تۇركيا مەديتسينالىق تۋريزم جونىنەن بەسىنشى ورىندا تۇر

استانا. KAZINFORM - تۇركيا الەمدەگى ەڭ كوپ ناۋقاستاردى قابىلدايتىن 5 ەلدىڭ قاتارىندا. شارتارابى تەڭىزبەن شەكارالاس انادولى جۇرتى، بۇل سالادان تابىستى 2030 -جىلعا دەيىن 10 ميلليارد دوللارعا جەتكىزۋگە نيەتتى.

اسىرەسە ەم ىزدەپ ەل اسىپ جۇرگەن جۇرت سوندا شاش ەكتىرىپ، سەمىزدىك جانە پلاستيكالىق وتالار جاساتۋعا ءجيى تابان تىرەيدى. تۇركيا مەديتسينالىق تۋريزمدى دامىتۋدى 2000 -جىلداردىڭ باسىندا عانا كىرىستى. ەلدە دەنساۋلىق ساقتاۋ جۇيەسىندە اۋقىمدا رەفورمالاردى جۇزەگە اسىردى. ناقتىراق ايتقاندا، مەملەكەتتىك اۋرۋحانالار سانىن ارتتىرىپ، جەكە كلينيكالارعا ينۆەستيتسيا قۇيىلدى. ەل 20 جىلدىڭ ىشىندە سالادان تابىسىن ەسەلەپ، بۇگىندە 2 ميلليونعا جۋىق ناۋقاسقا مەديتسينالىق قىزمەت كورسەتىپ وتىر.

رەدجەپ تايپ ەردوعان، تۇركيا پرەزيدەنتى:

- تۇركيا رەتىندە ءبىز الەمدەگى تۋريزم تۇرعىسىنان ەڭ كۇشتى الەۋەتكە يە ەلدەردىڭ ءبىرىمىز. مەديتسينالىق تۋريزم، مادەني تۋريزم، سەنىم تۋريزمى، قىسقى تۋريزم جانە تابيعات سپورتى سياقتى كەڭ اۋقىمدى سالالاردا مۇمكىندىكتەرىمىز مول. دەگەنمەن كوپ جىلدار بويى مۇنى قولدانا المادىق. 2008 -جىلدان بەرى بۇل قاتە باعىتتى وزگەرتۋگە شەشىم قابىلدادىق. ستراتەگيالىق سالاعا اينالدىرىپ، تۋريزمدى 12 ايعا دەيىن كەڭەيتۋ ماقساتىمىز اياسىندا تاريح، يمان، مادەنيەت، تابيعات، دەنساۋلىق جانە گاسترونوميا سياقتى ماڭىزدى سالالاردا ءىرى رەفورمالار جۇرگىزدىك.

سوڭعى ونجىلدىقتا تۇركيانىڭ مەديتسينالىق تۋريزم سەكتورىنداعى جەتىستىكتەرى ايتارلىقتاي قارقىنمەن ءوستى. 2022 -جىلعى ەلگە 1,5 ميلليوننان ارتىق شەتەلدىك ناۋقاس ەمدەلۋگە كەلسە، 2023 -جىلى بۇل كورسەتكىش 2 ميلليونعا جەتتى. اسىرەسە ەۋروپا ەلدەرى، تاياۋ شىعىس، رەسەي، ا ق ش ەلدەرىنەن كەلگەن تۋريستەر باسىم.

ساليح كۋتلۋك، حالىقارالىق انتاليا دەنساۋلىق تۋريزمى جانە ءبىلىم بەرۋ قاۋىمداستىعىنىڭ كەڭەسشىسى:

- شاشتى ترانسپلانتاتسيالاۋ بويىنشا الەمدە ءبىرىنشى ورىندامىز. سوڭعى جىلدارى بيزنەس تۇرعىسىنان ماڭىزدى قادام جاسادىق. بىزدە سەمىزدىك بويىنشا دا جاقسى كورسەتكىشتەر بار. ءبىراق، ارينە، باسقا ايماقتارعا تاراتۋ، كۇن تارتىبىندە بولماعان تەرمالدى تۋريزمدى ىسكە قوسۋ نەمەسە ەمدەلۋشى قارتتاردىڭ كۇتىمىن ساۋىقتىرۋ تۋريزمى رەتىندە باعالاۋ سياقتى باسقا تارماقتاردى بەلسەندىرسەك، بىرنەشە جىلدىڭ ىشىندە شامامەن 10 ميلليارد دوللارعا جەتەمىز دەپ ويلايمىن.

وتانداستارىمىز ءجيى ەم ىزدەپ تۇركياعا تابان تىرەيدى. بەيرەسمي دەرەكتەر بويىنشا 2022 -جىلى انادولى جەرىنە شامامەن 10 مىڭنان استام كىسى دەرتىنە داۋا ىزدەپ بارعان. ولاردىڭ باسىم بولىگى ىستانبۇل، انكارا مەن انتالياداعى اۋرۋحانالاردى تاڭداعان.

24.kz