ترامپتان نەنى كۇتۋگە بولادى؟
استانا. قازاقپارات - پرەزيدەنتتىك مىندەتىنە كىرىسكەن كۇنى دونالد ترامپ 200-دەن اسا جارلىققا قول قويامىن دەپ وتىر. بۇل جولى ساياساتكەر امەريكالىقتاردىڭ ومىرىنە قانداي وزگەرىس اكەلەمىن دەپ وتىر.

دونالد ترامپ 79 جاستا. نيۋ- يوركتە كاسىپكەرلەر وتباسىندا دۇنيەگە كەلگەن. ساياسي مانسابى 90-جىلدارى باستالعان. ترامپ 5 رەت پرەزيدەنتتىك سايلاۋ قاتىسۋعا كۇش سالعان. وسىدان 9 جىل بۇرىن قارسىلاسى حيلاري كلينتوندى باسىپ وزىپ، پرەزيدەنت بولدى. تاقتا 4 جىل وتىردى. ەسىمىزدە قالعانى، پرەزيدەنتتىك مىندەتىنە كىرىسە سالا العاشقى كۇنى سايلاۋالدى ناۋقانى كەزىندە بەرگەن ۋادەلەرىنىڭ ءبىرىن ورىنداعان ەدى. ناقتىراق ايتساق، امەريكاداعى كەدەي تۇرعىندار ءۇشىن مەديتسينالىق قىزمەتتى قولجەتىمدى ەتۋگە باعىتتالعان جارلىققا قول قويعان.
ال وسىدان 5 جىل بۇرىن تاعى سايلاۋعا ءتۇسىپ دجو بايدەننەن جەڭىلگەن بولاتىن. ءبىراق جەڭىلىسىن مويىنداماي، ءتۇرلى نارازىلىق اكسيالارىن ۇيىمداستىردى. جاقتاستارى كاپيتولييدى باسىپ الىپ، ترامپقا 4 قىلمىستىق ءىس قوزعالعان ەدى. ال بىلتىر شىلدەدە پەنسيلۆانياداعى سايلاۋالدى ناۋقانى كەزىندە ساياساتكەرگە شابۋىل جاسالعانى دا ەستە.
د. ترامپتىڭ سايلاۋالدى ۋادەلەرى
دونالد ترامپ سايلاۋالدى ناۋقانى كەزىندە ا ق ش ەكونوميكاسىن بيۋدجەت تاپشىلىعىن قۇتقارىپ قالامىن دەپ ۋادە ەتكەن. ول مەملەكەتتىك بيۋدجەت تاپشىلىعى ماسەلەسىن شەشىپ، باج سالىعىن كوتەرەمىن دەپ وتىر. مىسالى قىتايدان كەلەتىن ونىمدەر ءۇشىن باج سالىعى 60 پايىزعا وسەتىنىن ايتادى. سونىمەن قوسا ساياساتكەر يزرايل مەن حاماس اراسىنداعى جانجالدى شەشۋگە ءسوز بەرگەن. تاراپتار وتكەن اپتادا بەيبىت بىتىمگە كەلىپ، ءتيىستى قۇجاتقا قول قويدى. كەلىسىم اياسىندا پالەستينالىق توپ 3 يزرايلدىك تۇتقىندى بوساتتى. ال ەۆرەي ەلى گازا اۋماعىنان ءوز اسكەرىن اكەتە باستادى. بۇدان بولەك ترامپ ۋكرايناداعى سوعىستى توقتاتىپ، ا ق ش- تاعى زاڭسىز كوشى-قون ماسەلەسىن شەشەمىن دەپ وتىر.
د. ترامپ قىزمەتىنىڭ العاشقى كۇنى 200 جارلىققا قول قويماق
جاڭادان سايلانعان دونالد ترامپ قىزمەتىنىڭ العاشقى كۇنى 200-دەن اسا جارلىققا قول قويادى. ول ەڭ الدىمەن وڭتۇستىك شەكارادا توتەنشە جاعداي جاريالاپ، بارلىق زاڭسىز ميگرانتقا ەل اۋماعىنا كىرۋگە تىيىم سالىپ، توقتاپ قالعان قورشاۋ قۇرىلىسىن جانداندىرۋى مۇمكىن.
سونداي-اق ساياساتكەر ەسىرتكىمەن اينالىساتىن شەتەلدىك توپتاردى لاڭكەستىك ۇيىمدار دەپ تانىماقشى. بۇدان بولەك فوكس نيۋس تەلەارناسى ترامپ دجو بايدەن اكىمشىلىگىنىڭ ماڭىزدى جارلىقتارىنىڭ كۇشىن جوياتىنىن حابارلايدى.
ترامپ ا ق ش- تا تۋعان سابيلەرگە امەريكالىق ازاماتتىقتى اۆتوماتتى تۇردە بەرۋدەن باس تارتقالى وتىر. ەلدەگى قۇجاتسىز ميگرانتتارعا قارسى رەيد جۇرگىزىپ، ولاردى دەپورتاتسيالاپ، مەكسيكامەن شەكارانى باقىلاۋدى قاتاڭداتپاق. ەلدىڭ ەلەكترلى ەمەس كولىك يندۋسترياسىنداعى شەكتەۋلەردى جۇمسارتىپ، مۇناي-گاز ءوندىرىسىن ارتتىرۋعا نيەتتى. اتوم ەنەرگەتيكاسىن جانداندىرىپ، ءوندىرىس پەن ەكونوميكاعا جاڭا قارقىن بەرگىسى كەلەدى.
سكوتت بەسسەنت، قازىنا دەپارتامەنتى باسشىسى قىزمەتىنە ۇمىتكەر:
- ترامپتىڭ ەكونوميكالىق ساياساتىمەن فەدەرالدى رەزەرۆتىك جۇيەنىڭ ماقسات ەتىپ وتىرعان ينفلياتسيانى 2 پايىزدىق مەجەگە جاقىنداتا الامىز دەپ ويلايمىن. ەلىمىزدە جاعدايى تومەن ازاماتتاردىڭ شىعىندارى اۋقاتتى امەريكالىقتاردىڭ شىعىندارىنان ايتارلىقتاي وزگەشە بولىپ كەتتى. دەمەك الداعى ۋاقىتتا نە باعالاردى تومەندەتەمىز، نە جالاقىنى ارتتىرامىز. مەنىڭشە ەكەۋىن دە قاتار جاساۋعا قاۋقارىمىز جەتەدى.
شىنىمەن دە ترامپتىڭ العاشقى پرەزيدەنتتىگىندە ينفلياتسيا 2 پايىزدىق مەجەدەن كوپ اسا قويمادى. ال بايدەن بيلىگى كەزىندە ون پايىزعا دەيىن كوتەرىلىپ، قايتا ءتۇستى. جۇمىسسىزدىق كورسەتكىشى 3,5 پايىزعا ازايىپ، 7 ميلليون جاڭا جۇمىس ورنى اشىلدى. ساراپشىلار «حالىقتىڭ سول ەكونوميكالىق تۇراقتىلىقتى اڭساۋى ترامپتىڭ سايلاۋدا جەڭىسكە جەتۋىنە سەبەپشى بولدى»، - دەيدى.
24.kz