ەڭ تومەنگى جالاقانى كوتەرۋ: ۇكىمەتتە كورسەتكىشتەر پىسىقتالىپ جاتىر
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين قازاقستاندا ەڭ تومەنگى جالاقىنى 150 مىڭ تەڭگەگە دەيىن جەتكىزۋ ماسەلەسىنە تۇسىنىك بەردى.
ول بۇگىن ۇكىمەتتە وتكەن باسپا ءسوز ءماسليحاتىندا اتالعان باستاما قازىر پىسىقتالىپ جاتقانىن ايتتى. ەڭ تومەنگى جالاقىنى ايقىنداۋ كەزىندە ءبىرقاتار ەكونوميكالىق فاكتور، سونىڭ ىشىندە ەڭبەك ونىمدىلىگى مەن مەدياندى جالاقى دەڭگەيى ەسكەرىلەدى.
س. ءجۇمانعاريننىڭ سوزىنە قاراعاندا، ەڭ تومەنگى جالاقىنى كوتەرۋ تۋرالى تۇپكىلىكتى شەشىم مەملەكەتتىك بيۋجەتتىڭ مۇمكىندىگىنە بايلانىستى قابىلدانادى.
- ەڭ تومەنگى جالاقىنى قاي دەڭگەيگە كوتەرەتىنىمىز نەمەسە ونى كوتەرۋ مۇمكىندىگى بيۋجەت مۇمكىندىگىنە قاراي ەسكەرىلەدى، - دەدى ۇكىمەت باسشىسىنىڭ ورىنباسارى.
سوندىقتان ۇكىمەتتە ەڭ تومەنگى جالاقىنىڭ ءوسۋى مۇمكىندىگىنىڭ پارامەترلەرىنە تالداۋ جاساۋ جالعاساپ جاتىر.
ەسكە سالساق، جاقىندا ۇلتتىق ەكونوميكا ءمينيسترىنىڭ ءبىرىنشى ورىنباسارى ازامات امرين ۇكىمەتتىڭ الدىندا ەڭ تومەنگى جالاقىنى 150 مىڭ تەڭگەگە دەيىن كوتەرۋ مىندەتى تۇرعانىن ايتقان بولاتىن.
سونىمەن قاتار ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ ەڭ تومەنگى جالاقىنى 150 مىڭ تەڭگەگە دەيىن كوتەرۋ جوسپارىنا قاتىستى پىكىر ءبىلدىردى.
