وتاندىق عالىمدار ەلىمىزدىڭ جولدارىنا سۋپەراسفالت دايارلاپ جاتىر

ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىمدارى ەلىمىزدە Superpave (سۋپەراسفالت) تەحنولوگياسىن ەنگىزۋگە كىرىستى، دەپ حابارلايدى Kazinform.

ەۋرازيا ۇلتتىق ۋنيۆەرسيتەتى يننوۆاتسيالاردى دامىتۋ دەپارتامەنتىنىڭ ديرەكتورى اسەل جەكسەمبايەۆانىڭ ايتۋىنشا، وتاندىق عالىمداردىڭ وسى ەڭبەگى قازاقستان اۋماعىنداعى جول ساپاسىن جاقسارتادى. بۇل وزىق تەحنولوگيا اسفالت بەتوندى جوبالاۋدا كليماتتىق فاكتورلاردى، كولىك جۇكتەمەسىن، قوزعالىس قارقىنىمەن قاتار شيكىزات ساپاسىنا اسەر ەتەدى. ەسەسىنە، جول جابىنى بەرىك بولادى.

«وتاندىق عالىمداردى بىرىكتىرە وتىرىپ، اۆتوكولىك جولدارىنىڭ ساپاسىن جاقسارتۋعا ارنالعان Superpave تەحنولوگياسىن ەنگىزۋدە عىلىمي زەرتتەۋگە كىرىسكەن ەدىك. شەتەلدە وسى يننوۆاتسيالىق تەحنولوگيا قارقىندى تۇردە ەنگىزىلىپ جاتىر. سوندىقتان ەلىمىزدە اتالعان تەحنولوگيا اياسىندا بيتۋم يمۋلسياسىن جەتىلدىرىپ جاتىرمىز. ەلىمىزدىڭ كليماتتىق ەرەكشەلىكتەرىن ەسكەرىپ، ساپالى ءونىمدى دايارلاۋعا ەكپىن قويىپ وتىرمىز. قازاقستان عالىمدارىمەن قاتار، شەتەل ماماندارى دا زەرتتەۋگە قاتىسىپ جاتىر. ولاردىڭ اراسىندا جاپونيا، پولشا، انگليا عالىمدارى بار»، - دەدى ءا. جەكسەمبايەۆا.

ەلدەگى قۇرىلىس، جول- قۇرىلىس سەكتورىنىڭ اككرەديتتەلگەن قىزمەتتەرىن كورسەتەتىن قۇرىلىس- تەحنيكالىق ينجينيرينگ ورتالىعى ەۋرازيا ۇلتتىق ۋنيۆەرسيتەتىنىڭ بازاسىندا قۇرىلعان. مۇندا Superpave ءۇشىن ەكولوگيالىق جاعىنان ءتيىمدى تەحنولوگيالار ازىرلەنەدى.

ۋنيۆەرسيتەت عالىمدارى يننوۆاتسيالىق اسفالتبەتوندى وندىرىسكە ەنگىزەر الدىندا، ونىڭ ساپاسىن زامان تالابىنا ساي قۇرالداردىڭ كومەگىمەن باقىلايدى. ماسەلەن، اسفالت جولدىڭ ۇستىنەن كولىكتەر بىرنەشە جىل قاپتاپ جۇرسە، ونىڭ ساپاعا قالاي اسەر ەتەتىنى انىقتالادى. سول سەكىلدى، جاڭبىر مەن قارعا، كليماتتىق وزگەرىستەرمەن قوسا باسقا دا قولايسىز جاعدايلارعا توزىمدىلىگى سىنالادى. Superpave تەحنولوگياسىنىڭ ارتىقشىلىعى سول، مۇندا كليماتتىق جاعدايلارمەن قاتار، ايماقتىڭ باسقا دا ەرەكشەلىكتەرى ەسكەرىلەدى. ياعني، بيتۋم قوسپاسى ايماقتىڭ ارتىقشىلىقتارىنا سۇيەنە وتىرىپ جاسالادى.

عالىمنىڭ سوزىنە قاراعاندا، بىرەگەي قۇرىلعىلاردىڭ كومەگىمەن اسفالتتىڭ توزۋ ۇدەرىسى يميتاتسيالاناتىن سىناقتار دا جۇرگىزىلەدى. ۋنيۆەرسيتەت زەرتحاناسىندا ءساتتى جۇزەگە اسىپ جاتقان Superpave تەحنولوگياسىنىڭ تاعى ءبىر ەرەكشەلىگى -كەز كەلگەن جول ۋچاسكەسىنىڭ ۇلگىسىن اينىتپاي جاساۋعا بولادى. ەگەر زەرتحاناداعى سىناقتا ماتەريالدىڭ ساپاسى جاقسى ناتيجە كورسەتسە، وندىرىستە دە سول ناتيجە قايتالادى.

بۇگىندە ۋنيۆەرسيتەت بازاسىندا ەۋروپا مەن ازيا عالىمدارىنىڭ ىنتىماقتاستىعىن ارتتىراتىن الاڭ قۇرىلعان. بۇل - سۋپەراسفالت تەحنولوگياسىندا تابىستى تاجىريبەلەردى ەسكەرۋگە مۇمكىندىك بەرەدى. بۇل رەتتە، وتاندىق عالىمدار شەتەلدىك ستاندارتتاردى ەلدەگى بارلىق ءوڭىردىڭ كليماتتىق ەرەكشەلىكتەرىنە بەيىمدەۋگە باسا نازار اۋدارىپ وتىرعانىن اتاپ وتكەن ءجون.

«عالىمدار سۋپەر اسفالت تەحنولوگياسىنىڭ وتاندىق ستاندارتتارىن ازىرلەۋ بارىسىندا مۇمكىندىگىنشە جەرگىلىكتى وندىرۋشىلەردىڭ ونىمدەرىن پايدالانۋعا باسىمدىق بەرىپ وتىر. ۋنيۆەرسيتەت عالىمدارى اسفالتقا ارنالعان ارنايى قوسپالاردى ازىرلەپ قويعان. تەك سول قوسپانى وندىرىسكە ەنگىزۋ ءۇشىن جاڭا جابدىقتا سىناقتان وتكىزىپ جاتىر»، - دەدى اسەل جەكسەمبايەۆا.

بۇل جوبا ەل ەكونوميكاسىنىڭ قارىشتاۋىنا ىقپال ەتىپ قانا قويماي، ەلدىڭ قۇرىلىستاعى يننوۆاتسيالىق شەشىمدەرگە دايىندىعىن ايقىندايدى. سونداي- اق يننوۆاتسيالىق جول جانە قۇرىلىس ماتەريالدارىن ازىرلەۋدە جاسىل تەحنولوگيالاردى پايدالانۋ ارقىلى تۇراقتى دامۋعا جول اشادى.

اۆتور

رۋسلان عابباسوۆ