وقۋشىنى تاربيەلەۋ مىندەتىن ورىنداماعان مۇعالىمگە قىلمىستىق جازالاۋ شاراسى ەنگىزىلمەك
استانا. KAZINFORM - پەداگوگتەردىڭ جاۋاپكەرشىلىگىنە قويىلاتىن تالاپتار قاتاڭداتىلماق. بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان.
«پەداگوگتەردى ىرىكتەۋگە قويىلاتىن تالاپتاردى ارتتىرۋ ماقساتىندا «پەداگوگ مارتەبەسى تۋرالى» زاڭدا ءبىرقاتار شەكتەۋ قاراستىرىلعان. ماسەلەن، سوت ۇكىمىنە سايكەس پەداگوگ قىزمەتىن جۇزەگە اسىرۋ قۇقىعىنان ايىرىلعان، پسيحياتريالىق، ناركولوگيالىق ەسەپتە تۇرعان، سوتتىلىعى بار جانە تاعى باسقا پسيحيكالىق، مىنەز-قۇلىق بۇزىلىستارى (اۋرۋلارى) بار ادامدار پەداگوگيكالىق جۇمىسقا قابىلدانبايدى. بۇدان باسقا، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن قامتاماسىز ەتۋ جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا پەداگوگ كامەلەتكە تولماعاندى تاربيەلەۋ جونىندەگى مىندەتتەردى ورىنداماعانى نەمەسە تيىسىنشە ورىنداماعانى ءۇشىن اكىمشىلىك جانە قىلمىستىق جازالاۋ شارالارى (ەكى مىڭ ايلىق ەسەپتىك كورسەتكىشكە دەيىنگى مولشەردەگى ايىپپۇل، تۇزەۋ جۇمىستارى، ەكى جىلعا دەيىنگى مەرزىمگە شەكتەۋ نە باس بوستاندىعىنان ايىرۋ) ەنگىزىلەدى. پەداگوگتەردىڭ جاۋاپكەرشىلىگىنە قويىلاتىن تالاپتاردى قاتاڭداتۋ ءبىلىم بەرۋ ۇيىمدارىنداعى بالالاردى بارىنشا قورعاۋعا مۇمكىندىك بەرەدى»، - دەپ اتاپ وتەدى ۇكىمەت باسشىسى جاۋابىندا.
پرەمەر-ءمينيستردىڭ اتاپ وتۋىنشە، مەملەكەت باسشىسىنىڭ تاپسىرماسىنا وراي قوعامدىق ۇيىمداردىڭ، تاۋەلسىز ساراپشىلاردىڭ قاتىسۋىمەن قازاقستاندىق ءبىلىم بەرۋ ساپاسىن ارتتىرۋ ءۇشىن «بارشاعا قولجەتىمدى ساپالى ءبىلىم بەرۋ» ۇلتتىق بايانداماسىنىڭ جوباسى ازىرلەندى.
«جالپى، ول ءبىلىم بەرۋ ساپاسىن باعالاۋدىڭ ۇلتتىق جۇيەسىن ەنگىزە وتىرىپ، ءبىلىم بەرۋدىڭ بارلىق دەڭگەيىنىڭ ساپاسىن جاقسارتۋ جونىندەگى جۇيەلى شارالاردى كوزدەيدى. قازىرگى ۋاقىتتا ۇلتتىق باياندامانى ىسكە اسىرۋ ءۇشىن بارلىق وڭىرلەردە مەكتەپتەر بولىنىسىندە ءبىلىم بەرۋ ساپاسىن ارتتىرۋ بويىنشا جول كارتالارى دايىندالدى»، - دەدى ءاليحان سمايىلوۆ.
اۆتور
مارلان جيەمباي
