ورتاشا جىلدامدىق باقىلاۋى تاعى ءۇش اقىلى تراسسادا ەنگىزىلەدى - كولىك مينيسترلىگى

بۇل تۋرالى ۇكىمەتتەگى بريفينگتە كولىك مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى باياحمەت ماقسات ءمالىم ەتتى.

ونىڭ ايتۋىنشا، جولداعى جىلدامدىقتى ولشەۋ تەحنولوگياسى كەزەڭ-كەزەڭىمەن ەنگىزىلىپ جاتىر.

- ورتاشا جىلدامدىق اقىلى اۆتوجول ۋچاسكەلەرىندە ەنگىزىلەدى، قازىرگى تاڭدا ولاردىڭ جالپى ۇزىندىعى 4,9 مىڭ شاقىرىمدى قۇرايدى. نەگىزگى باعىتتار - قاراعاندى - الماتى، وسكەمەن - تالدىقورعان جانە قورعاس - الماتى باعىتتارى. وسى ۋچاسكەلەردە جۇيەنى ەنگىزۋ جۇمىستارى جۇرگىزىلىپ جاتىر، - دەدى ول.

مينيسترلىك مالىمەتىنشە، ورتاشا جىلدامدىقتى باقىلاۋ ەنگىزىلگەن ۋچاسكەلەردە جول-كولىك وقيعالارىنىڭ سانى 15 پايىزعا ازايعان.

ەسكە سالا كەتەيىك، بۇعان دەيىن بيىل قازاقستاندا 6 جاڭا اقىلى جول ۋچاسكەسى ەنگىزىلۋى مۇمكىن ەكەنىن جازدىق.