى.
زاڭ جوباسىندا بۇرىنعى قورعانىس ءمينيسترى كيم يەن حيەن مەن ارميا شتابىنىڭ باستىعى گەنەرال پاك ان سوننىڭ دا اتى اتالعان. پرەمەر- مينيستر حان دوك سۋ مەن قارسى بارلاۋ باسشىسى يە ين حيەن دە تەرگەلۋشىلەر تىزىمدە.
بۇعان قوسا، پارلامەنت يۋن سوك يەل مەن تاعى جەتى شەنەۋنىكتى دەرەۋ قاماۋعا الۋدى تالاپ ەتەتىن قاۋلى قابىلدادى. وعان 191 دەپۋتات داۋىس بەرسە، 94- ءى قارسى بولسا، ۇشەۋى قالىس قالدى.
وپپوزيتسيالىق توبۋرو دەموكراتيالىق پارتياسى دا ادىلەت ءمينيسترى پاك سون چجە مەن ۇلتتىق پوليتسيا اگەنتتىگىنىڭ باسشىسى چو دجي حوعا قارسى يمپيچمەنت پروتسەدۋراسىن باستاۋ جوسپارىن جاريالادى. ۇسىنىس سەنبى كۇنى داۋىسقا سالىنادى.
ايتا كەتەيىك، وڭتۇستىك كورەيا پرەزيدەنتى اسكەري جاعداي ەنگىزگەنى ءۇشىن كەشىرىم سۇراعان بولاتىن.
جاراسقان نۇرىبايەۆ
