ترامپ يلون ماسكتى ۇكىمەتتىك تيىمدىلىك دەپارتامەنتىنىڭ باسشىسى قىزمەتىنە تاعايىندادى

استانا. KAZINFORM - دونالد ترامپ سايلاۋ كەزىندە ءوزىن قولداعان يلون ماسكتى ۇكىمەت تيىمدىلىگى دەپارتامەنتىنىڭ جاڭا باسشىسى ەتىپ تاعايىندادى. ترامپ سونىمەن بىرگە Fox News ارناسىنىڭ جۇرگىزۋشىسىن پەنتاگوننىڭ باسشىسى ەتۋگە نيەتتى.

امەريكا قۇراما شتاتتارىنىڭ جاڭا پرەزيدەنتى دونالد ترامپ بيزنەسمەن، Tesla جانە Space X نەگىزىن قالاۋشى يلون ماسكتى ۇكىمەتتىڭ تيىمدىلىگى دەپارتامەنتىنىڭ جاڭا باسشىسى ەتىپ تاعايىندادى. بۇل تۋرالى ساياساتكەر ءوزىنىڭ Truth الەۋمەتتىك جەلىسىندە حابارلادى.

- مەن ۇلى يلون ماسكتىڭ امەريكاندىق پاتريوت ۆيۆەك راماسۆاميمەن بىرگە ۇكىمەت تيىمدىلىگى دەپارتامەنتىن (DOGE) باسقاراتىنىن قۋانا حابارلايمىن، - دەپ مالىمدەدى ترامپ.

- وسى ەكى امەريكاندىق بىرگە مەنىڭ اكىمشىلىگىمە مەملەكەتتىك بيۋروكراتيانى جويۋعا، شىعىنداردى قىسقارتۋعا جانە فەدەرالدى اگەنتتىكتەردى قايتا قۇرۋعا جول اشادى، - دەلىنگەن حابارلامادا.

ونىڭ ايتۋىنشا، جاڭا دەپارتامەنت ۇكىمەتتەن تىس ۇسىنىستار جاسايدى، اق ۇيمەن جانە بيۋدجەتتىك كەڭسەمەن «كەڭ اۋقىمدى قۇرىلىمدىق رەفورمالاردى» جۇزەگە اسىرۋ جانە ۇكىمەتكە «بۇرىن- سوڭدى بولماعان» كاسىپكەرلىك كوزقاراستى قالىپتاستىرۋ ءۇشىن جۇمىس ىستەيدى.

ترامپ سونىمەن بىرگە پەنتاگون باسشىسى لاۋازىمىنا ۇمىتكەردى ۇسىندى. بۇل لاۋازىمعا ول Fox News جۇرگىزۋشى جانە گۋانتانامو، يراك پەن اۋعانستاندا قىزمەت ەتكەن ارميا ارداگەرى پيت حەگسەتتى شاقىردى.

- پيت قاتال، اقىلدى جانە امەريكا بارىنەن دە جوعارى ەكەنىنە سەنەدى، - دەدى ترامپ.

ايتا كەتەيىك، بۇعان دەيىن يلون ماسك ترامپ اكىمشىلىگىندەگى ءوزىنىڭ الەۋەتتى ءرولىن اشقان بولاتىن.

اۆتور

جاراسقان نۇرىبايەۆ