«توپىراقتان» ءتۇرلى اشەكەي جاسايتىن بويجەتكەن
استانا. KAZINFORM - زەرە بۇل كاسىپپەن ءتورت جىل بۇرىن اينالىسا باستاعان. قولونەر - اتادان بالاعا مۇرا رەتىندە جەتكەن ءداستۇر. ەل ىشىندە ۇرپاقتان-ۇرپاققا جەتىپ، جالعاسىن تاۋىپ كەلە جاتقان بۇل ونەردى ساقتاپ قالۋعا ۇلەس قوسىپ جۇرگەن شەبەرلەر جەتەرلىك. سولاردىڭ ءبىرى - زەردە ءدىلمۇرات قىزى. ول قاستەرلى ونەر سانالاتىن زەرگەرلىك ونەردى تابىس كوزىنە اينالدىرا بىلگەن. پوليمەرلى سازدان ءتۇرلى اشەكەي جاسايتىن بويجەتكەن بيزنەستى قالاي باستاعانىن Turkystan.kz تىلشىسىنە ايتىپ بەردى.
زەردە بۇل كاسىپپەن ءتورت جىل بۇرىن اينالىسا باستاعان. بۇل ۋاقىت ىشىندە ءبىرشاما جەتىستىككە قول جەتكىزىپ، كاسىبىن ىلگەرىلەتكەن ول نەگىزگى ماماندىعى باسقا ەكەنىن ايتادى.
«قىتايدىڭ كۇنەس دەگەن اۋدانىندا دۇنيەگە كەلدىم. ءتۇبى ەلگە كوشەمىز دەگەن وي بولعاندىقتان اكەم مەنى قازاق مەكتەبىندە وقىتتى. ول كەزدە قىتايدا قازاق مەكتەپتەرى جۇمىس ىستەيتىن. 2-سىنىپقا دەيىن سول جەردە ءبىلىم الدىم. اكەمنىڭ قازاق جەرى، ءتىلى مەن ءداستۇرى، ءدىنى تۋرالى ايتقان اڭگىمەلەرى جادىمدا ساقتالىپ، تاريحي وتانعا دەگەن سۇيىسپەنشىلىگىم كۇن ساناپ ارتا ءتۇستى. 8 جاسىمدا وتباسىممەن الماتى قالاسىنا كوشىپ كەلدىك. مەكتەپتە قازاق ءتىلى مەن ادەبيەت پاندەرىنە قاتتى قىزىقتىم. ال جوعارى وقۋ ورنىندا باعدارلاما جاساقتاۋشى، ياعني پروگرامميست ماماندىعىن يگەردىم. ماماندىق بويىنشا ءبىراز جىل جۇمىس ىستەدىم. ءبىراق ومىرىمدە ءبىر نارسە جەتىسپەي تۇراتىنىن سەزەتىنمىن. بالا كەزىمنەن سۋرەت سالۋدى ۇناتامىن، قولونەرگە قىزىعامىن. ءبىراق وعان تالانت نەمەسە حوببي رەتىندە قاراماپپىن. تەك قولىمنان كەلەتىن ءىس سياقتى قابىلدادىم»، - دەيدى زەردە.
ول ءبىر كۇنى YouTube-تان پوليمەرلى ساز تۋرالى ۆيدەونى كورىپ قالعان سوڭ، «بۇل ماتەريالدان قازاقي ناقىشتاعى اشەكەيلەر جاساپ كورسە قايتەدى؟» دەپ ويعا شومعانىن ايتادى.
«الايدا مەن بۇل يدەيانى بىردەن ىسكە اسىرعان جوقپىن. پوليمەرلى سازدى ساتىپ الىپ، ءبىرىنشى رەت اپكەمە تۋعان كۇنىنە سىرعا جاساپ كوردىم. كەيىن قۇربىلارىما جاساپ بەردىم. قازاقستاندا ءدال پوليمەرلى سازدان بۇيىم جاسايتىندار از. ورىس، اعىلشىن ءتىلدى شەبەرلەر كوپ. ولاردىڭ وزىندىك ءبىر ءستيلى بولدى. سوندا نەگە وسىنداي قولونەردى قازاقستاندا دامىتپاسقا دەگەن وي كەلدى. كارانتين كەزىندە شاعىن بيزنەستى الەۋمەتتىك جەلى ارقىلى تانىتۋ ترەندكە اينالدى عوي. سول ۋاقىتتا بۇل ءىستى قولعا الدىم. دەسە دە مەن ول كەزدە ۇلتتىق ناقىشتاعى زەرگەرلىك بۇيىم ازىرلەۋدى بىردەن قولعا العان جوقپىن. سەبەبى الدىمەن ءوزىمنىڭ شەبەرلىگىمدى شىڭداپ العىم كەلدى. ونىمەن قوسا، الەۋمەتتىك جەلىنى قالاي جۇرگىزۋ كەرەك، ماركەتينگ، SMM سياقتى تاقىرىپتاردا اقپارات جيناپ، ءتۇلى كۋرسقا، ۆەبينارعا قاتىسىپ، ءبىلىم الىپ ءجۇردىم. ءسويتىپ پاراقشامدى اقىرىنداپ دامىتا باستادىم»، - دەيدى قولونەرشى.
زەردە ءدىلمۇرات قىزى قازاقي ستيلدەگى العاشقى كوللەكسياسىن 2022 -جىلدىڭ جازىندا ازىرلەگەن.
