وسكەمەندىك مەدبيكە پحۋكەت-الماتى باعىتىنداعى ۇشاقتا اللەرگياسى اسقىنعان ادامدى قۇتقاردى
وسكەمەن. KAZINFORM - پحۋكەت-الماتى باعىتىنداعى ۇشاقتا وتىرعان جاس قىزعا شۇعىل مەديتسينالىق كومەك قاجەت بولعان. سول كەزدە ەڭبەك دەمالىسىندا بولعان وسكەمەندىك مەدبيكە ىڭكار سەيىلعازينا كومەككە كەلىپ، ونى امان الىپ قالدى.
جولاۋشىلاردى ستيۋاردەسسانىڭ «بورتتا مەديتسينا قىزمەتكەرى بار ما؟» دەگەن سۇراعى ەلەڭ ەتكىزگەن. شىعىس قازاقستان وبلىستىق گەماتولوگيا ورتالىعىنىڭ مەدبيكەسى ىڭكار سەيىلعازينا بىردەن كومەككە ۇمتىلدى.
«قىزعا جاقىنداعان كەزدە ول اللەرگيالىق رەاكسيا -كۆينكە ىسىگىنىڭ بەلگىلەرىن انىقتادى. بورتتاعى ءدارى- دارمەكتەر مەن قۇرالداردى قولدانا وتىرىپ، تالمانى باساتىن شۇعىل مەديتسينالىق كومەك كورسەتتى. جولاۋشى قىز الماتى اۋەجايىنا امان-ەسەن جەتتى. اۋەكومپانيا وكىلدەرى مەدبيكەگە كاسىبيلىگى ءۇشىن العىس ايتتى»، - دەپ حابارلادى ش ق و دەنساۋلىق ساقتاۋ باسقارماسىنان.
ىڭكار سەيىلعازينا - ەڭبەك ءوتىلى 31 جىلدان اساتىن جوعارى ساناتتى رەانيماتسيالىق مەدبيكە. ول حيرۋرگيا، رەانيماتسيا، كوۆيد بولىمشەلەرىندە جۇمىس ىستەگەن تاجىريبەلى مامان.
ايتا كەتەيىك، كۆينكەنىڭ ءىسىنۋى نەمەسە انگيوەدەما - تەرىنىڭ جانە تەرى استىنداعى تىندەر ايماعىندا پايدا بولاتىن دەنەنىڭ جەدەل قابىنۋ رەاكسياسى. اللەرگيالىق رەاكسيا جەڭىل بورتپە تۇرىندە كورىنىپ، ادامنىڭ ومىرىنە قاۋىپ توندىرەتىن اۋىر زارداپتارعا اكەلۋى مۇمكىن. بۇل جاعداي شۇعىل مەديتسينالىق كومەكتى قاجەت ەتەدى.
اۆتور
تالعاتجان مۇحامەتبەك ۇلى
