تۇركىستاننىڭ سوزاق اۋدانىندا عاسىر جاساعان قارت جاۋىنگەر تۇرادى
استانا. KAZINFORM - مايدانگەر مىرزاحمەت جىلىسبايەۆتىڭ جاسى 99-عا كەلسە دە، ءالى تىڭ، دەپ حابارلايدى Jibek Joly تەلەارناسى.
تۇركىستان وبلىسى سوزاق اۋدانىنان 1941-45-جىلدار ارالىعىندا سوعىسقا 6 مىڭ سارباز اتتانعان. قازىر وسى مىڭداعان جاۋىنگەردىڭ ىشىنەن كوزى ءتىرى بىرەۋى عانا قالدى. مايدانگەر مىرزاحمەت جىلىسبايەۆتىڭ جاسى 99-عا كەلسە دە، ءالى تىڭ. كوڭىلى سەرگەك.
مىرزاحمەت اقساقال سوعىسقا اتتانعان كەزدە نەبارى 18 جاستاعى بوزبالا ەدى. سوندىقتان بولار 1944 -جىلدىڭ قاراشا ايى ونىڭ ماڭگى ەسىندە. كولحوزداعى ساۋاتى جوق ەرەسەكتەردى حات تانۋعا ۇيرەتىپ جۇرگەن ونى ءبىر تۇندە مايدانعا الىپ كەتەدى. ارداگەر ۇرىس الاڭىندا № 92 اۆتواتقىشتار پولكى قۇرامىندا سوعىسقان.
مىرزاحمەت جىلىسبايەۆ سوعىسقا بارۋدان ەش قورىقپاعانىن ايتادى.
- ەش قورىقپادىم. ويتكەنى ءبىزدىڭ الدىمىزداعى ماقسات قالايدا نەمىس فاشيستەرىن جەڭۋ كەرەك. وتانىمىزدى قورعاۋ كەرەك. سوندىقتان مەن نەسىنە قورقامىن. قورىقسام، سۇرانبايمىن دا، بارمايمىن دا عوي. ءبىز سوعىستىڭ اياق جاعىندا باردىق. ءبىراق باۋىرجان مومىش ۇلىنىڭ ءوزى ايتقان عوي، «سوعىسقا ءبىر كىرىپ شىققاننىڭ ءوزى ەرلىك دەپ». سونداي ەرلىكتەردىڭ ىشىندە بولدىق، - دەدى سوعىس ارداگەرى.
سوعىستاعى بەس اي بوزبالا مىرزاحمەتتى ەرتە ەسەيتتى. بىرنەشە قاندى شايقاستىڭ كۋاسى بولىپ، «جەڭىستىڭ حابارىن ەستىگەندە مەنەن باقىتتى جان بولمادى» دەيدى قاريا. سەبەبى اكەسىنەن ەرتە ايىرىلعان ول جالعىز اناسىن اسىراۋدى ماقسات ەتىپتى.
ارداگەردىڭ ۇلى كەنجەبەك جىلىسبايەۆ اكەسىنىڭ بارلىق بالا-شاعاسىنا جاناشىر ەكەنىن ايتتى.
- «مەنىڭ الدىمدا ەلگە ورالىپ، شەشەمىزگە قارايمىن، اسىرايمىن دەگەن الدىما قويعان مىندەت بولدى» دەپ ايتىپ وتىرادى. اكەمىز بارلىق بالا-شاعاسىنا جاناشىر، - دەدى قاريانىڭ بالاسى.
مىرزاحمەت جىلىسبايەۆ سوعىستان كەيىن ەلگە ورالعان سوڭ ۇستازدىق قىزمەتىن جالعاستىردى. ول ءومىرىنىڭ 46 جىلىن ۇستازدىق قىزمەتكە ارناعان. بۇگىندە جارىمەن بىرگە 13 ۇل-قىزدان 47 نەمەرە، 97 شوبەرە ءسۇيىپ وتىر. ارداگەر بوس ۋاقىتىندا ومىردەن كورگەن-بىلگەندەرىن قاعاز بەتىنە ءتۇسىرىپ ەرمەك قىلادى، ودان قالسا ءوزىنىڭ وسيەتى مەن وي-تۇجىرىمدارى جيناقتالعان «ۇرپاققا امانات» اتتى كىتابىن شىعارعان.
وسىعان دەيىن الماتىلىق سوعىس ارداگەرى ۆاسيلي زينچەنكو 101 جاسقا تولعانىن جازدىق.
