پوپۋليستەردىڭ دەرەگىنە سۇيەنىپ، كەز كەلگەن ەكونوميكا سالاسىن «پارازيت» دەۋگە بولمايدى - سكليار
استانا. KAZINFORM -- ەلىمىزدىڭ ماشينا جاساۋ سالاسى بيۋدجەتتەن قانداي دا ءبىر دوتاتسيا المايدى. بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكليار ايتتى.
ۇكىمەت ۇيىندە ءوتىپ جاتقان باسپا ءسوز ءماسليحاتىندا ب ا ق وكىلدەرى رومان سكلياردان «قازاقستاندا اۆتوموبيل ءوندىرىسى دامىپ، زاۋىتتار سالىنىپ جاتىر دەگەن قاعاز جۇزىندە بار. ءبىراق، كوزگە كورىنەتىن دامۋ نەگە بايقالمايدى؟ ءسىز وسى سالانىڭ جاۋاپتى مامانى رەتىندە جانىڭىز اشي ما؟» دەپ سۇراعان ەدى. ساۋالعا جاۋاپ بەرگەن ءبىرىنشى ۆيتسە-پرەمەر كەيبىر پوپۋليستەردىڭ دەرەكتەرىنە سۇيەنە وتىرىپ، ەلىمىزدىڭ ەكونوميكاسىنىڭ كەز كەلگەن سالاسىن «پارازيت»، «جامان جۇمىس ىستەيدى»، «كاسىپورىندارىن جويىپ، نارىقتان كەتۋى ءتيىس» دەۋگە بولمايتىندىعىن باسا ايتتى.
- الەمنىڭ كەز كەلگەن ەكونوميكاسى، ءوزىن-ءوزى قۇرمەتتەيتىن ەلدەر حالىق ەكونوميكاسىنىڭ كەز كەلگەن سالاسىن، ءتىپتى ول اۋىل شارۋاشىلىعى، كولىك، مەتاللۋرگيا، ماشينا جاساۋ بولسا دا بەلگىلى ءبىر دەڭگەيدە قولداۋ كورسەتەدى. مۇنى دامىعان ەلدەر ۇلگىسىنەن دە كورىپ وتىرمىز. مۇنداي قولداۋ ماشينا جاساۋ سالاسىنا تىكەلەي بيۋدجەت قارجىسىن قۇيۋعا دا ويىسىپ جاتادى. بۇل كاسىپورىن جۇمىس ىستەۋى ءۇشىن جاسالادى. اۆتوونەركاسىپكە كەلەر بولساق، بۇل قارقىندى دامىپ جاتقان باسقا دا ونەركاسىپ سالالارىنىڭ ءبىرى. ەرەكشە اتاپ وتكىم كەلەرلىگى، ول كەيبىر سالالار سياقتى بيۋدجەتتەن قانداي ءدا بىر دوتاتسيا المايدى. ولار وزدەرىنىڭ كاسىپورىندارىندا ەركىن ساۋدا ايماعىندا جۇمىس ىستەيدى. ولار ءونىم شىعارادى، - دەدى ول.
ءبىرىنشى ۆيتسە-پرەمەر وسى ورايدا ۋتيلالىم ماسەلەسىن قوزعادى.
- ساياسيلاندىرىپ جىبەرگەن ۋتيلالىم دەگەنىمىز نە؟ بۇل - جاناما سالىق قانا. ول اۆتوقۇراستىرۋشىلارعا كەتپەيدى، مەملەكەتتىك «جاسىل دامۋ» ا ق-قا تۇسەدى جانە ەكولوگيالىق قاجەتتىلىككە جۇمسالادى. ەگەر ۋتيلالىم بولماعاندا، وندا بۇل شىعىنداردى رەسپۋبليكالىق جانە جەرگىلىكتى بيۋدجەتتەردىڭ ەسەبىنەن وتەيتىن ەدىك. دەمەك، بۇل جاناما سالىق بيۋدجەت شىعىندارىن وتەپ وتىر. بۇل انىق، - دەدى رومان سكليار.
سونىمەن قاتار الماتى مەن قوستانايدا بيىل اۆتوموبيل قۇراستىراتىن ەكى زاۋىت قۇرىلىسى اياقتالاتىندىعىن ايتتى. ونىڭ اتاپ وتۋىنشە، ماشينا جاساۋ سالاسىنا قۇيىلعان ينۆەستيتسيا ۇلكەن مۋلتيپليكاتيۆتى اسەر بەرەدى.
- ساراپشىلاردىڭ باعالاۋىنشا، ماشينا جاساۋ سالاسىندا 1 جۇمىس ورنىن قۇرۋ جاناما سالالاردا كەمىندە 3 جاڭا جۇمىس ورىندارىن اشادى. مۇنى دا ءتۇسىنۋىمىز قاجەت، - دەدى ۇكىمەت باسشىسىنىڭ ءبىرىنشى ورىنباسارى.
ايتا كەتەلىك پرەمەر-ءمينيستردىڭ ءبىرىنشى ورىنباسارى رومان سكليار ۇكىمەت ۇيىندەگى باسپا ءسوز ءماسليحاتىندا سالىق كودەكسى باسپانا باعاسىن 20 پايىزعا كوتەرەتىنى تۋرالى بولجامعا جاۋاپ بەرگەن ەدى.
