توقايەۆ ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانى قابىلدادى
استانا. KAZINFORM - مەملەكەت باسشىسى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتكە الەۋمەتتىك دامۋ، ەڭبەك قاتىناستارى سالالارىنىڭ قازىرگى جاي- كۇيى مەن الداعى جوسپارى جونىندە باياندالدى.
سۆەتلانا جاقىپوۆا بيىلعى 1-مامىرعا دەيىن 157,8 مىڭ ادامدى ەڭبەكپەن قامتۋ شارالارى جۇرگىزىلگەنىن جەتكىزدى. ولاردىڭ ىشىندە 143,2 مىڭ ازامات جۇمىسقا ورنالاستىرىلعان. جىل باسىنان بەرى 232 مىڭنان استام ادامعا اتاۋلى الەۋمەتتىك كومەك كورسەتىلگەن.
پرەزيدەنتكە ەڭبەك قاۋىپسىزدىگىن قامتاماسىز ەتۋ جانە ەڭبەك قۇقىعىن قورعاۋ بويىنشا قابىلدانعان شارالار تۋرالى اقپارات بەرىلدى. جۇيەلى جۇمىستىڭ ناتيجەسىندە وندىرىستىك جاراقات الۋ كورسەتكىشى بيىلعى 1- توقساندا 17 پايىزعا تومەندەدى، ال ولىمگە اكەپ سوعاتىن قايعىلى وقيعالار وتكەن جىلدىڭ وسى كەزەڭىمەن سالىستىرعاندا 5 پايىزعا ازايدى. بۇدان بولەك، كاسىپتىك تاۋەكەلدەردى انىقتاۋ، باعالاۋ جانە الدىن الۋ، سونداي-اق ەڭبەك قاتىناستارىن دەكلاراتسيالاۋ تەتىكتەرىنىڭ اۆتوماتتاندىرىلعان جۇيەسى ەنگىزىلىپ جاتىر.
سۆەتلانا جاقىپوۆا جوبالاردىڭ يننوۆاتسيالىق ناۆيگاتورىن ەنگىزۋ جونىندە ايتتى. بۇل مەملەكەتتىك ينۆەستيتسيانىڭ تيىمدىلىگىن ارتتىرۋ جانە جۇمىس ورىندارىن ساپالى تۇردە جوسپارلاۋ ءۇشىن ازىرلەندى.
قاسىم-جومارت توقايەۆقا الەۋمەتتىك قولداۋ كورسەتۋ ۇدەرىسىن سيفرلاندىرۋ جۇمىستارى تانىستىرىلدى. اتاپ ايتقاندا، مينيستر الەۋمەتتىك-ەكونوميكالىق ورنىقتىلىق پەن وسال وتباسىنى باعالاۋعا ارنالعان سكورينگتى مودەلدى قولدانۋ تۇجىرىمداماسىن ۇسىندى. بۇل جوبانى ەنگىزۋ قاراجاتتى شىن مۇقتاج جانداردىڭ پايداسىنا قايتا بولۋگە جانە قولداۋ شارالارىنىڭ ناقتى يەسىنە جەتۋىنە مۇمكىندىك بەرەدى.
كەزدەسۋ سوڭىندا مەملەكەت باسشىسى الەۋمەتتىك ساياساتتى ودان ءارى جەتىلدىرۋگە، اتاۋلى كومەكتىڭ تيىمدىلىگىن ارتتىرۋعا، جۇمىسپەن قامتۋ شارالارىن كەڭەيتۋگە، ەڭبەك جانە الەۋمەتتىك سالالاردى سيفرلاندىرۋعا باعىتتالعان ءبىرقاتار تاپسىرما بەردى.
ەسكە سالا كەتەيىك، بۇعان دەيىن مەملەكەت باسشىسىنىڭ پولشا پرەزيدەنتىن سايلاۋداعى جەڭىسىمەن قۇتتىقتاعانىن جازعان ەدىك.
