وسكەمەندە ءبىر ادامعا 3 توننا كومىر بەرىلەدى
استانا. قازاقپارات - وسكەمەندە دە كومىر جەتىسپەي جاتىر. قازىر وڭىردە ادام باسىنا 3 توننادان عانا بەرىلەدى. ويتكەنى وتىن ىزەگەندەر قاتارى كۇرت ارتقان. «جۇرت جازدان بەرى قام جاساعاندا، مۇنداي دۇرلىگۋ بولماس ەدى»، - دەيدى جاۋاپتىلار.
اسىرەسە اۋداننان اعىلىپ كەلىپ جاتقان جۇك كولىگىندە ەسەپ جوق. سونىڭ سالدارىنان ارنايى الەۋمەتتىك ساناتتاعى جاندار ساعاتتاپ كەزەك كۇتۋگە ءماجبۇر. كومىر الۋعا كەلگەندەردىڭ بارىنە وسىلاي ەسكەرتىلەدى. ايتپەسە، ساعاتتاپ تۇرعان كولىكتەردىڭ ءبىرازى بوس قايتۋى مۇمكىن.
قويما جۇمىسشىلارىنىڭ ايتۋىنشا، وتكەن ايدا كۇنىنە وتىن الۋعا 15-20 كولىك كەلەتىن. ال قازىر بۇل كورسەتكىش 5 ەسە ارتتى.
كەزەكتە تۇرعاندار كەنىشتەن كومىر از جەتكىزىلىپ جاتىر دەسە دە، قالا اكىمدىگى بۇل مالىمەتتى جوققا شىعاردى. ولاردىڭ سوزىنشە، قازىرگى جايتقا الا جازداي قامسىز وتىرعان جۇرتتىڭ ءوزى كىنالى. قاراجىرا كەنىشىمەن 155 مىڭ توننا كومىر جەتكىزۋ تۋرالى كەلىسىمشارت جاسالىپتى. قازىر سونىڭ 80 مىڭ تونناسى عانا ساتىلعان.
«جاز بويى وتىن-سۋدى ەرتەرەك الۋعا كەڭەس بەرىپ، ناسيحات جۇرگىزدىك، ءبىراق ءبارىبىر تۇرعىنداردىڭ دەنى ەندى عانا دايىندالا باستادى»، - دەيدى ماماندار.
بۇعان وتىندى كوپ تۇتىناتىن اۋدانداعى ءىرى شارۋاشىلىقتار مەن مەكەمەلەر، كاسىپورىندار دا قوسىلدى.
قايرات تانەكەنوۆ، قالا اكىمىنىڭ ورىنباسارى:
- اۋداننان كەلگەن شارۋاشىلىقتار، مەكەمەلەر كومىردى كەزەككە تۇرىپ الىپ، قيىنشىلىق تۋدىرىپ جاتىر. وسكەمەن قالاسىندا ەكى كومىر ساتۋ تۇيىعى بار، سونىڭ 2 تۇيىعىندا دا وسكەمەنمەن قوسا العاندا 3 اۋدان جانە اباي وبلىسىنان جارما اۋدانىنان دا ادامدار كەلىپ، كومىر ساتىپ الىپ جاتىر.
مارات سۋبحانوۆ الەۋمەتتىك ساناتتا كومىر تاسىمالدايدى. بۇگىن ۇزىن-سونار كەزەككە تاپ بولىپ، ءبىراز ۋاقىتىن جوعالتتى. قويما باسىنداعى جاعدايدىڭ قاشان رەتتەلەرى بەلگىسىز. ويتكەنى ءۇستى-ۇستىنە كەلىپ جاتقاندار كوپ. وسكەمەندە كومىردىڭ ءبىر تونناسى 15800، ال الەۋمەتتىك ساناتتاعىلارعا 15300 تەڭگەدەن ساتىلىپ جاتىر.
