پوليتسيا سينتەتيكالىق ەسىرتكىنىڭ نەسىمەن قاۋىپتى ەكەنىن ايتتى
استانا. KAZINFORM - استانا قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس- قيمىل باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى ءاليا قيبات قىزى استانالىق جاسوسپىرىمدەردى سينتەتيكالىق ەسىرتكىدەن اۋلاق جۇرۋگە شاقىردى.
- اسىرەسە سينتەتيكالىق ەسىرتكى تاۋەلدىلىكتى ەرتە شاقىرادى. ءبىر رەت تۇتىنعاننان «تۇتقىن» بولىپ جاتقاندار بار. سوندىقتان بالالارعا الدانىپ قالماڭىزدار دەيمىز. جىلدىڭ باسىنان بەرى كامەلەتكە تولماعان 4 جاس ءوسپىرىم ەسىرتكى قىلمىسىنا بارىپ وتىر. ءبىز ءۇشىن بۇل جاي عانا ستاتيستيكا ەمەس. 4 جاسوسپىرىم دەگەننىڭ ءوزى ءار قىلمىستىڭ ارتىندا ادام تاعدىرى تۇر دەگەن ءسوز. سوندىقتان ءوز ومىرلەرىڭىزگە، بولاشاقتارىڭىزعا جاۋاپتىراق قاراڭىزدار. الدانىپ قالماڭىزدار، - دەدى ول.
ايتا كەتۋ كەرەك، بۇگىن ەلوردادا ەسىرتكىگە قارسى ايلىق ناۋقان باستالدى.
بۇعان دەيىن اتىراۋدا 37 جاستاعى تۇرعىن 1 كەلىدەن استام سينتەتيكالىق ەسىرتكىمەن ۇستالعان بولاتىن.
اۆتور
ەسىمجان ناقتىباي
