ولجاس ەرعاليەۆ پرەزيدەنتكە جاساندى ينتەللەكتىنى دامىتۋعا جول اشاتىن ءبىرقاتار ۇسىنىس ايتۋعا نيەتتى
استانا. KAZINFORM - بۇگىن مەملەكەت باسشىسى قاسىم-جومارت توقايەۆ قاتارعا مەملەكەتتىك ساپارمەن باراتىنى بەلگىلى. ال ءدال وسى ەلدە IT سالاسىندا ەڭبەك ەتىپ جۇرگەن ولجاس ەرعاليەۆ پرەزيدەنتپەن كەزدەسكەن جاعدايدا قازاقستاندا جاساندى ينتەللەكتىنى دامىتۋعا جول اشاتىن ءبىرقاتار ۇسىنىس ايتۋعا نيەتتى.
ولجاس ەرعاليەۆ قاتار كومپانياسىنىڭ الماتىداعى كەڭسەسىندە جۇمىس ىستەپ ءجۇرىپ، بۇل ەلگە ىسساپارمەن ءجيى باراتىن. 2022 -جىلى قاتاردا وتكەن فۋتبولدان الەم چەمپيوناتىمەن تۇسپا-تۇس كەلگەن ساپار بارىسىندا كومپانيا باسشىلىعى ولجاسقا قونىس اۋدارۋعا ۇسىنىس جاسايدى. وسىلايشا، 2 جىل بۇرىن ول قاتارعا قونىس اۋدارسا، وسىدان 6 اي بۇرىن وتباسىن دا كوشىردى. ولجاس پروداكت مەنەدجەر بولىپ جۇمىس ىستەيتىن Snoonu كومپانياسى قاتارداعى ستارتاپتار اراسىندا كوشباسشى سانالادى. كومپانيا ءارتۇرلى جوبانى، ونىڭ ىشىندە تاماق تەحنولوگياسى مەن قارجىلىق قىزمەتتەردى جۇزەگە اسىرادى ءارى قولدانبالارىن جاساندى ينتەللەكت باعىتىندا دا ءتيىمدى كادەگە جاراتادى.
«قاتاردا IT سەكتورى مەملەكەتتىك قولداۋدىڭ جانە ءىرى حالىقارالىق كومپانيالار ينۆەستيتسياسىنىڭ ارقاسىندا قارقىندى دامىپ كەلەدى. مۇندا وزىق تەحنولوگيالاردى پايدالانا وتىرىپ، يننوۆاتسيالىق جوبالارمەن جۇمىس ىستەۋگە بولادى. سونىمەن قاتار بوس جۇمىس ورىندارىنا باسەكەلەستىك وتە جوعارى. ويتكەنى ەلگە الەمنىڭ تۇكپىر-تۇكپىرىنەن كوپتەگەن جوعارى بىلىكتى ماماندار كەلەدى. قازاقستاندا دا كوپتەگەن تاماشا كومپانيالار مەن تاجىريبەلى ماماندار بار. ءبىراق وكىنىشكە قاراي نارىق باسقا ەلدەردەگىدەي ۇلكەن ەمەس. بوس جۇمىس ورىندارىنا دا باسەكە سونشالىقتى جوعارى دەي المايمىن. ءدال وسى جايت باعا جەتپەس تاجىريبە جيناقتاي وتىرىپ، مانساپ ساتىسىمەن جىلدامىراق كوتەرىلۋگە مۇمكىندىك بەرەدى»، - دەدى ول.
ونىڭ اتاپ وتۋىنشە، قاتاردا ەكونوميكانى سيفرلاندىرۋ ءۇشىن ناقتى باعىتتار بار. سونىڭ ارقاسىندا ەل جاڭا مۇناي؛ جاساندى ينتەللەكت سياقتى پەرسپەكتيۆالىق باعىتتاردى دامىتىپ، رەسۋرستىق ەكونوميكاعا تاۋەلدىلىكتى ازايتۋ ارقىلى بولاشاقتا باسەكەلەستىك ارتىقشىلىققا يە بولماق.
