وڭايلاتىلعان دەكلاراتسيا: ارناۋلى سالىق رەجيمى قولدانىلمايتىن قىزمەت تۇرلەرى بەكىتىلدى

استانا. KAZINFORM - ۇكىمەتتىڭ 2025 -جىلعى 14-قاراشاداعى قاۋلىسىمەن وڭايلاتىلعان دەكلاراتسيا نەگىزىندە ارناۋلى سالىق رەجيمىن قولدانۋعا تىيىم سالىنعان قىزمەت تۇرلەرىنىڭ تىزبەسى بەكىتىلدى.

وسى قاۋلى 2026 -جىلعى 1-قاڭتاردان باستاپ قولدانىسقا ەنگىزىلەدى. اتاپ ايتقاندا، تىيىم سالىنعان قىزمەت تۇرلەرىنە 44 اتاۋ ەنگىزىلگەن.

ولاردىڭ قاتارىندا مىنالار قامتىلعان:

- ەسىرتكىنىڭ، پسيحوتروپتىق زاتتار مەن پرەكۋرسورلاردىڭ اينالىمىنا بايلانىستى قىزمەت؛

- اكسيزدەلەتىن ءونىمدى ءوندىرۋ نەمەسە كوتەرمە ساتۋ؛

- مۇناي ونىمدەرىنىڭ جەكەلەگەن تۇرلەرىن - بەنزيندى، ديزەل وتىنىن جانە مازۋتتى ساتۋ؛

- استىق قابىلداۋ پۋنكتتەرىندە استىقتى ساقتاۋ جونىندەگى قىزمەت؛

- لوتەرەيا وتكىزۋ؛

- ويىن بيزنەسى سالاسىنداعى قىزمەت؛

- راديواكتيۆتى ماتەريالداردىڭ اينالىمىنا بايلانىستى قىزمەت؛

- ساقتاندىرۋ بروكەرى مەن ساقتاندىرۋ اگەنتىنىڭ قارجىلىق، ساقتاندىرۋ قىزمەتى جانە دەلدالدىق قىزمەت؛

- كۇزەت قىزمەتى؛

- ازاماتتىق جانە قىزمەتتىك قارۋ مەن ونىڭ پاتروندارىنىڭ اينالىمىمەن بايلانىستى قىزمەت؛

- سيفرلىق ماينينگ جونىندەگى قىزمەت؛

- جەر قويناۋىن پايدالانۋ (كەن ىزدەۋگە ارنالعان ليتسەنزيا نەگىزىندە جۇزەگە اسىرىلاتىن جەر قويناۋىن پايدالانۋ جونىندەگى قىزمەتتى قوسپاعاندا)؛

- ءتۇستى جانە قارا مەتالداردىڭ سىنىقتارى مەن قالدىقتارىن جيناۋ (دايىنداۋ)، ساقتاۋ، ءوندىرۋ، قايتا وڭدەۋ جانە وتكىزۋ؛

- قارجى ليزينگى شەڭبەرىندەگى قىزمەت؛

- ساۋدا نارىعىن جالعا الۋ جانە پايدالانۋ؛

- قازاقستان رەسپۋبليكاسىنىڭ ساۋدا قىزمەتىن رەتتەۋ تۋرالى زاڭناماسىنا سايكەس ساۋدا بازارلارىنا جاتاتىن ساۋدا وبەكتىلەرىن، 1 جانە 2-ساناتتاعى ستاتسيونارلىق ساۋدا وبەكتىلەرى؛

- اۆتوموبيل ليزينگى؛

- قۇرىلىس ماشينالارى مەن جابدىقتارىنىڭ ليزينگى؛

- اۋىل شارۋاشىلىعى ماشينالارى مەن جابدىقتارىنىڭ ليزينگى؛

- تۇرعىن جانە تۇرعىن ەمەس عيمارات سالۋ؛

- كونسۋلتاتسيالىق جانە (نەمەسە) ماركەتينگتىك قىزمەتتەر؛

- بۋحالتەرلىك ەسەپ نەمەسە اۋديت سالاسىنداعى قىزمەت؛

- قۇقىق، ادىلەت جانە سوت تورەلىگى سالاسىنداعى قىزمەت؛

- جۇك تەمىرجول كولىگىنىڭ قىزمەتى؛

- تەمىر جولدار مەن مەترو قۇرىلىسى؛

- مۇناي جانە گاز ماگيسترالدىق قۇبىرلارىن سالۋ؛

- اتوم ونەركاسىبى جانە اتوم ەنەرگەتيكاسى وبەكتىلەرى ءۇشىن ساۋلەت سالاسىنداعى قىزمەت؛

- كوپىرلەر مەن تۋننەلدەر سالۋ؛

- 1-ساناتتاعى ستاتسيونارلىق ساۋدا وبەكتىلەرىن سالۋ؛

- تولەمدەردى جيناۋ جونىندەگى اگەنتتىكتەردىڭ جانە كرەديتتىك بيۋرولاردىڭ قىزمەتى؛

- قارا جانە ءتۇستى مەتالدار كەندەرىنىڭ كوتەرمە ساۋداسى؛

- باعالى مەتالداردىڭ كوتەرمە ساۋداسى؛

- شيكى مۇنايدىڭ جانە ىلەسپە گازدىڭ كوتەرمە ساۋداسى؛

- كەستەگە باعىناتىن جۇك اۋە كولىگىنىڭ قىزمەتى؛

- مۇناي وڭدەۋ ونىمدەرىن ءوندىرۋ؛

- شيكى مۇنايدىڭ جانە ىلەسپە گازدىڭ كوتەرمە ساۋداسى؛

- اۆتوموبيلدەرگە ارنالعان قوزعالتقىشتاردان باسقا اۆتوموبيلدەر ءوندىرىسى؛

- باعالى قاعازدارمەن جانە تاۋارلارمەن مامىلەلەر بويىنشا بروكەرلىك قىزمەت؛

- لومباردتاردىڭ قىزمەتى؛

- بانك قىزمەتى؛

- باعالى قاعازدار نارىعىنداعى قىزمەت.

ەسكە سالساق، بيىل قىركۇيەك ايىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين وڭايلاتىلعان سالىق رەجيمىندە جۇمىس ىستەپ كەلگەن كاسىپكەرلەردىڭ باسىم بولىگى ءۇشىن جاعداي وزگەرمەيتىنىن ايتتى.

اۆتور

رۋسلان عابباسوۆ