ونلاين-الاياقتىق: تۇرعىندار پاتەرلەرى مەن كولىكتەرىنەن ايىرىلىپ جاتىر

پەتروپاۆل. KAZINFORM - ەلىمىزدە ونلاين- الاياقتىقتىڭ جاڭا ءتاسىلى بەلەڭ الىپ بارادى. قىلمىسكەرلەرلەر حالىقتىڭ باسپاناسىنا اۋىز سالدى.

سولتۇستىك قازاقستان وبلىستىق ادۆوكاتتار القاسىنىڭ مۇشەسى ەلەنا يگناتەنكونىڭ ايتۋىنشا، ونلاين- الاياقتاردان زارداپ شەگىپ، باسپاناسىنان، كولىگىنەن ايىرىلۋ فاكتىلەرى الماتىدا، رۋدنىيدا، پەتروپاۆلدا تىركەلگەن.

- الاياق حابارلاسىپ، «ءسىزدىڭ كولىگىڭىزدى نەمەسە پاتەرىڭىزدى ساتايىن دەپ جاتىر» دەيدى. سوسىن ساتىلاتىن باسپانا تۋرالى سايتقا كىرىپ، كوز جەتكىزۋدى سۇرايدى. ارينە، الدىن الا ول جەرگە حابارلاندىرۋ ورنالاستىرىلادى. سوسىن بۇل ساتىپ الۋ جۇزەگە اسپاۋى ءۇشىن «جالعان مامىلە» جاساۋ كەرەكتىگى ايتىلادى. پاتەر يەسى كەلىسەدى، ءوز اياعىمەن نوتاريۋسقا بارىپ، قولىن قويادى. ءتىپتى كەي جاعدايدا زارداپ شەگۋشىگە «بۇل قۇپيا وپەراتسيا، قىلمىسكەرلەردى ۇستاۋ ءۇشىن ەشكىمگە ايتپاۋىڭىز كەرەك» دەپ قولحات العان كەزدەر دە بولعان. كەيىن الاياقتار سەزىكتەنبەۋى ءۇشىن ونى سىيلىق رەتىندە بەزەندىرىپ، «قۇقىق قورعاۋ ورگانى قىزمەتكەرىنە» نەمەسە تاعى باسقا قىزمەت «وكىلدەرىنە» بەرەدى، - دەيدى ەلەنا يگناتەنكو.

ادۆوكاتتىڭ ايتۋىنشا، وعان پەتروپاۆلدا عانا وسىلايشا باسپاناسىنان ايىرىلعان ءۇش ادام كومەك سۇراپ كەلگەن.

- بىرەۋى وسى وقيعادان كەيىن دەپرەسسياعا ءتۇسىپ، باسقا قالاعا قىزىنا كەتتى. بارلىعىنا قولىن سىلتەپ، تەزىرەك ۇمىتقىسى كەلەدى، بۇل ىسپەن اينالىسپايتىنىن ايتتى. ەكىنشىسى - وبلىس ورتالىعىنداعى پەداگوگتەردىڭ ءبىرى. ول دا وسى ءتاسىل بويىنشا الاياقتاردىڭ قۇرىعىنا ءتۇسىپ، ەكى باسپاناسىنان ايىرىلدى. ايەل «جالعان مامىلە» جاساعاننان كەيىن، الاياقتاردىڭ ايتۋى بويىنشا اقشانى قوراپقا سالعان، ادەمىلەپ بەزەندىرىپ، قاعازعا وراپ، سىرتىنا ويىنشىق قونجىقتى بايلاعان. سوسىن ول قوراپتى كۋرەرگە بەرگەن. ال پاتەرلەر بىردەن ساتىلىمعا شىعارىلعان. ونىڭ بىرەۋىن قايتارۋ مۇمكىن بولدى. ال ەكىنشىسىن زاڭدى تۇلعالار ساتىپ العان ەكەن، ولار ايەلگە قايتىس بولعانشا دەيىن تۇرۋعا رۇقسات بەردى، - دەيدى ەلەنا يگناتەنكو.

قورعاۋشىنىڭ ايتۋىنشا، كۋرەردى، جاس جىگىتتى پاتەردىڭ اقشاسى سالىنعان قوراپپەن استانادا ۇستادى. ول قوراپتىڭ ىشىندە نە بولعانىن بىلمەگەن، سىيلىق اپارا جاتىرمىن دەپ ويلاعان.

- بۇل دا الاياقتاردىڭ ءبىر ءتاسىلى. كۋرەرلەردى وزدەرىنىڭ قىلمىسىنا تارتۋ. بىرەۋگە سىيلىق اپارا جاتىرمىن دەپ ويلايدى.

ال رۋدنىيدا ايەل 200 ميلليون تەڭگەسىنەن ايىرىلدى. ول بەس كۇن بويى قىلمىسكەرلەردىڭ پسيحولوگيالىق قىسىمىندا بولعان، - دەيدى ادۆوكات.

بۇعان دەيىن پەتروپاۆلدا الاياقتاردان زارداپ شەككەن 66 جاستاعى ايەلدىڭ 27 ميلليون تەڭگەسىن پوليتسەيلەردىڭ قايتارىپ الۋعا كومەكتەسكەنىن جازعان ەدىك.

سونداي-اق، ونلاين- الاياقتاردان الدانعان جاعدايدا قالاي ارەكەت ەتۋ قاجەتتىگىن ادۆوكات ايتىپ بەردى.

اۆتور

اقەركە داۋرەنبەك قىزى