تاياۋ شىعىستاعى قاقتىعىس اۋە قاتىناسىنا اسەر ەتىپ، رەيستەر توقتاتىلىپ جاتىر
استانا. KAZINFORM - الەمدەگى كوممەرتسيالىق اۋە كومپانيالارى دۇيسەنبى كۇنى تاياۋ شىعىسقا ۇشۋلاردى قانشا ۋاقىتقا توقتاتۋدى تالقىلاپ جاتىر. سەبەبى، ا ق ش يراننىڭ يادرولىق نىساندارىنا شابۋىل جاساپ، تەگەران ءوزىن قورعاۋعا ۋادە بەرگەننەن كەيىن قاقتىعىس جاڭا كەزەڭگە كوشتى. بۇل ايماقتاعى نەگىزگى ۇشۋ مارشرۋتتارى جابىلىپ قالدى، دەپ جازادى ازەرتادج.
اگەنتتىكتىڭ حابارلاۋىنشا، ادەتتە قاربالاس بولاتىن يران مەن يراك اۋماعىنان جەرورتا تەڭىزىنە دەيىنگى اۋە كەڭىستىگى يزرايلدىڭ 13- ماۋسىمدا يرانعا جاساعان سوققىسىنان كەيىنگى ون كۇن ىشىندە كوممەرتسيالىق رەيستەر ءۇشىن دەرلىك بوس بولدى.
اۋە كومپانيالارى قاۋىپسىزدىك پەن اۋە كەڭىستىگىنىڭ جابىلۋىنا بايلانىستى رەيستەردى قايتا باعىتتاپ، توقتاتىپ نەمەسە كەشىكتىرىپ جاتىر، دەپ جازادى Reuters اگەنتتىگى.
جاقىندا كەيبىر حالىقارالىق اۋە كومپانيالارى دۋباي (الەمدەگى ەڭ ءىرى حالىقارالىق اۋەجايدىڭ ءبىرى) جانە قاتارداعى دوحا سياقتى تۇراقتى اۆياتسيالىق تۇيىندەردەگى رەيستەردى توقتاتۋ فاكتىسى اۆياتسيا سالاسىنىڭ وسى ايماققا قاتىستى الاڭداۋشىلىعىن كورسەتەدى.
دەگەنمەن، كەيبىر حالىقارالىق اۋە كومپانيالارى دۇيسەنبى كۇنى رەيستەرىن قايتا باستادى.
Asia Airlines كومپانياسى جاعدايدى «تۇراقسىز» دەپ سيپاتتاپ، دۇيسەنبى كۇنى سينگاپۋردان دۋبايعا ۇشۋىن قايتا باستاۋعا ءتيىس بولدى، ال سەنبى كۇنى رەيسىن توقتاتقان بولاتىن.
سونىمەن قاتار، Flightradar24 سايتىنىڭ دەرەكتەرىنە سايكەس، British Airways كومپانياسى دۇيسەنبى كۇنى دۋباي مەن دوحاعا جانە كەرى باعىتتاعى رەيستەردى قايتا باستادى، سەنبى كۇنگى رەيستەر توقتاتىلعان ەدى.
رەسەي مەن ۋكراينا اۋە كەڭىستىگىنىڭ كوپشىلىك اۋە كومپانيالارى ءۇشىن جابىق بولۋىنا بايلانىستى، تاياۋ شىعىس ەۋروپا مەن ازيا اراسىنداعى ۇشۋلار ءۇشىن ماڭىزدى باعىتقا اينالدى. سوڭعى ون كۇندە زىمىراندىق جانە اۋە سوققىلارى كەزىندە اۋە كومپانيالارى سولتۇستىككە كاسپي تەڭىزى ارقىلى نەمەسە وڭتۇستىككە مىسىر مەن ساۋد ارابياسىنىڭ اۋماعىمەن اينالىپ ۇشۋعا ءماجبۇر بولدى.
جولدىڭ ۇزاقتىعى مەن رەيستەردىڭ توقتاتىلۋى جانارماي جانە ەكيپاج شىعىندارىنىڭ وسۋىنە اكەلىپ سوقتى، سونىمەن قاتار ا ق ش شابۋىلدارىنان كەيىن مۇناي باعاسىنىڭ قىمباتتاۋى ۇشاق جانار-جاعارمايى قۇنىنىڭ ارتۋىنا اسەر ەتۋى مۇمكىن.
قاقتىعىستاردىڭ ۇلعايۋى اۋە كومپانيالارى ءۇشىن قوسىمشا اۋىرتپالىق تۋدىرادى، ويتكەنى اۋە سوققىلارى كوممەرتسيالىق ۇشاقتاردىڭ كەزدەيسوق نەمەسە ادەيى اتۋ قاۋپىن ارتتىرادى. Flightradar24 اگەنتتىگى Reuters-كە سوڭعى كۇندەرى پارسى شىعاناعى ۇستىندە GPS- سيگنالداردىڭ بۇرمالانۋى مەن كيبەرشابۋىلداردىڭ كۇرت وسكەنىن حابارلادى. GPS- ءتىڭ بۇزىلۋىن باقىلاپ وتىرعان كارتا جاساۋشى شۆەيتساريالىق SkAI كومپانياسى جەكسەنبى كەشكە دەيىن 24 ساعات ىشىندە 150-دەن استام بۇرمالانۋ وقيعاسىن تىركەگەنىن مالىمدەدى.
بۇعان دەيىن تاياۋ شىعىستاعى قاقتىعىستىڭ شيەلەنۋىنە بايلانىستى بىرنەشە رەيس توقتاعانى ءمالىم بولدى.