«دوستارىممەن شاعىن فوتوسەسسيا جاسادىق. مۇنى TikTok-قا سالعان ەدىم، جىلى لەبىز بىلدىرگەندەر كوپ بولدى. كوپ ادام قولداۋ كورسەتتى. سول كەزدە وسىنداي اشەكەيلەردىڭ سۇرانىسقا يە ەكەنىن، جاستاردىڭ ۇلتتىق ونەرگە «شولدەپ» جۇرگەنىن، وسى جۇمىسىمدى جالعاستىرۋ كەرەك ەكەنىن ءتۇسىندىم. قازىر تەك ۇلتتىق ناقىشتاعى بۇيىمدار، اتاپ ايتسام سىرعالار، مونشاق، شاش قىستىرعىشتار، كىلتكە تاعاتىن برەلوكتار ازىرلەيمىن. بىرتە-بىرتە اسسورتيمەنتتى ۇلعايتىپ جاتىرمىن»، - دەيدى ول.
قولونەرشىنىڭ ايتۋىنشا، بۇيىم ازىرلەۋ ىسىندە ەڭ قيىنعا سوعاتىنى - ديزاين فازاسى.
«ويداعى دۇنيەنى قولمەن جاساپ شىعارۋ، تۇستەردى ۇيلەستىرۋ قيىن. سەبەبى مەن - پەرفيكتسيونيستپىن. ويىمداعىداي شىقپايىنشا شۇقىلاي بەرەمىن. پوليمەرلى ساز ءتۇرلى ءتۇستى كەلەدى. ءبىراق مەن بارلىق ءتۇستى ارالاستىرىپ وتىرىپ، وزىمە كەرەك ءتۇستى شىعارامىن. ديزاين فازاسىنا بىرنەشە كۇن، اپتا، ءتىپتى، اي كەتەتىن كەزدەر بولادى»، - دەيدى جاس كاسىپكەر.
جاس كاسىپكەردىڭ باستى ماقساتى - ۇلتتىق بۇيىمدى ۇلىقتاۋ.
«ۇلتتىق اشەكەيلەر كوبىنە كۇمىستەن نەمەسە التىننان جاسالادى. ءتۇرلى ءتۇستى كوبىنە ەمالمەن بەرىپ جاتادى. مەن اشەكەي بۇيىمداردىڭ ءتۇرلى-ءتۇستى بولعانىن قالادىم. شابىتتى قازاقي ناقىشتا تىگىلگەن كيىم، توقىلعان كەستە، كىلەمنەن الامىن. وسىنداي ونەر تۋىندىلارىن كورىپ، جاستاردىڭ بويىندا ۇلتىمىزعا دەگەن سۇيىسپەنشىلىك، اتا-بابامىزدىڭ بىزگە قالدىرعان قۇندى جادىرگەر- مۇرالارىن باعالاۋ سەزىمى ارتا تۇسە مە دەگەن وي كەلدى. مەن بۇعان از دا بولسا ۇلەسىمدى قوسسام دەيمىن. ونەرىمىز، مادەنيەتىمىزدى تانىتۋ ارقىلى ۇلتىمىزعا، ەلىمىزگە دەگەن سۇيىسپەنشىلىكتى ارتتىرۋعا بولادى»، - دەدى ول.
زەردە كاسىپتى جۇرگىزۋ بارىسىندا ءبىراز قيىندىققا تاپ بولعانىن جاسىرمادى.
«كاسىپتى باستاعاندا قيىندىقتار بولدى. مەندە ديزاينەرلىك، مۇسىندەۋ بويىنشا ءبىلىمىم بولعان جوق. ءوز بەتىممەن اقپارات ىزدەپ، ۇيرەنۋگە تۋرا كەلدى. ءالى دە ۇيرەنۋ، ىزدەنۋ ۇستىندەمىن. شەبەرلىگىمدى شىڭداپ ءجۇرمىن. بۇل ىستە ءبىر ادام كوپ ءرولدى الىپ ءجۇرۋ قاجەت. ول فوتوگراف تا، SMM، مەنەدجەر دە ءوزى بولادى. ياعني ازىرلەگەن بۇيىمداردى كورسەتىپ قانا قويماي، ساتا ءبىلۋىم كەرەك. ساتۋدىڭ ءوزى - ءبىر ونەر. ماعان ءداستۇرلى ماركەتينگ جولدارى ۇنامايدى. سەبەبى كورگەن-بىلگەندەردىڭ ءبارى اۋديتوريانىڭ جاندى جەرىن باسىپ، جارناما جاساۋ كەرەك دەگەن تۇسىنىكتى دارىپتەيدى. ال مەن اۋديتوريامەن دوستىق قارىم-قاتىناس ورناتىپ، قاراپايىم قازاق قىزى رەتىندە تانىلعىم كەلدى. جاقىندا بىرنەشە جارمەڭكەگە قاتىستىم. وندا قىزىعۋشىلىق تانىتقان ساتىپ الۋشىلارمەن تىلدەسىپ، كوپتەگەن ينسايت الدىم. الداعى ۋاقىتتا بۇيىمدارىمدى شوۋرۋم، دۇكەندەرگە قويۋ جوسپاردا بار»، - دەپ اعىنان جارىلدى بويجەتكەن.
