تۇركىستان وبلىسى جاڭا تاعايىندالعان اكىمىنىڭ الدىندا قانداي مىندەتتەر تۇر
استانا. KAZINFORM - پرەمەر- مينيستر ولجاس بەكتەنوۆ پەن پرەزيدەنت اكىمشىلىگىنىڭ باسشىسى ايبەك دادەباي تۇركىستان وبلىسى ءماسليحاتىنىڭ جينالىسىنا قاتىستى، دەپ حابارلايدى ۇكىمەتتىڭ باسپا ءسوز قىزمەتى.
دەپۋتاتتارعا مەملەكەت باسشىسىنىڭ تۇركىستان وبلىسىنىڭ اكىمى لاۋازىمىنا ەكى كانديدات ۇسىنۋ تۋرالى حاتى وقىلدى. قاراۋعا تۇركىستان وبلىسى اكىمىنىڭ ورىنباسارى نۇرالحان كوشەروۆتىڭ جانە سوزاق اۋدانىنىڭ اكىمى مۇحيت تۇرىسبەكوۆتىڭ كانديداتۋرالارى ۇسىنىلدى. سايلاۋ كوميسسياسى اشىق داۋىس بەرۋ قورىتىندىسىن شىعارىپ، 288 داۋىستىڭ 224 ءى نۇرالحان كوشەروۆكە بەرىلدى.
ءماسليحات جينالىسىنىڭ قورىتىندىسىنا سايكەس، ق ر پرەزيدەنتىنىڭ ءتيىستى جارلىعىمەن نۇرالحان ورالباي ۇلى كوشەروۆ تۇركىستان وبلىسىنىڭ اكىمى بولىپ تاعايىندالدى.
وبلىس اكتيۆىمەن كەزدەسۋدە پرەمەر- مينيستر ولجاس بەكتەنوۆ دارحان ساتىبالدىعا ءوڭىردىڭ دامۋىنا قوسقان ۇلەسى ءۇشىن العىس ايتىپ، الداعى قىزمەتىنە تابىس تىلەدى.
پرەمەر- مينيستر ءوڭىر اكتيۆىنە جاڭا اكىمدى تانىستىرا كەلە، مەملەكەت باسشىسىنىڭ وبلىس باسشىلىعى الدىنا قويعان مىندەتتەرىنە توقتالدى.
پرەزيدەنتتىڭ Ana tili گازەتىنە بەرگەن سۇحباتىندا ايتىلعان ەكونوميكانى نىعايتۋ جانە حالىقتىڭ تۇرمىس ساپاسىن جاقسارتۋ ماقساتى اياسىندا، باسىم باعىتتار قاتارىندا ەكونوميكانى ءارتاراپتاندىرۋ جانە ءونىمدى جاڭا جۇمىس ورىندارىن قۇرۋ ارقىلى كلاستەرلىك وندىرىسكە كوشۋ، «TURAN» ا ە ا مەن ءوڭىردىڭ جالپى ينۆەستيتسيالىق تارتىمدىلىعىن ارتتىرۋ، كولىك- لوگيستيكالىق الەۋەتتى اشۋ جانە اوك دامۋىن ارتتىرۋ ماسەلەلەرى اتاپ ءوتىلدى. حالىقتى قولجەتىمدى ءارى ساپالى اۋىز سۋمەن جانە ازىق- تۇلىك ونىمدەرىنىڭ تۇراقتى باعاسىن قامتاماسىز ەتۋ، ينجەنەرلىك ينفراقۇرىلىمدى جاڭعىرتۋ بويىنشا ءبىرقاتار مىندەتتەر قويىلدى.
وبلىس ورتالىعى - تۇركىستاننىڭ تاريحي ءارى رۋحاني ماڭىزدىلىعىن ەسكەرە وتىرىپ، مادەني مۇرانى ساقتاۋعا جانە تۇركى الەمىنىڭ باۋىرلاس حالىقتارى اراسىنداعى بايلانىستى نىعايتۋعا، سونداي- اق تۋريزم سالاسىن دامىتۋعا ەرەكشە كوڭىل ءبولۋ تاپسىرىلدى.