اقمولا وبلىسىندا كومىر قىمباتتاپ كەتتى
اقمولا وبلىسىندا كومىر قىمبات. قازىر وڭىردە بۇل وتىننىڭ تونناسى 20 مىڭ تەڭگەگە جۋىقتايدى. «قىس باستالعانشا باعا تاعى ءوسۋى مۇمكىن»، - دەيدى جاۋاپتىلار. تۇرعىنداردىڭ ايتۋىنشا، قازىر كومىردىڭ قىمباتتىعى بىلاي تۇرسىن، ونى تابۋ دا قيىن. كوكشەتاۋدا اسىرەسە شۇباركول كومىرى تاپشى. وڭىردە كومىر ساتاتىن 58 ورىن بار. سونىڭ 4- ءى وبلىس ورتالىعىندا ورنالاسقان. قارا وتىننىڭ باعاسىن بىلەيىك دەپ ءبارىن ارالاپ كوردىك. كوبىندە تىم-تىرىس، كومىر جوق.
نۇربولات قۋانعان، قالا تۇرعىنى:
- كومىردى ىزدەگەنىمە مىنە 3-4 كۇن بولدى. ءالى كومىر جوق. تۇسپەگەن. ىلعي ەسكى كومىرلەر. باعا كوتەرىلىپ تۇر. وتكەن جىلى 17 مىڭ بولسا، بيىل مىنە 18 مىڭ 900 سۇراپ تۇر.
«ال ءۇيىلىپ جاتقان مىنا كومىر ۇساق نەمەسە جاڭبىر استىندا قالعان دىمقىل»، - دەيدى تۇرعىندار. سوندىقتان ەشكىم العىسى كەلمەيدى. نەگىزىنەن حالىق قىزۋى كۇشتى شۇباركول كومىرىن الادى. اسىرەسە، سۇرىپتى تۇرىنە سۇرانىس جوعارى. كومىر باعاسى اۋىل تۇرعىندارىنا جەتەم دەگەنشە تاعى وزگەرەدى. ويتەنى، تاسىمال قۇنى دا قىمباتتاعان. ماسەلەن، اقاردىر اۋىلىنان كەلگەن بولات قايروللا بىرنەشە كۇننەن بەرى كومىر تابا الماي ءجۇر.
بولات قايروللا، اقادىر اۋىلىنىڭ تۇرعىنى:
- كومىر سيرەك كەلىپ جاتىر. جاقسى كومىر كوپ ەمەس. 2-3 كۇندە ءبىر كەلەدى. كەزەككە تۇرۋعا ءماجبۇرمىز. 40-50 ماشينادان كەيىن الامىز. تاڭ اتپاي 5-تەن كەلەمىز وسىندا.
ال جەرگىلىكتى بيلىك وكىلدەرى كومىر تاپشىلىعىن جوققا شىعارىپ وتىر. ال قاتتى وتىننىڭ قىمباتتاۋى كومىر تاسىمالداۋشىلاردىڭ شىعىنىنا قاتىستى دەپ قىسقا قايىردى.
ءاليحان راقىمجانوۆ، وبلىستىق ەنەرگەتيكا جانە تكش باسقارماسىنىڭ باس مامانى:
- قازىر كومىردىڭ ورتاشا باعاسى 17750 تەڭگە. باعانىڭ كوتەرىلۋىنە نەگىزگى سەبەپ تەمىرجول تاسىمالداۋى تاريفىنىڭ كوتەرىلۋىنە بايلانىستى جانە جەكە بيزنەس وكىلدەرىنە تىكەلەي بايلانىستى بولىپ وتىر. ءبىز باعانىڭ تۇراقتالۋىنا قاتىستى ەشتەڭە ايتا المايمىز.
جالپى وبلىس تۇرعىنىدارىنىڭ قارا وتىنعا دەگەن قاجەتتىلىگى 1 ميلليون توننا شاماسىندا. بۇدان بولەك كوممۋنالدىق مەكەمەلەرگە 465 مىڭ توننا كومىر قاجەت. قازىر وسى قاجەتتىلىكتىڭ تەك 34 پروتسەنتى، ياعني 171 مىڭ تونناسى عانا جەتكىزىلگەن.
24.kz
