ورتالىق جانە شىعىس ەۋروپادا وقىپ جاتقان ستۋدەنتتەرگە ەسكەرتۋ جاسالدى
استانا. KAZINFORM - ورتالىق جانە شىعىس ەۋروپادا «بوريس» داۋىلىنىڭ سالدارىنان تۋىنداعان قولايسىز اۋا رايى جاعدايىنا بايلانىستى حالىقارالىق باعدارلامالار ورتالىعى اتالعان ايماقتا ءبىلىم الىپ جاتقان ستيپەندياتتارمەن تىعىز بايلانىستا بولىپ، جاعدايدى مۇقيات قاداعالاۋدا.
بۇل تۋرالى «حالىقارالىق باعدارلامالار ورتالىعى» ا ق باسپا ءسوز قىزمەتىنەن حابارلاندى.
داۋىل پولشا، چەحيا، اۆستريا، سلوۆاكيا جانە ۆەنگريا ەلدەرىن قامتىدى - بۇل ەلدەردە «بولاشاق» باعدارلاماسى جانە عىلىمي تاعىلىمدامالار اياسىندا قازاقستاننىڭ 15 ازاماتى وقىپ ءجۇر.
بارلىق ستيپەندياتتارعا قاۋىپسىزدىك شارالارى تۋرالى ەسكەرتىلدى جانە ولار جەرگىلىكتى بيلىكتىڭ ۇسىنىستارىنا سايكەس ارەكەت ەتۋدە. قازىرگى ۋاقىتتا ستيپەندياتتارىمىز اراسىندا زارداپ شەككەندەر تۋرالى اقپارات جوق.
«ستيپەندياتتارىمىزدى بارلىق ساقتىق شارالارىن ساقتاۋعا جانە ءوز قاۋىپسىزدىگىڭىز ءۇشىن بايلانىستا بولۋعا شاقىرامىز»، - دەلىنگەن حابارلامادا.
