تۇركى مەملەكەتتىلىك تاريحى Ⅱ كونگرەسى جوشى ۇلىسىنىڭ 800 جىلدىعىنا ارنالدى
الماتى. KAZINFORM - الماتىدا «شىڭعىس حان داۋىرىندەگى تۇركى حالىقتارىنىڭ مەملەكەتتىلىگى» تاقىرىبىندا Ⅱ تۇركى مەملەكەتتىلىگى تاريحى كونگرەسى ءوتتى.
كونگرەسس تۇركى الەمى مەن جالپى ەۋرازيانىڭ تاريحىندا ماڭىزدى ءرول اتقارعان جوشى ۇلىسىنىڭ 800 جىلدىعىنا ورايلاستىرىلعان.
حالىقارالىق ءىس-شارانى تۇركى اكادەمياسى جانە ق ر ع ج ب م جوشى ۇلىسىن زەرتتەۋ عىلىمي ينستيتۋتىمەن بىرلەسە ۇيىمداستىردى. كونگرەسس تۇركى مەملەكەتتەرىنىڭ جەتەكشى عالىمدارى مەن ديپلوماتيالىق كورپۋس وكىلدەرىن، سونداي-اق موڭعوليا، كورەيا، رەسەي، ا ق ش، اۋستريا، بولگاريا جانە ۋكراينادان كەلگەن قاتىسۋشىلاردىڭ باسىن قوستى.
تۇركى اكادەمياسىنىڭ باسشىسى شاھين مۇستافايەۆ اشىلۋ سالتاناتىندا مۇنداي ءىس-شارا عىلىمي ىنتىماقتاستىقتى نىعايتىپ، تۇركى حالىقتارىنىڭ تاريحىنا وبەكتيۆتى، ناقتى دەرەكتەرگە نەگىزدەلگەن كوزقاراستى ىلگەرىلەتۋگە ىقپال ەتەتىنىن ايتتى.
«تاريح - ۇلتتىق بىرەگەيلىكتىڭ نەگىزى. الايدا ءبىز تاريحي فاكتىلەردىڭ بۇرمالانۋى باۋىرلاس حالىقتار اراسىندا دا قاقتىعىستار تۋدىرا الاتىنىن بايقاي الامىز. ءبىزدىڭ مىندەتىمىز - وسىنداي مانيپۋلياتسيالاردىڭ الدىن الۋ جانە بارلىق تۇركى حالىقتارىنا تۇسىنىكتى بولاتىن باياندامالار جاساۋ»، - دەدى ش. مۇستافايەۆ.
كونگرەسس بارىسىندا تۇركى حالىقتارىنىڭ ساياسي تاريحىنا جانە ولاردىڭ مادەنيەتىنىڭ دامۋىنا ايتارلىقتاي اسەر ەتكەن شىڭعىس حان ءداۋىرى باستى تاقىرىپ بولدى.
«شىڭعىس حان كەزەڭى تۇركى حالىقتارىنىڭ ساياسي جانە ەتنيكالىق تاريحىنا زور ىقپال ەتتى. ونىڭ ماڭىزدىلىعىن اسىرا باعالاۋ مۇمكىن ەمەس - بۇل سول كەزەڭدەگى ورتاق تۇركى كەڭىستىگىندەگى حالىقتاردى جاڭا، جاھاندانۋ داۋىرىنە جەتەلەگەن كەزەڭ بولدى»، - دەدى اكادەميا پرەزيدەنتى.
ەكى كۇندىك كونگرەستە عالىمدار شىڭعىس حان داۋىرىندەگى تۇركى مەملەكەتتەرىنىڭ تاريحىنىڭ ءارتۇرلى اسپەكتىلەرى بويىنشا باياندامالار ۇسىندى. قورىتىندى رەتىندە قاتىسۋشىلار ورتاق دەكلاراتسيا قابىلداپ، تۇركى حالىقتارىنىڭ مەملەكەتتىك تاريحىن كەشەندى جانە كوپجاقتى زەرتتەۋدىڭ ماڭىزدىلىعىن اتاپ ءوتتى.
قۇجاتتا تاريح، ارحەولوگيا، ەتنوگرافيا، تۇركولوگيا جانە پوپۋلياتسيالىق گەنەتيكا سياقتى ءتۇرلى عىلىمي سالالار وكىلدەرى اراسىنداعى بىرلەسكەن زەرتتەۋلەردى جانداندىرۋ قاجەتتىلىگى كورسەتىلدى. سونىمەن بىرگە، تۇركى اكادەمياسى كونگرەسستە وقىلعان باياندامالار جيناعىن شىعارادى.
