وتباسى بانكىندەگى جاڭا تۇرعىن ءۇي كەزەگى جۇيەسى: 3 كۇندە 170 مىڭداي ءوتىنىم تۇسكەن
استانا. KAZINFORM - ونەركاسىپ جانە قۇرىلىس ءمينيسترى ەرسايىن ناعاسپايەۆ 24-مامىردا ىسكە قوسىلعان باسپانا كەزەگىنىڭ جاڭا جۇيەسىنە قاتىستى تۇسىنىك بەردى.
- 24-مامىردان باستاپ وزگەرىس ەنگىزىلدى. ەندى «وتباسى بانكىندە» ءبىر تەرەزە ورتالىعى بار. جۇيە ىسكە قوسىلعالى كوپ وتكەن جوق، سوندا دا ودان بەرى 170 مىڭداي ءوتىنىم كەلىپ ءتۇستى، ونىڭ 70 مىڭدايى ناقتىلانىپ، قابىلداندى، - دەدى مينيستر.
سونداي-اق ۆەدومستۆو باسشىسى ەندى باسپانا كەزەگى تىزىمىندەگى ادامداردىڭ سانى ارتۋى مۇمكىن ەكەنىن اتاپ ءوتتى.
- بۇعان دەيىن باسپانا الۋعا كەزەككە تۇرعان ادامدار سانى 650 مىڭداي بولدى. سوڭعى كۇندەرى، جوعارىدا ايتقانىمداي، بۇل تىزىمگە 70 مىڭداي ادام قوسىلدى. جالپى باسپانالاردىڭ 70 پايىزى الەۋمەتتىك وسال توپتاعى ادامدار ساناتىنا بەرىلەدى. 30 پايىزى كەزەككە تۇرعان ۋاقىتىنا قاراي قالعان ادامدارعا بەرىلەدى، مۇندا قوسىمشا تاعى بىرنەشە كريتەري بار، - دەدى ەرسايىن ناعاسپايەۆ.
مالىمەتكە ساي، باسپانا بەرىلەردە ەكى جاعدايعا باسىمدىق بەرىلەدى: ۇمىتكەردىڭ تابىسى مەن كەزەككە تۇرعان ۋاقىتى. تابىسى تومەن ادامدارعا كەيىن جەكەشەلەندىرۋ قۇقىعىمەن ارەندالىق باسپانا بەرىلەدى.
ايتا كەتەلىك مۇقتاج جاندارعا باسپانا ءبولۋ نەلىكتەن اكىمدىكتەن «وتباسى بانككە» وتكەنى تۋرالى جازعان ەدىك.
اۆتور
ەربول جانات
