ولجاس بەكتەنوۆ اقمولا وبلىسىندا الەۋمەتتىك جوبالاردىڭ جۇزەگە اسىرىلۋىمەن تانىستى
اقمولا وبلىسىنا جۇمىس ساپارى بارىسىندا قازاقستان پرەمەر-ءمينيسترى ولجاس بەكتەنوۆ ءبىرقاتار الەۋمەتتىك ينفراقۇرىلىم نىسانىن ارالادى.
ستەپنوگورسك قالاسىنداعى Viamedis ەمحاناسىندا وتاندىق دەنساۋلىق ساقتاۋ سالاسىندا مەملەكەتتىك-جەكەمەنشىك ارىپتەستىك تەتىگىن قولدانۋدىڭ تيىمدىلىگى باعالاندى. سونداي- اق مانشۇك مامەتوۆا اۋىلىنداعى «ادەماۋ» مەملەكەتتىك بوبەكجاي-باقشاسىندا بولدى.
ۇكىمەت باسشىسىنا Viamedis ەمحاناسى مەملەكەتتىك- جەكەمەنشىك ارىپتەستىك اياسىندا سالىنعانى تۋرالى باياندالدى. بۇگىنگى تاڭدا جوبالىق قۋاتى ءبىر اۋىسىمدا 1020 ادامدى قامتيتىن مەديتسينالىق مەكەمە ستەپنوگورسك پەن جاقىن ماڭداعى ەلدى مەكەندەردىڭ 64 مىڭعا جۋىق تۇرعىنىنا قىزمەت كورسەتەدى.
مەكەمە قۇرامىندا كۇندىزگى ستاتسيونار، مامانداندىرىلعان حيرۋرگيالىق جانە تەراپيەۆتىك كومەك بولىمشەسى، فتيزياتريا ورتالىعى جانە كلينيكالىق-دياگنوستيكالىق زەرتحانا بار. سونىمەن قاتار كومپانيا قوسشى قالاسىندا كوپسالالى وڭىرلىك اۋرۋحانانىڭ قۇرىلىسىن باستادى.
پرەمەر- مينيستر مەديتسينالىق قىزمەتتەردىڭ ساپاسىن ودان ءارى ارتتىرۋدىڭ جانە ينفراقۇرىلىمدى جاڭعىرتۋدىڭ ماڭىزىن اتاپ ءوتتى.
«مەملەكەت باسشىسى حالىققا جولداۋىندا ايتقانداي، وتاندىق دەنساۋلىق ساقتاۋدى دامىتۋ ءۇشىن مەملەكەتتىك- جەكەشەلىك ارىپتەستىك تەتىگى ارقىلى رەسۋرستاردى بەلسەندى تۇردە تارتۋ قاجەت. جالپى ءمجا جوبالارىن ىسكە اسىرۋ بيزنەستىڭ دەنساۋلىق ساقتاۋ سالاسىن دامىتۋعا جانە قولداۋعا قاتىسۋى ءبىز ءۇشىن قانشالىقتى ماڭىزدى ەكەنىن كورسەتەدى. سوندىقتان ءمجا مودەلىن بەلسەندى قولدانۋ ءۇشىن وزەكتى ماسەلەلەردى جەدەل تالداپ، شەشۋىمىز كەرەك»، - دەپ اتاپ ءوتتى ولجاس بەكتەنوۆ.
سونىمەن قاتار پرەمەر- مينيستر مانشۇك مامەتوۆا اۋىلىندا اشىلعان، بۇگىندە مەكتەپكە دەيىنگى تاربيە ماسەلەسىن شەشۋگە مۇمكىندىك بەرىپ وتىرعان «ادەماۋ» بوبەكجاي- باقشاسىندا بولدى. اۋدانى 600 شارشى مەتر بولاتىن ەكى قاباتتى عيماراتتا سابيلەرگە جايلى جاعداي جاسالعان، قازىرگى ۋاقىتتا بوبەكجايعا 40 بالا بارادى. مەكتەپكە دەيىنگى مەكەمەنىڭ جوبالىق قۋاتى 2 ەسە كوپ - 80 ادامعا دەيىن قابىلداي الادى.
پرەزيدەنت جولداۋىندا ايتىلعان ماقساتتارعا سايكەس ۇكىمەت مەكتەپكە دەيىنگى ءبىلىم بەرۋدى جان باسىنا شاققانداعى قارجىلاندىرۋ جۇيەسىن وزگەرتۋ بويىنشا جۇمىس جۇرگىزۋدە. ءاربىر وتباسىنىڭ ناقتى تابىسىن ەسكەرە وتىرىپ، جاڭا ءتاسىلدىڭ ساپالى ىسكە اسىرىلۋىن قامتاماسىز ەتۋ قاجەت.
