تەگىن سىيلىقتار ميلليوندىق نەسيەگە اينالعان: قوستانايدا تۇتىنۋشىلار شاعىمى كوبەيدى

استانا. KAZINFORM - قوستاناي وبلىسىنىڭ ساۋدا جانە تۇتىنۋشىلار قۇقىعىن قورعاۋ دەپارتامەنتىنە ماسساجدى جاپقىشتاردى ساتىپ الۋعا قاتىستى اقشانى قايتارۋ ءۇشىن سوتقا دەيىنگى تالاپ-ارىز جازۋعا كومەك سۇراپ كەلىپ تۇسكەن وتىنىشتەر كوبەيدى.

ازاماتتاردىڭ ايتۋىنشا، كوشەدە بەلگىسىز ادامدار كونۆەرتتەگى «ۇتىلمايتىن لوتەرەيانى» ۇسىنۋ ارقىلى ءتۇرلى تۇرمىستىق تەحنيكانى (شاڭسورعىش، ۇتىك، ميكروتولقىندى پەش جانە ت. ب. ) «سىيلىققا» بەرەدى. ارتىنشا ولاردى قالانىڭ مەيرامحانالارى مەن كافەلەرىنە شاقىرىپ، «تەگىن سىيلىقتاردى» سالتاناتتى تۇردە تابىستايدى. وسى جەردە ماسساجدى جاپقىشتار تانىستىرىلىپ، ەگەر قولما-قول اقشا بولماسا، بىردەن Kaspi نەمەسە حالىق بانك قوسىمشالارى ارقىلى نەسيە راسىمدەتىلەدى.

ۇيىمداستىرۋشىلار نەسيە مەرزىمىن ءار ادامنىڭ نەسيە تاريحىنا قاراي ءارتۇرلى ەتىپ بەلگىلەيدى. سونىڭ سالدارىنان «تەگىن سىيلىقتار» ناۋقانىنا قاتىسقان تۇتىنۋشىلار ميلليون تەڭگەدەن استام نەسيە راسىمدەپ، تاۋاردى بازارداعى باعادان بىرنەشە ەسە قىمباتقا ساتىپ العانىن تەك ۇيگە كەلگەن سوڭ اڭعارادى.

مامانداردىڭ ايتۋىنشا، ەگەر مۇنداي جاعدايعا تاپ بولساڭىز جانە تاۋارعا نەسيە راسىمدەگەن بولساڭىز، «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 14-بابىنا سايكەس، 14 كۇن ىشىندە تاۋاردى قايتارىپ، اقشانى تالاپ ەتۋگە قۇقىعىڭىز بار. ول ءۇشىن ساتۋشىعا سوتقا دەيىنگى تالاپ-ارىز جازىپ نەمەسە دەپارتامەنتكە قوستاناي قالاسى، ءال-فارابي داڭعىلى 115/1 مەكەنجايى بويىنشا نەمەسە e-otinish.kz ارقىلى جۇگىنۋگە بولادى.

- ساتۋشى تۇتىنۋشىنىڭ تالاپ- ارىزىنا 10 كۇن ىشىندە جاۋاپ بەرۋگە مىندەتتى. بۇل رەتتە ساتىپ الىنعان تاۋار مەن سىيلىقتاردى قايتارۋ قاجەت. سونىمەن قاتار بانككە ساتۋشىنىڭ اگرەسسيۆتى ماركەتينگ ادىستەرىن، باعاسىنىڭ بىرنەشە ەسە قىمباتتىعىن، پسيحولوگيالىق ىقپال ەتۋ ارەكەتتەرىن كورسەتىپ شاعىمدانۋعا بولادى. بۇل ساتۋشىنى ادال ەمەس كاسىپكەرلەر تىزىمىنە ەنگىزىپ، بانك ەسەپشوتتارىن بۇعاتتاۋعا مۇمكىندىك بەرەدى، - دەپ ءتۇسىندىردى دەپارتامەنتتەن.

كەي جاعدايلاردا كەلىسىمشارتتاعى ساتۋشىنىڭ زاڭدى مەكەنجايى بولماۋى مۇمكىن. مۇندايدا تۇتىنۋشى سوتقا جۇگىنىپ، كەلىسىمشارتتى بۇزۋدى جانە اقشانى قايتارۋدى تالاپ ەتە الادى.

دەپارتامەنت كۇماندى شارالارعا قاتىسپاۋعا كەڭەس بەرىپ وتىر. «تەگىن سىيلىق بولمايدى، تەك قانا قاقپانداعى ىرىمشىك تەگىن» دەگەن ناقىلدى ەسكە سالىپ، ساق بولۋدى ەسكەرتەدى.

ايتا كەتەيىك، قارجىلىق مونيتورينگ اگەنتتىگى الاياقتىقتىڭ جاڭا ءتۇرى تۋرالى ەسكەرتتى.