تۋريست ءپىل شابۋىلىنان مەرت بولدى

استانا. KAZINFORM - ءساۋىردىڭ 3- كۇنى زامبياعا ا ق ش- تان بارعان قارت تۋريست ءپىل شابۋىلىنان قايتىس بولدى.

The Mirror گازەتىنىڭ حابارلاۋىنشا، وقيعا كافۋە ۇلتتىق ساياباعىندا بولعان. قايعىلى جاعداي ۆيدەوعا ءتۇسىپ قالىپ، كەيىن الەۋمەتتىك جەلىلەردە تاراي باستاعان. كادرلاردان جانۋاردىڭ تۋريستەر مىنگەن كولىككە جۇگىرىپ بارىپ، ونى اۋدارىپ جاتقانىن كورۋگە بولادى.

ءپىل شابۋىل جاساعان كەزدە كولىكتە التى تۋريست پەن ءبىر گيد بولعان. ولاردىڭ تورتەۋى جاراقات الدى، تاعى ءبىر ساياحاتشى اۋرۋحاناعا جاتقىزىلدى. ال 80 جاستاعى امەريكالىق ايەل جان تاپسىردى.

تۋريستىك مەكەمە باسشىلىعى كولىكتىڭ تىزگىنىن ۇستاعان تاجىريبەلى گيد جولدى جاۋىپ تۇرعان وسىمدىكتەردىڭ كەسىرىنەن پىلدەن قاشىپ كەتە الماعانىن العا تارتىپ وتىر.

اۆتور

ورالحان قوجانوۆ