تەرروريزمدى ناسيحاتتاپ، ءدىني الاۋىزدىقتى قوزدىرۋعا جانە ادامداردى تارتۋعا قاتىسقان 5 ادام ۇستالدى
استانا. KAZINFORM - تەرروريزمگە قارسى ءىس-قيمىل شەڭبەرىندە وسى جىلدىڭ شىلدە-تامىز ايلارىندا ۇلتتىق قاۋىپسىزدىك كوميتەتى پوليتسيا ورگاندارىنىڭ كومەگىمەن جانە پروكۋراتۋرانىڭ ۇيلەستىرۋىمەن استانا قالاسىندا، الماتى جانە باتىس قازاقستان وبلىستارىندا ءبىرقاتار ءىس-شارا وتكىزدى.
ناتيجەسىندە قازاقستاننىڭ 5 ازاماتى ۇستالىپ، سوت سانكسياسىمەن قاماۋعا الىندى.
تەرگەۋ نۇسقاسى بويىنشا، ولار تەررورلىق ارەكەتتەردى ۇيىمداستىرۋ ماقساتىندا تەرروريزمدى ناسيحاتتاۋعا، ءدىني الاۋىزدىقتى قوزدىرۋعا جانە ادامداردى تارتۋعا قاتىسقان. تۇرعىلىقتى جەرلەرىن ءتىنتۋ كەزىندە قارۋ-جاراق، وق- دارىلەر، ءدىني ادەبيەتتەر جانە وزگە دە زاتتاي دالەلدەمەلەر الىندى.
ايتا كەتۋ كەرەك، كۇدىكتىلەردىڭ ەكەۋى كىسى ءولتىرۋ، توناۋ جانە بۇزاقىلىق ءۇشىن سوتتىلى بولعان. تاعى بىرەۋى بۇرىن لاڭكەستەردىڭ شەتەلدىك لاگەرلەرىندە دايىندىقتان ءوتىپ، شەت مەملەكەت اۋماعىندا قارۋلى قاقتىعىستارعا قاتىسقان.
قىلمىستىق كودەكستىڭ 174، 256، 259-باپتارى بويىنشا سوتقا دەيىنگى تەرگەپ- تەكسەرۋ جۇرگىزىلىپ جاتىر.
قىلمىستىق- پروتسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتىلۋگە جاتپايدى.
اۆتور
ەلميرا ورالبايەۆا
