پوليپروپيلەن ءوندىرىسىنىڭ جوسپاردان تىس توقتاپ قالۋى الاڭداتادى - ۇكىمەت باسشىسى

استانا. KAZINFORM - ۇكىمەت باسشىسى ولجاس بەكتەنوۆ پوليپروپيلەن زاۋىتى قىزمەتىنىڭ جوسپاردان تىس توقتاپ قالۋ سەبەپتەرىن انىقتاپ، سالدارىن جويۋدى جۇكتەدى.

- پوليپروپيلەن زاۋىتىندا ءوندىرىستىڭ جوسپاردان تىس توقتاپ قالۋى جانە پوليەتيلەن مەن بۋتاديەن شىعارۋ جوبالارىن ىسكە اسىرۋ كەزەڭدەرىنىڭ سوزىلىپ كەتۋى الاڭداۋشىلىق تۋعىزىپ وتىر. مۇندا مەرزىمدى بۇلجىتپاي ساقتاۋ، ءوندىرىستىڭ توقتاپ قالۋ قاۋپىن ازايتۋ جانە باسقارۋشىلىق ءتارتىپتى كۇشەيتۋ قاجەت. «سامۇرىق- قازىنا» قورى بيىل 15-ماۋسىمعا دەيىن KPI زاۋىتىنىڭ توقتاپ قالۋ سەبەپتەرىن جويۋدىڭ ناقتى كەستەسىن، سونداي-اق Silleno زاۋىتىنىڭ اياقتالۋ كەزەڭدەرى مەن مەرزىمىن كورسەتە وتىرىپ، جاڭارتىلعان جوسپار- كەستەسىن دايىنداپ، ۇسىنۋدى تاپسىرامىن. سونىمەن بىرگە بيىل 1-تامىزعا دەيىن بۋتاديەن جوباسى بويىنشا تۇپكىلىكتى شەشىم قابىلداڭىزدار، - دەدى ولجاس بەكتەنوۆ ۇكىمەت وتىرىسىندا.

سونداي-اق پرەمەر-مينيستر قولعا الىنعان مۇناي- گاز- حيميا ونەركاسىبى تۋرالى زاڭ جوباسىن قولدادى.

- مۇناي- گاز بيزنەسى وكىلدەرىمەن وتكەن كەڭەستە مۇناي- گاز حيمياسى سالاسى تۋرالى جەكە زاڭ ازىرلەۋ ماسەلەسى كوتەرىلدى. بۇل باستامانى قولدايمىن. ەنەرگەتيكا مينيسترلىگى، ونەركاسىپ جانە قۇرىلىس مينيسترلىگى، ۇلتتىق ەكونوميكا مينيسترلىگى جانە ادىلەت مينيسترلىكتەرى بيىل 1-قىركۇيەككە دەيىن ۇكىمەت اپپاراتىنا ءتيىستى زاڭ جوباسىن ەنگىزۋدى تاپسىرامىن، - دەپ تولىقتىردى و. بەكتەنوۆ.

بۇعان دەيىن حابارلاعانىمىزداي، ەلىمىزدە مۇناي- گاز- حيميا ونەركاسىبى تۋرالى زاڭ جوباسى ازىرلەنىپ جاتىر.

ودان بولەك پرەمەر-مينيستر ەلىمىزدەن حيميا ءوندىرىسى شيكىزاتىنىڭ %45 ەكسپورتقا تەرەڭ وڭدەلمەي شىعارىلاتىنىن ايتىپ، دايىن ءونىمدى شىعارۋ كەرەكتىگىن ەسكەرتتى.

ايتا كەتەيىك، ەلىمىزدە مۇناي- گاز سالاسىن دامىتۋدىڭ جول كارتاسى اياسىندا 3,5 مىڭ تۇراقتى جۇمىس ورنى اشىلادى.