وتانشىل كادرلاردى باسشىلىق لاۋازىمدارعا تاعايىندايمىز - توقايەۆ
استانا. KAZINFORM - الدىمىزدا اۋقىمدى مىندەتتەردى كەلەر بەس جىلدا ورىنداۋىمىز كەرەك. بۇل تۋرالى ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ ءمالىم ەتتى.

- مەن بۇگىن ۇكىمەت جۇمىسىنىڭ باستى باعىتتارىن ايقىنداپ بەردىم. بۇل - ءىرى ينفراقۇرىلىم جوبالارى، سيفرلاندىرۋ جانە جاساندى ينتەللەكت، يادرولىق ەنەرگەتيكانى دامىتۋ، اگروونەركاسىپ كەشەنىن نىعايتۋ جانە ينۆەستيتسيا تارتۋ ماسەلەلەرى. ەكونوميكامىز دامىپ جاتىر. ءبىراق ونىڭ قارقىنى ويداعىداي ەمەس. الدىمىزدا اۋقىمدى مىندەتتەر تۇر. ونى الداعى بەس جىلدا ورىنداۋىمىز كەرەك، - دەدى قاسىم-جومارت توقايەۆ.
پرەزيدەنتتىڭ ايتۋىنشا، ەلىمىزگە، ەڭ الدىمەن، بىلىكتى جانە ەل مۇددەسىن ويلايتىن وتانشىل كادرلار كەرەك.
- ءدال وسىنداي مامانداردى تاۋىپ، ولاردى باسشىلىق لاۋازىمدارعا تاعايىندايمىز. بۇگىن ءبىز ەلىمىزدىڭ 2024 -جىلعى دامۋ ناتيجەسىن قارادىق. قوردالانعان ماسەلەلەردى تالقىلاپ، الداعى مىندەتتەردى ايقىندادىق. باستى ماقسات - ازاماتتاردىڭ ءال-اۋقاتىن ارتتىرۋ. الداعى جوسپاردىڭ ءبارىن ساپالى ورىنداۋ قاجەت. ءسوز سوڭىندا تاعى دا اتاپ وتكىم كەلەدى: بىزگە ناقتى ناتيجە كەرەك. ناتيجە بولسا عانا دامۋ بولادى، - دەدى مەملەكەت باسشىسى.
بۇدان بۇرىن حابارلانعانداي، پرەزيدەنت قاسىم- جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى باستالدى.
مەملەكەت باسشىسى 2024 -جىلدى ەلىمىز وڭ كورسەتكىشتەرمەن اياقتاعانىن ايتتى.
بۇدان بولەك پرەزيدەنت باتىس ايماقتاعى ەلەكتر جەلىسى ءبىرىڭعاي ەلەكترەنەرگەتيكالىق جۇيەمەن بىرىگۋى كەرەك ەكەنىن ايتتى.
اۆتور
رۋسلان عابباسوۆ