ولجاس بەكتەنوۆ اۋىلداعى مەديتسينا وبەكتىلەرىنىڭ قۇرىلىسىن سىنعا الدى

استانا. KAZINFORM - ۇكىمەت باسشىسى ولجاس بەكتەنوۆ اۋىلدىق جەرلەردە پايدالانۋعا بەرىلۋى ءتيىس دەنساۋلىق ساقتاۋ وبەكتىلەرى قۇرىلىسىنىڭ باياۋلىعىن سىنعا الدى.

«مەملەكەت باسشىسى ۇكىمەتتىڭ كەڭەيتىلگەن وتىرىسىندا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن جۇزەگە اسىرۋ جۇمىستارىنىڭ ءتيىمسىز ءجۇرىپ جاتقانىن ايتتى. بۇل ماسەلە ۇكىمەتتە بىرنەشە رەت قارالدى، ءبىراق ازىرگە ناقتى ناتيجە جوق. وتكەن جىلى 309 دەنساۋلىق ساقتاۋ وبەكتىسىن سالۋ جوسپارلانعان ەدى. الايدا، جوبالىق-سمەتالىق قۇجاتتامانى دايىنداۋ جۇمىستارى تىم ۇزاققا سوزىلىپ كەتتى»، - دەدى ولجاس بەكتەنوۆ ۇكىمەت وتىرىسىندا.

پرەمەر-ءمينيستردىڭ ايتۋىنشا، دەنساۋلىق ساقتاۋ مينيسترلىگى باقىلاۋدى السىرەتىپ الدى.

«اكىمدىكتەر دە قۇرىلىس ورىندارىن انىقتاۋ، جەر ۋچاسكەلەرىن ۋاقىتىلى ءبولۋ بويىنشا ءتۇرلى سىلتاۋ ايتىپ، ماسەلەنى شۇعىل شەشۋگە نيەت تانىتقان جوق. جوبالاۋ قۇجاتتارىن راسىمدەۋ مەن ساراپتاما ماسەلەلەرى دە تىم كەشەۋىلدەپ كەتتى. سوندىقتان، اۋىلدىق جەرلەردەگى مەديتسينا وبەكتىلەرىنىڭ قۇرىلىسىن باستاۋ مەرزىمدەرى بۇزىلدى. مۇنىڭ ءبارى جوسپاردىڭ وزگەرۋىنە اكەپ سوقتى»، - دەيدى ول.

سونداي- اق، ولجاس بەكتەنوۆ قۇرىلىسى وتكەن جىلى ءبىتۋى ءتيىس 99 دەنساۋلىق ساقتاۋ وبەكتىسىنىڭ ۋاقىتىلى تاپسىرىلماعانىن تىلگە تيەك ەتتى.

«ءالى كۇنگە دەيىن 7 وبەكتى اياقتالمادى. بىلتىر اكىمدىكتەر تيپتىك جوبالاردى جەرگىلىكتى جەرگە بايلانىستىرۋعا ءتيىس ەدى، بۇل جۇمىس تا اياقسىز قالدى»، - دەيدى ۇكىمەت باسشىسى.