تۇركىستاندىق 10 ءتىلدى مەڭگەرگەن ازامات «جان شۋاق» سىيلىعىنىڭ يەگەرى اتاندى
استانادا «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراتسياسى ۇيىمداستىرعان XVI «جان شۋاق» قوعامدىق سىيلىعىنىڭ لاۋرەاتتارىن ماراپاتتاۋ ءراسىمى ءوتتى.
ماراپاتتالعان ازاماتتاردىڭ قاتارىندا تۇركىستان وبلىسى تۇلكىباس اۋدانىنداعى تاستۇمسىق اۋىلىنىڭ تۇرعىنى مەيىرحان توپانباي دا بار، دەپ حابارلايدى Kazinform.
تۇلكىباس اۋدانىنا قاراستى تاستۇمسىق اۋىلىنىڭ تۇرعىنى مەيىرحان توپانباي زامانداستارىنىڭ ورتاسىندا پوليگلوت اتانىپ كەتكەن. ول تۇرىك، پارسى، نەمىس، گرەك، يسپان، ارميان، پولياك، تاجىك، فرانسۋز تىلدەرىن جەتىك بىلەدى. ال، اعىلشىن ءتىلىن تۇرمىستىق دەڭگەيدە مەڭگەرگەن. «ورىس ءتىلى مەن ادەبيەتى ءپانىنىڭ مۇعالىمى» ماماندىعى بويىنشا جوعارى ءبىلىمدى پوليگلوت قازىر يتاليان ءتىلىن ۇيرەنىپ ءجۇر. سونداي-اق شەت تىلدەگى ادەبيەتتەردى قازاقشاعا اۋدارىپ، جيناقتار قۇراستىرۋمەن اينالىسادى.
«ءتىل ۇيرەنۋ - مەن ءۇشىن جان راحاتى. ءتىل ۇيرەنۋ ارقىلى كوڭىلىم تىنىشتالادى. انام بۇل قاسيەت ناعاشىلارىمنان بەرىلگەن دەيدى. جازۋشى، قوعام قايراتكەرى، عالىم مىرزاكەلدى كەمەل - ناعاشى اتام. سول كىسى باعىت-باعدار بەرىپ، بىلگەنىن ۇيرەتتى. ءارقاشان اقىلىن ايتىپ وتىراتىن»، - دەيدى ول.
مەيىرحان مەيرامبەك ۇلى تۋعاننان سال اۋرۋىنا شالدىققان. ءبىر كوزى مۇلدەم كورمەيدى. تاياقتىڭ كومەگىمەن جۇرەدى. دەنساۋلىعىنا ءاردايىم كۇتىم كەرەك. دەگەنمەن، جىگەرلى جاننىڭ ومىرگە دەگەن قۇلشىنىسى جوعارى. ءاردايىم ىزدەنىپ، ءوزىن جەتىلدىرىپ وتىرادى. ەڭ باستىسى، «مۇگەدەك بولسام دا، ماسىل بولعىم كەلمەيدى» دەگەن قاعيدانى ۇستانادى.
«29 جىل بويى وسى دەرتپەن كۇرەسىپ كەلەمىن. باسىما نە كەلىپ، نە كەتپەدى؟ ءبارىن سىناق رەتىندە قابىلداپ، قيىندىققا ەش مويىمادىم. جالپى، مەن ءۇيدىڭ ۇلكەنىمىن. مەنەن كەيىن قارىنداسىم بار. اكەم مەيرامبەك تراكتور ايداعان قاراپايىم ەڭبەك ادامى بولدى. انام ۇلبوسىن شەت ءتىلى ءپانىنىڭ مۇعالىمى ەدى. مەنى بوسانعان سوڭ جۇمىس ىستەۋگە مۇمكىندىگى بولمادى. ەمدەتىپ ءجۇرىپ، اماندىعىمدى تىلەپ، قاتارعا قوستى. وسىنداي مىقتى بولۋىما ناعاشى اجەم جۇماش تا سەبەپكەر بولدى. «قۇقىڭدى قورعاۋعا كەرەك بولادى» دەپ 5 جاسىمنان باستاپ زاڭدى جاتتاتتى. «اللا سىناقتى سۇيگەن قۇلىنا عانا بەرەدى» دەپ، جىگەرلەندىرىپ وتىردى. ومىرگە بەيىمدەدى. زەينەتاقىسىنا برايل الفاۆيتىن الىپ بەرىپ، جازۋدى، وقۋدى مەڭگەرتتى. وقۋعا دەگەن ماحابباتىم اجەمنەن دارىعان. 1000 عا جۋىق كىتاپ جيىپ، ماعان ۇلكەن ازىق قالدىردى»، - دەيدى ول.
