وقۋ-اعارتۋ مينيسترلىگى ليتسەنزياسىز جۇمىس ىستەگەن 66 مەكتەپتىڭ 58 ىنە بالا وقىتۋعا رۇقسات بەردى
استانا. KAZINFORM - وقۋ- اعارتۋ مينيسترلىگى ليتسەنزياسىز جۇمىس ىستەگەنى ءۇشىن اكىمشىلىك جاۋاپكەرشىلىكككە تارتىلعان 35 مەكتەپتىڭ 32 سىنە ليتسەنزيا بەرگەن. بۇل تۋرالى ۆەدومستۆونىڭ Kazinform ساۋالىنا جولداعان جاۋابىندا ايتىلعان.
- بۇگىنگى تاڭدا رەسپۋبليكا بويىنشا 66 ليتسەنزياسىز مەكتەپتىڭ 58 ى ليتسەنزيا الدى، 8 ى ليتسەنزيا الۋعا قۇجاتتارىن دايىنداۋدا. ونىڭ ىشىندە 2024- 2025 وقۋ جىلىنىڭ باسىندا ءبىلىم سالاسىندا ساپانى قامتاماسىز ەتۋ كوميتەتى مەن ونىڭ اۋماقتىق دەپارتامەنتتەرى ءبىلىم بەرۋ قىزمەتىن ليتسەنزياسىز جۇزەگە اسىرعان 35 جەكەمەنشىك ءبىلىم بەرۋ ۇيىمىن انىقتادى. قازىرگى تاڭدا ولاردىڭ 32 سى ليتسەنزيا الدى. اتالعان 35 مەكتەپتىڭ بارلىعىنا قاتىستى اكىمشىلىك جاۋاپكەرشىلىككە تارتۋ تۋرالى سوت شەشىمدەرى بار، - دەپ جازىلعان جاۋاپتا.
زاڭ بويىنشا وقۋ پروتسەسىن ءتيىستى رۇقسات قۇجاتىنسىز باستاعان ءبىلىم بەرۋ ۇيىمدارىنا 25 ايلىق ەسەپتىك كورسەتكىش كولەمىندە (98300 تەڭگە) ايىپپۇل سالىنادى. جاڭا اشىلعان مەكتەپتەرگە ءبىلىم الۋشىلاردى قابىلداماي تۇرىپ قۇرىلتاي قۇجاتتارىن دايىنداۋ ءۇشىن 6 اي بەرىلەدى.
مەملەكەتتىك تىركەۋدەن وتكەننەن كەيىن التى اي ىشىندە ءتيىستى ليتسەنزيا الماسا، ءبىلىم بەرۋ ۇيىمى سوت تارتىبىمەن تاراتىلادى.
بيىل كوكتەمدە جوعارى اۋديتورلىق پالاتا ەل اۋماعىندا 66 مەكتەپ ءتيىستى ليتسەنزياسىز بالا وقىتىپ كەلگەنىن انىقتاعان بولاتىن. ونىڭ ىشىندە استانادا 14 مەكتەپ، الماتىدا 13 مەكتەپ، تۇركىستان وبلىسىندا 11 مەكتەپ، اتىراۋ وبلىسىندا 8 مەكتەپ، ماڭعىستاۋ وبلىسىندا 7 مەكتەپ ليتسەنزياسىز بالا وقىتقان.
ەسكە سالساق، ۇكىمەت وتىرىسىنان كەيىن وتەتىن باسپا ءسوز ءماسليحاتتارىنىڭ بىرىندە وقۋ-اعارتۋ ءمينيسترى عاني بەيسەمبايەۆ جەكە مەنشىك مەكتەپتەردىڭ ۇلەسى 5 پايىزعا دەيىن كەمۋى مۇمكىن دەگەن بولجام ايتقان بولاتىن.
