تۇرعىن ءۇي كەزەگى: زاڭ جوباسىندا نە قارالىپ جاتىر
استانا. KAZINFORM - بىلتىر ەلىمىزدە 17,5 ميلليون شارشى مەتر ءۇي قولدانىسقا بەرىلگەن. بيىل ەكونوميكالىق ءوسۋدى قامتاماسىز ەتۋ جونىندەگى ءبىرىنشى كەزەكتەگى ءىس-قيمىلدار جوسپارىنا سايكەس، كورسەتكىشتى 18 ميلليون شارشى مەترگە دەيىن ارتتىرۋ كوزدەلىپ وتىر.
بۇل تۋرالى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگىدە ق ر ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى ءتوراعاسى باقىتجان جۇنىسبەكوۆ ايتتى.
كەيىنگى جۇرگىزىلگەن ستاتيستيكاعا سايكەس، جالپى تۇرعىن ءۇي كەزەگىندە بارلىعى 648 مىڭنان استام ادام تۇر ەكەن. ونىڭ ىشىندە:
- ەكىنشى دۇنيەجۇزىلىك سوعىس ارداگەرلەرى - 26؛
- جەتىم بالالار، اتا- اناسىنىڭ قامقورلىعىنسىز قالعان بالالار - 61618؛
- كوپبالالى انالار، كوپبالالى وتباسىلار - 130167؛
- حالىقتىڭ الەۋمەتتىك وسال توپتارى - 254471؛
- بيۋدجەتتىك قىزمەتكەرلەر، مەملەكەتتىك قىزمەتشىلەر، اسكەري قىزمەتشىلەر - 198205؛
- جالعىز تۇرعىن ءۇيى اپاتتى دەپ تانىلعان ق ر ازاماتتارى - 3812.
«تۇرعىن ءۇي- كوممۋنالدىق ينفراقۇرىلىمدى دامىتۋدىڭ 2023-2029 -جىلدارعا ارنالعان تۇجىرىمداماسى شەڭبەرىندە الەۋمەتتىك وسال ساناتتاعى كەزەكتە تۇرعاندارعا ساتىپ الۋ قۇقىعىنسىز تۇرعىن ءۇي كەزەكتىلىك تارتىبىمەن جالعا بەرىلەدى. بۇل رەتتە، جالعا بەرىلەتىن تۇرعىن ءۇيدىڭ جالپى كولەمىنىڭ كەمىندە %20- ى ساتىپ الۋ قۇقىعىنسىز جەتىم بالالار مەن كوپ بالالى وتباسىلارعا ۇلەستىرىلەدى. وتكەن جىلى اتالعان مەملەكەتتىك قولداۋ شارالارى شەڭبەرىندە كەزەكتە تۇرعان 9 مىڭعا جۋىق ادام تۇرعىن ۇيمەن قامتاماسىز ەتىلدى. 2024 -جىلى 8-ايدا 6737 ازامات تۇرعىن ۇيمەن قامتىلدى»، - دەدى باقىتجان جۇنىسبەكوۆ.
جالپى، جىل سايىن 2029 -جىلعا دەيىن 10 مىڭعا جۋىق كەزەكتە تۇرعانداردى ساتىپ الۋ قۇقىعىنسىز جالعا بەرىلەتىن تۇرعىن ۇيمەن قامتاماسىز ەتۋ جوسپارلانىپ وتىرعانىن اتاپ وتكەن ءجون.
قازىرگى ۋاقىتتا ق ر پارلامەنتى سەناتىنىڭ قاراۋىندا تۇرعىن ءۇي ساياساتىن رەفورمالاۋ ماسەلەلەرى بويىنشا زاڭ جوباسى جاتىر. وندا حالىقتىڭ الەۋمەتتىك وسال توپتارى ءۇشىن بۇرىن بەرىلگەن جالدامالى تۇرعىن ءۇيدى ساتىپ الۋ قۇقىعىنسىز جەكەشەلەندىرۋ قۇقىعىن بەرۋ بولىگىندە قولداۋ تاپقان.
«بۇدان باسقا، زاڭ جوباسى شەڭبەرىندە دەپۋتاتتار ازاماتتاردىڭ سەگىز ساناتىنا تۇرعىن ءۇي الۋعا ءبىرىنشى كەزەكتەگى قۇقىق بەرۋدى ۇسىندى. «وتباسى بانكى» زاڭ جوباسى شەڭبەرىندە ۇلتتىق دامۋ ينستيتۋتى بولىپ قايتا قۇرىلادى، ونىڭ نەگىزگى مىندەتى - رەسپۋبليكا بويىنشا ازاماتتاردى تۇرعىن ۇيمەن قامتاماسىز ەتۋ بويىنشا تۇرعىن ءۇي قاتىناستارىن دامىتۋ. اكىمدىكتەردە بار كەزەكتە تۇرعانداردىڭ اعىمداعى بازاسى تۇرعىن ءۇيدى ەسەپكە الۋدى، قويۋدى جانە ءبولۋدى ورتالىقتاندىرىلعان تۇردە جۇزەگە اسىراتىن «وتباسى بانكىنە» بەرىلەتىن بولادى. كەزەكتە تۇرعانداردى ساتىپ الۋ جانە سالۋ ارقىلى تۇرعىن ۇيمەن قامتاماسىز ەتۋ اكىمدىكتەردىڭ ەنشىسىندە قالادى. تۇرعىن ءۇيدى ءبولۋ ەسەپكە قويىلعان كۇنگە جانە تابىس دەڭگەيىنە بايلانىستى ۇسىنىلىپ وتىرعان تۇزەتۋلەرمەن جۇزەگە اسىرىلاتىن بولادى»، - دەدى ب. جۇنىسبەكوۆ.
