توتەنشە جاعدايلار مينيسترلىگى ەلدەگى جول اپاتتارىنىڭ باستى سەبەپتەرىن اتادى
استانا. KAZINFORM - توتەنشە جاعدايلار مينيسترلىگى توتەنشە جاعدايلاردى جويۋ دەپارتامەنتى باستىعىنىڭ ورىنباسارى اسلان ۋاكىشيەۆ قازاقستان جولدارىنداعى جول-كولىك وقيعالارىنىڭ باستى سەبەپتەرىن اتادى.

- ەڭ الدىمەن، اۋا رايى سالدارىنان قيىندىقتار تۋىندايدى. ەكىنشى ماسەلە - جولداردىڭ جابىلعانى تۋرالى حابارلامانى ەلەمەي، جولعا شىعىپ كەتەتىن جاۋاپسىز جۇرگىزۋشىلەر. وسىدان كەيىن جول-كولىك وقيعالارى ورىن الادى، - دەدى ا. ۋاكىشيەۆ ورتالىق كوممۋنيكاتسيالار قىزمەتىندەگى بريفينگتە.
سونداي-اق، جولداعى قاۋىپسىزدىككە اسەر ەتەتىن تاعى ءبىر فاكتور - ولاردىڭ كۇتىمى.
ا. ۋاكىشيەۆ تەحنيكانىڭ جانە قاردان قورعايتىن قالقانداردىڭ جەتكىلىكسىزدىگى ماسەلەسى بار ەكەنىن ايتۋدا.
- ءبىز جولداردى تازالاۋعا جاۋاپتى «قازاۆتوجولمەن» ۇنەمى بايلانىستا جۇمىس ىستەيمىز. بۇل باعىتتا جۇمىستار ءجۇرىپ جاتىر: تەحنيكا تارتىلعان، جولدار تازارتىلىپ جاتىر، ۆيدەوەسەپتەر بار جانە ءبىز بۇل پروتسەستى باقىلاۋدا ۇستايمىز. دەگەنمەن، اۋا رايى فاكتورىن الا بولجاۋ نەمەسە وزگەرتۋ مۇمكىن ەمەس. ارينە، ودان دا باسقا پروبلەمالار بار: قاردان قورعايتىن قالقاندار جەتكىلىكسىز، بالكىم، تەحنيكا سانى جەتىسپەيدى. ءبىراق وسىعان قاراماستان، ءبىز مۇمكىندىگىنشە بارلىق جۇمىستاردى اتقارىپ جاتىرمىز، - دەپ ءتۇسىندىردى سپيكەر.
بۇعان دەيىن اسلان ۋاكىشيەۆ اقمولا وبلىسىنداعى 95 اۆتوكولىكتىڭ سوقتىعىسۋ سەبەبىن ايتتى.
سونداي- اق، قۇتقارۋشىلار جەكە كولىكتى قار قۇرساۋىنان شىعارۋعا مىندەتتى ەمەستىگىن، باستى مىندەت - ادامداردى قۇتقارۋ ەكەنىن ەسكە سالدى.
اۆتور
ايجان سەرىكجان قىزى