مەيىرحان وقۋدى بىتىرگەن سوڭ، العاشقى ەڭبەك جولىن جاسكەشۋ اۋداندىق مادەنيەت ۇيىنەن باستادى. ۇيىمداستىرۋشىنىڭ كومەكشىسى رەتىندە «ءۇمىت كەرۋەنى» اتتى فەستيۆال مەن «ءوزىڭدى ءسۇي» اتتى موتۆاتسيالىق كەش وتكىزدى. ەرەكشە جاننىڭ قولعا الۋىمەن ىسكە اسقان جوبالار بۇگىنگى كۇنگە دەيىن جىلدا جالعاسىن تاۋىپ كەلەدى.
«ءوزىم سەكىلدى ناۋقاس بالالارعا كومەك كورسەتۋدى ماقسات ەتىپ، «دەفەكتولوگ» ماماندىعىن مەڭگەردىم. كەيىن ەكىنشى رەت وقۋعا ءتۇسىپ، «ورىس ءتىلى مەن ادەبيەتى» ءپانىنىڭ مۇعالىمى ديپلومىن الدىم. ەكەۋىندە دە مەملەكەتتىك گرانتپەن ءبىلىم الدىم. مىرزاگەلدى كەمەل مەن ءابدىمۇسا قۋاتبەكوۆ ەسىمدى جانى جومارت جاندار كوپ قولداۋ كورسەتتى. ال، مەنىڭ ماماندىق الۋىما ۇستازدارىم رابيعا قۋاتبەكوۆا مەن جاننا بوتابايەۆا ۇلكەن ەڭبەك ءسىڭىردى. بارشاسىنا ريزاشىلىعىم شەكسىز»، - دەيدى ەرەكشە جان.
بۇگىندە مەيىرحان توپانباي تاستۇمسۇق اۋىلىنداعى كىتاپحانادا قىزمەت ەتەدى. تاڭەرتەڭمەن كەلىپ، كىتاپتاردى تۇگەندەپ، وقىرماندارمەن بايلانىس ورناتادى. ءتۇرلى مادەني ءىس-شارالار ۇيىمداستىرادى. كىتاپحاناشى جىگىتتىڭ بۇل تالپىنىسىن كورگەن جەرلەستەرى دە قولداۋ كورسەتىپ، جىگەر بەرىپ جۇرەدى. مەيىرحاننىڭ ءوزى دە كىتاپتى كوپ وقيدى. بۇگىنگى كۇنگە دەيىن 68 مىڭ كىتاپتى وقىپ تاۋىسىپتى.
«كىتاپحانادا 14000 نان استام كىتاپ بار. ولاردىڭ ىشىندە تەك جاڭادان كەلگەندەرىن عانا ءالى وقىپ ۇلگەرمەدىم. سونداي-اق بوس كەزىمدە توقىمانى ەرمەك ەتەمىن. سەبەبى، ول ءبىزدىڭ دەنساۋلىعىمىزعا وتە پايدالى. ال، توقىعان سومكە، شۇلىق سەكىلدى زاتتارىمدى تانىستارىما سىيلاپ جىبەرەمىن»، - دەيدى ول.
بۇگىندە مەيىرحاننىڭ «اقيقاتتان اتتامايىق!» اتتى العاشقى اۋدارمالار جيناعى جارىق كورگەن. قازىر «جانىمنىڭ جاقۇتى» اتتى ەكىنشى جيناقتى باسپاعا دايىنداپ جاتىر. بۇل ىسكە جۋرناليست بەيسەنكۇل نارىمبەتوۆا ۇيىتقى بولىپتى.
كەيىنگى كەزدە پوليگلوت جىگىت ەرتەگىلەر جازۋعا بەت بۇردى. «ساردار سۇيگەن سۇلۋلار»، «گۇلگە ىنتىق گۇلباحار» اتتى تۋىندىلارىن وقىعان كوپشىلىك جوعارى باعاسىن بەرگەن. قازىرگى تاڭدا تۇرىك جازۋشىسى گۇناي تەكيننىڭ «جۇرەگىمدەگى قالا» كىتابىن اۋدارىپ جاتىر.
مەيىرحان توپانباي «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراتسياسى ۇيىمداستىرعان XVI «جان شۋاق» قوعامدىق سىيلىعىنىڭ لاۋرەاتى اتاندى. جەڭىمپاز 1 ميلليون تەڭگە كولەمىندەگى اقشالاي سىيلىققا يە بولدى.
ايتا كەتەيىك، بۇعان دەيىن 10 ءتىلدى ەركىن مەڭگەرگەن تۇركىستاندىق ازاماتتىڭ 68 مىڭ كىتاپ وقىعانىن جازعان بولاتىنبىز.
