ۋتيل الىمىنا قارسى پەتيتسيانى قارايتىن جيىنعا بەلسەندىلەردى تەلەفونمەن كىرگىزبەي قويعان

استانا. KAZINFORM - كەشە ۋتيل الىمى تۋرالى پەتيتسيانى قارايتىن جۇمىس توبىنىڭ وتىرىسى وتۋگە ءتيىس ەدى. ونىڭ نەگە كەيىنگە قالعانىن ونەركاسىپ جانە قۇرىلىس مينيسترلىگى ءتۇسىندىردى.

بۇل جۇمىس توبىنىڭ قۇرامىنا ق ر پارلامەنتىنىڭ دەپۋتاتتارى، ونەركاسىپ جانە قۇرىلىس، ەكولوگيا جانە تابيعي رەسۋرستار، قارجى، اۋىل شارۋاشىلىعى، سيفرلىق دامۋ، يننوۆاتسيالىق جانە اەروعارىش ونەركاسىبى، مادەنيەت جانە اقپارات ۆيتسە-مينيسترلەرى، ق ر سىرتقى ىستەر ءمينيسترىنىڭ ورىنباسارلارى، باسقا دا مۇددەلى مەملەكەتتىك ورگانداردىڭ وكىلدەرى كىردى.

سونىمەن قاتار، جۇمىس توبىنىڭ قۇرامىنا قوعامدىق بىرلەستىكتەردىڭ، ساراپشىلار قاۋىمداستىعىنىڭ، ونەركاسىپ سالاسىنىڭ وكىلدەرى، سونداي-اق ۋتيل الىمىن جويۋدى جاقتاۋشىلار س. بوقايەۆ، ە. كۋلباسوۆ، د. ماكەشوۆ، د. سالىقوۆ جانە باسقا دا ازاماتتار قوسىلدى.

مينيسترلىك بارلىق مۇددەلى تاراپتاردى شاقىرىپ، جۇمىس توبىنىڭ وتىرىسىن وتكىزۋ ءۇشىن قاجەتتى ۇيىمداستىرىلعان شارالاردى ازىرلەپ، جۇمىس وتىرىسىنىڭ ءتۇسىرىلىمى جانە وتىرىستىڭ حاتتاماسىن قامتاماسىز ەتتى.

ونەركاسىپ جانە قۇرىلىس مينيسترلىگىنىڭ عيماراتى - ستراتەگيالىق نىساننىڭ بارۋ رەگلامەنتىندە كەلۋشىلەر ۇيالى تەلەفوندارىن وزىمەن بىرگە الا المايتىنى جانە ونى كىرە بەرىستە قالدىرۋى كوزدەلگەنىن ايتا كەتكەن ءجون.

الايدا، ءوتىنىشتىڭ باستاماشىسى س. بوقايەۆ جانە ونىڭ وكىلدەرى رەگلامەنت تالاپتارىن ورىنداۋدان جانە جۇمىس توبىنىڭ وتىرىسىنا قاتىسۋدان باس تارتتى.

وسىعان بايلانىستى ق ر ونەركاسىپ جانە قۇرىلىس مينيسترلىگىنە بايلانىستى ەمەس سەبەپتەرمەن وتىرىستى توقتاتۋعا تۋرا كەلدى.

«وتىرىسقا قاتىسۋ ءۇشىن پارلامەنت دەپۋتاتتارى، ونەركاسىپ ۆيتسە-مينيسترلەرى، باسقا دا مەملەكەتتىك ورگانداردىڭ وكىلدەرى جينالدى. وڭىرلەردەن قوعام بەلسەندىلەرى كەلدى. الايدا، ءبىز جوسپارلانعان ءىس-شارانى توقتاتۋعا ءماجبۇر بولدىق، ويتكەنى پەتيتسيانىڭ باستاماشىسى وعان قاتىسۋدان باس تارتىپ، مينيسترلىكتىڭ وعان جۇمىس توبىنىڭ وتىرىسى اياقتالعاننان كەيىن بەينەجازبانى ۇسىنۋىنا كەلىسپەدى»، - دەدى ءو ق م باسپا ءسوز قىزمەتى.

سونداي-اق مينيسترلىك الداعى ۋاقىتتا كونسترۋكتيۆتى ديالوگ كۇتەتىنىن اتاپ ءوتتى.