تۇركىستان وبلىسىنداعى مال بازارلارىندا ساۋدا قىزىپ تۇر
تۇركىستان. KAZINFORM - بۇگىن مال بازارعا كەلۋشىلەر كوپ. ءبىرى ءتورت تۇلىگىن ساتاتىن بولسا، ەندى ءبىرى الۋ ءۇشىن ارنايى ات باسىن بۇرىپ جاتىر. ايت نامازىنان سوڭ، بىزدە بازارداعى بۇگىنگى جاعدايمەن تانىسىپ قايتتىق.
تۇركىستان قالاسىنداعى مال بازاردىڭ الدىندا توقتاپ تۇرعان كولىك كوپ. سوندىقتان بازارعا كەلۋشىلەر سول ماڭداعى جول جيەگىن جاعالاپ توقتاپ جاتىر. ال، ىشتە ساۋدا قىزىپ تۇر. ءبىرى مالدى ىشكە كىرگىزىپ جاتسا، ەندى ءبىرى ەكى اياعىنان سۇيرەپ كولىككە سالۋدا. باعادا دا ءوسىم بار.
«قۇرباندىق شالۋعا نيەت ەتىپ، قوشقار الىپ كەتىپ بارامىز. 120000 تەڭگە بولدى. جوبامەن 70-80 كەلى شىعىپ قالادى» - دەيدى جەرگىلىكتى تۇرعىن باۋىرجان ۋلتايەۆ ەسىمدى ازامات.
مۇندا سيىر باعاسى 300000 تەڭگەدەن جوعارى. ال، قويلاردى 45000-50000 تەڭگەدەن، ەشكىلەردى 30000-35000 تەڭگەدەن الۋعا بولادى. سونداي- اق، قاساپشىلاردىڭ دا قىزمەتى بار. ەگەر قويدى قاساپشىلاردان الاتىن بولساڭىز، تەگىن سويىپ، جىلىكتەپ بەرەدى. ال، ءوز قويىڭىزدى سويدىرعىڭىز كەلسە، كەلىسىمگە كەلۋگە بايلانىستى باعا شىعادى. ماسەلەن، ءىرى قارانى 10000 تەڭگەدەن، قويدى 2000 -5000 تەڭگە جوباسىندا سويدىرىپ الا الاسىز.
ال، كەنتاۋ قالاسىنداعى مال بازارعا ساتىلىمعا شىققانداردىڭ باسىم بولىگى قوشقار مەن قوي بولدى. ەشكىلەر دە سيرەك. دەگەنمەن، ساۋدا مۇندا دا قىزىپ تۇر. كەلىسىمگە قاراي قالاعان قويىڭىزدى الا الاسىز. كوپشىلىگى جەرگىلىكتى جەردە جەمگە بايلانىپ، سەمىرتىلگەن.
«ءوزىمىز قولدا وسىرگەن قوشقاردى ساتىلىمعا شىعارىپ تۇرمىز. باعاسى دەنەسىنە ساي. اسا قىمبات ەمەس. الۋشى بولسا 110000 تەڭگەگە بەرىپ جىبەرەمىن. مەن الىپساتار ەمەسپىن» - دەيدى كەنتاۋلىق تۇرعىن ايشا.
بازار قىزمەتكەرلەرى ءۇش كۇن قاتارىنان جۇمىس ىستەيتىندىكتەرن جەتكىزدى. ياعني، ءۇش كۇن ايتتا مال ساتۋشىلار مەن الۋشىلار ءۇشىن، ەسىك ايقارا اشىق.
سايرام اۋدانىنا قاراستى قارابۇلاق اۋىلىندا ورنالاسقان مال بازار، ەلىمىزدەگى ەڭ ۇلكەن بازاردىڭ ءبىرى. جالپى اۋماعى 7 گەكتار جەردى الىپ جاتىر. بازار ىشىنە ەكى مىڭنان استام مال سيادى. مۇندا سيىرعا، قويعا، جىلقىعا بولەك-بولەك ورىن دايىندالعان. مال دارىگەرلەر ءاربىر مالدى جەكە-جەكە تەكسەرۋدەن وتكىزەدى.
«مۇندا حالىق ەلىمىزدىڭ ءار ايماعىنان كەلەدى. ءتىپتى، وزبەكستاننان، رەسەيدەن، قىرعىزستاننان ارنايى كەلەتىندەر دە بار. ءار سارسەنبى كۇنى مىڭعا جۋىق ادام بازاردان ءوز ءناپاقاسىن تابادى. ماسەلەن، 500-گە جۋىق جۇك كولىگى، 150-دەن استام شاعىن تاسىمالداۋشى كولىكتەر توقتاپ جاتقان جوق. ال، 100-دەن استام ادام شاعىن اسحانالاردا ىستىق ءشاي مەن ءبالىش ساتىپ جاتىر. 24 كۇزەتشى مەن 8 تازالاۋشى مامان ءوز قىزمەتىن جاساپ ءجۇر» ، - دەيدى قارابۇلاق جاڭا مال بازارىنىڭ يەسى ابدۋحاكار حاسانوۆ.
بۇل مال بازاردا ساۋدالاسۋدىڭ وزىندىك ءتارتىبى بار. الۋشى ساتۋشىنىڭ قولىن قىسىپ، قاتتى سىلكىپ وزىندىك باعاسىن ايتادى. ساتۋشى كەلىسىمەن بەرمەسە، قايتادان قول سىلكۋ باستالادى. ءار باعا ايتىلعان سايىن، وسى كورىنىس. جان- جاعىنداعى ادامدار ەكى تاراپتىڭ كەلىسىمگە كەلگەنىن قىزىقتاپ قاراپ تۇرادى. ءتىپتى، كەڭەس ايتىپ، ەكى قول الۋشىنى كەلىستىرەتىندەر دە بار. مۇنداي جاعدايدا الۋشى ريزاشىلىقپەن «شوتال» دەپ 2 000 تەڭگە ۇسىنىپ كەتەدى.
بازاردا 50-60 كەلى تارتاتىن قيسار قوشقارلار 130 مىڭ تەڭگەدەن ساتىلىپ جاتىر. ال، كىشىلەرىن 100 مىڭنان الۋعا بولادى. قويلاردىڭ دا باعاسى سول جوبادا. سەمىزدىگى مەن سالماعىنا قاراي باعالانادى. استانادان كەلگەن انگۋستاردىڭ ءبىر داناسى 330 مىڭنان، ال اق باس سيىرلار 280 مىڭعا باعالانىپ جاتتى. وسكەمەننەن كەلگەن بۇقانى ساتۋشىلار 500 مىڭ تەڭگە سۇرادى. ال، بۇزاۋلى سيىر 395 مىڭعا ساتىلدى. سونداي-اق بازاردا كولىگىنە تيەلگەن ءشوپتى ساتاتىنداردى دا كەزدەستىرەسىز. مالعا ازىق قاجەت بولسا، ساتىپ الۋىڭىزعا بولادى.
اۆتور
ايدار وسپاناليەۆ
