تۇركيادا بالالاردىڭ الەۋمەتتىك جەلى مەن سمارتفون پايدالانۋىنا شەكتەۋ ەنگىزىلەدى
استانا. KAZINFORM - تۇركيا الەۋمەتتىك جەلى قولدانۋشىلار جاسىنا شەكتەۋ قويىپ، 13 جاسقا تولماعان بالالاردىڭ سمارتفون پايدالانۋىنا تىيىم سالماقشى.
بۇل باستاما تۇرىك بيلىگىنىڭ كامەلەتكە تولماعانداردى سيفرلىق تەحنولوگيالاردىڭ تەرىس اسەرىنەن قورعاۋ جانە ولاردىڭ ينتەرنەتتەگى قاۋىپسىزدىگىن قامتاماسىز ەتۋ جونىندەگى شارالارىنىڭ ءبىرى.
جاڭا زاڭ باستاماشىلارىنىڭ ايتۋىنشا، جوبا ا ق ش، قىتاي، فرانسيا جانە باسقا ەلدەردە قولدانىلعان ءساتتى شەكتەۋ مىسالدارىن ەسكەرە وتىرىپ، حالىقارالىق تاجىريبەگە نەگىزدەلگەن. بيلىك بالالاردىڭ فيزيكالىق جانە پسيحيكالىق دەنساۋلىعىنا تەرىس اسەر ەتەتىن كيبەرقورقىتۋ مەن گادجەتتەردى شامادان تىس پايدالانۋدى، ورىنسىز اقپاراتتاردىڭ قولجەتىمدىلىگىن قوسا العاندا، الەۋمەتتىك مەديانى ەرتە پايدالانۋمەن بايلانىستى تاۋەكەلدەردى بارىنشا ازايتۋعا تىرىسادى.
جاڭا زاڭ 13 جاسقا تولماعان بالالاردىڭ تەحنولوگيا پايدالانۋىن شەكتەپ قانا قويماي، پلاتفورمالاردى جاس تالاپتارىن ورىنداۋعا جاۋاپتى ەتەدى دەگەن بولجام جاسالدى. كومپانيالاردان پايدالانۋشىلاردىڭ جاسىن تەكسەرۋ جانە كامەلەتكە تولماعانداردىڭ جەكە دەرەكتەرىن قورعاۋدى قامتاماسىز ەتۋ تەتىكتەرىن ەنگىزۋ تالاپ ەتىلەدى.
ءبىرقاتار ەلدەردە مۇنداي تاجىريبە قازىردىڭ وزىندە بار. مىسالى، فرانسيادا گادجەتتەرگە تاۋەلدىلىكتى ازايتۋ جانە ساباقتا زەيىندى شوعىرلاندىرۋ دەڭگەيىن ارتتىرۋ ءۇشىن 15 جاسقا دەيىنگى بالالارعا مەكتەپتەردە سمارتفون قولدانۋعا تىيىم سالىنعان. قىتاي بالالاردىڭ الەۋمەتتىك جەلى پايدالانۋىنا قاتاڭ شەكتەۋ قويدى. ا ق ش ءوز كەزەگىندە الەۋمەتتىك پلاتفورمالاردى قولدانۋشىلاردىڭ جاسىن باقىلاۋدى كۇشەيتەتىن زاڭ جوبالارىن بەلسەندى تۇردە تالقىلاپ جاتىر.
الەمدەگى ءاربىر التى ەلدىڭ ءبىرى مەكتەپتەردە سمارتفون پايدالانۋعا زاڭ نەمەسە ۇسىنىس بويىنشا تىيىم سالعان.
سونىمەن قاتار، تۇركيادا بالالار اراسىنداعى ينتەرنەتتى پايدالانۋ 2024 -جىلى 91,3 پايىزدى قۇراپ، رەكوردتىق كورسەتكىشكە جەتتى. بۇل كورسەتكىش وسكەلەڭ ۇرپاق ومىرىندەگى سيفرلىق تەحنولوگيالار ءرولىنىڭ ارتىپ كەلە جاتقانىن كورسەتەدى. بۇل رەتتە ۇلدار اراسىندا ينتەرنەتتى قولدانۋشىلاردىڭ ۇلەسى %92,2، ال قىزدار اراسىندا %90,3 قۇرادى.
قازاقپارات بۇدان بۇرىن اۋستراليادا 16 جاسقا تولماعان بالالار ءۇشىن الەۋمەتتىك جەلىلەرگە تىيىم سالۋدى زاڭداستىراتىنىن حابارلاعان بولاتىن.
اۆتور
زارينا تۋعانبايەۆا