«مۇنداي باعدارلامالار قازاقستاندا دا بەلسەندى دامىپ كەلەدى جانە ۋاقىت وتە كەلە ۇكىمەت بۇل سالالاردى ودان ءارى ىنتالاندىرادى دەپ سەنەمىن. بىزدە جاعداي جاسالسا قىزىقتى جوبالار ۇسىنىپ، ەلىمىزگە پايدا اكەلەتىن كوپتەگەن جاس مامان بار»، - دەدى IT مامانى.
سونىمەن قاتار ول قازاقستاندا جاساندى ينتەللەكتىنى دامىتۋ ءۇشىن نە ىستەۋ كەرەكتىگىنە توقتالدى.
«مەنىڭشە، نەيروندىق جەلىلەردى جانە باسقا دا جاساندى ينتەللەكت قۇرالدارىن پايدالانۋدى ءبىلىم بەرۋدىڭ باستاپقى كەزەڭىنەن قولعا الۋ كەرەك. مەكتەپتەردە جاساندى ينتەللەكتىنى پايدالانۋعا ليتسەنزيا ساتىپ الىپ جاتقان ەلدەر بار. بۇل - مۇمكىندىك. نارىقتىق وزگەرىستەرگە تەز بەيىمدەلۋ دە ارتىقشىلىق بەرەدى. وسى باعىتتا دامىپ، جوبالاردى جۇزەگە اسىرۋ ءۇشىن ەڭ الدىمەن جاس مامانداردى كەڭىنەن ناسيحاتتاپ، ىنتالاندىرۋ قاجەت»، - دەدى ولجاس ەرعاليەۆ.
ولجاس مەملەكەت باسشىسى قاسىم-جومارت توقايەۆتىڭ قاتارعا مەملەكەتتىك ساپارمەن كەلەتىندىگىنەن دە حاباردار. ورايى كەلىپ، پرەزيدەنتپەن جولىققان جاعدايدا ەلىمىزدە جاساندى ينتەللەكتى جەدەل دامىتۋ ءۇشىن ءبىرقاتار ۇسىنىس بەرۋگە دە نيەتتى.
«ءبىرىنشى - جاساندى ينتەللەكت سالاسىندا جوعارى بىلىكتى كادرلار دايارلاۋدى كەڭەيتۋ. ول ءۇشىن ەلىمىزدىڭ جەتەكشى جوعارى وقۋ ورىندارىندا زاماناۋي ءبىلىم بەرۋ باعدارلامالارىن قۇرۋدى ىنتالاندىرۋعا، سونداي-اق تاجىريبە الماسۋعا شەتەلدىك مامانداردى بەلسەندىرەك تارتۋعا بولادى. ەكىنشى - تاۋ-كەن ونەركاسىبى، مەديتسينا، مەملەكەتتىك باسقارۋ، اۋىل شارۋاشىلىعى سياقتى باسىم سەكتورلاردا جاساندى ينتەللەكت تەحنولوگيالارىن ەنگىزۋدى ىنتالاندىرۋ. بۇل ولاردىڭ تيىمدىلىگى مەن باسەكەگە قابىلەتتىلىگىن ارتتىرادى. قاتاردا مۇنداي باعدارلامالار ءقازىردىڭ وزىندە بار. مۇددەلى ماماندار مەن كاسىپكەرلەر اراسىندا مەملەكەتتىڭ ناقتى قاجەتتىلىكتەرىن قاناعاتتاندىرۋ ءۇشىن شەشىمدەر ىزدەستىرىلەدى. ال ەڭ ماڭىزدىسى - جاساندى ينتەللەكت سالاسىندا ستارتاپتاردى دامىتۋعا قولايلى جاعداي جاساۋ. ياعني، بيۋروكراتيالىق كەدەرگىلەردى ازايتۋ، سالىق رەجيمىن جەڭىلدەتۋ، تەحنوپاركتەر مەن اكسەلەراتورلاردى قۇرۋ قاجەت. بۇل ءىس-شارالاردى جۇزەگە اسىرۋ قازاقستاندا جاساندى ينتەللەكتتىڭ دامۋىن ايتارلىقتاي جەدەلدەتەتىنىنە سەنىمدىمىن ءارى ەلىمىز بۇل سالادا وڭىرلىك كوشباسشى بولۋى ءۇشىن ۇلكەن الەۋەتى بار»، - دەدى ولجاس ەرعاليەۆ.
اۆتور
مارلان جيەمباي
