توقايەۆ تاريحتى قاي ەل دەرەككوزدەرىنە سۇيەنىپ جازۋ كەرەكتىگىن ايتتى

استانا. قازاقپارات - بۇل تۋرالى قاسىم-جومارت توقايەۆ «ەگەمەن قازاقستان» گازەتىندە جاريالانعان «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسىندا مالىمدەدى، دەپ حابارلايدى Halyq Uni.

ورتالىق ازيانىڭ زاماناۋي كەلبەتىن جاساي وتىرىپ، ءبىز ازاماتتارىمىزدىڭ ۇلتتىق جانە وڭىرلىك بىرەگەيلىگىنە جاڭا كوزقاراستى دا قالىپتاستىرامىز. ءبىزدى ورتالىق ازياعا ءتان ايرىقشا بولمىسىمىز بىرىكتىرەدى. ءتول مادەنيەتىمىز بەن داستۇرلەرىمىز دە سونىڭ نەگىزىندە قالىپتاسقان. ورتاق تاريحي تامىرىمىزدى قۇرمەتتەۋ، مادەنيەتارالىق ديالوگ جانە كونفەسسياارالىق كەلىسىم ورتالىق ازيا بىرەگەيلىگىنىڭ وزەگى سانالادى، دەدى پرەزيدەنت.

تاريحي جادىمىز - حالىقتارىمىزدىڭ ۇلتتىق سانا-سەزىمىنىڭ مىزعىماس تۇعىرى. ءبىز اتا-بابالارىمىزدىڭ جەتىستىكتەرىن جانە باي مادەنيەتىمىزدى ماقتان تۇتامىز. وسى ورىندى ماقتانىش قازىر بارشا ۇلتتاردىڭ تابىستى دامۋىنا، سونداي-اق ولاردىڭ بولاشاققا سەنىممەن قادام باسۋىنا قۋاتتى سەرپىن بەرەدى. سوندىقتان ءبىز ورتاق تاريحىمىزدىڭ جارقىن بەتتەرىنە كوبىرەك نازار اۋدارۋعا ءتيىسپىز. ورتالىق ازيانىڭ جالپى تاريحىن تۇركى، پارسى، اراب، قىتاي، رەسەي جانە باتىس ەۋروپا دەرەككوزدەرىنە سۇيەنىپ جازۋ ماڭىزدى مىندەت دەپ سانايمىن، - دەپ قوستى مەملەكەت باسشىسى.

قازىر جەر جۇزىندە گەوساياسي جوبالار مەن يدەولوگەمالار دارىپتەلىپ جاتىر. مۇنداي جاعدايدا ءبىز وزىمىزگە ءتان قوناقجايلىق، ىنتىماق جانە ءوزارا قامقورلىق سياقتى قاسيەتتەرىمىزدى، سونداي-اق وتباسىلىق قۇندىلىقتارىمىزدى جانە باسقا دا وزىق داستۇرلەرىمىزدى قامتيتىن رۋحاني-مادەني كودىمىزدى كوزدىڭ قاراشىعىنداي ساقتاۋىمىز كەرەك، دەپ تۇيىندەدى ول.