تاياۋ شىعىسقا ساپار الدىندا بارلىق تاۋەكەل ەسكەرىلۋى ءتيىس

استانا. KAZINFORM - تاياۋ شىعىستاعى جاعدايدىڭ ۋشىعۋىنا بايلانىستى يران، يزرايل، سيريا، يراك، يوردانيا جانە ليۆاننىڭ اۋە كەڭىستىگى، شەكارالارى جانە ماڭىندا ۇشۋعا شەكتەۋ قويۋىنا قاراماستان، اتالعان مەملەكەتەرگە تۋريستتەردىڭ لەگى ازايعان جوق. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ حابارلادى.

- مينيسترلىك ازاماتتاردى جاعدايدى مۇقيات قاداعالاپ، ساپارلاردى جوسپارلاۋ كەزىندە، اسىرەسە پارسى شىعاناعى ەلدەرىنە، سونىڭ ىشىندە بىرىككەن اراب امىرلىكتەرىنە بارۋ بارىسىندا تۋىنداۋى مۇمكىن قاۋىپ-قاتەرلەردى ەسكەرۋگە شاقىرادى، - دەدى ايبەك سمادياروۆ.

ونىڭ ايتۋىنشا، قاجەت بولعان جاعدايدا قازاقستان ازاماتتارىنىڭ ەلگە ورالۋى تۋريستىك قورعا جانە اۋە كومپانيالارىنا سۇيەنە وتىرىپ قامتاماسىز ەتىلەدى.

سونىمەن قاتار رەسمي وكىل مەملەكەتتىك ورگانداردىڭ ەسكەرتۋىنە قاراماستان، سوڭعى ەكى كۇندە قازاقستاننان ب ا ءا باعىتىنداعى بارلىق اۋە رەيسى تولىق ۇشىپ جاتقانىن ايتتى.

- تاياۋ شىعىس ەلدەرىنە ساپار الدىندا بارلىق تاۋەكەلدى ەسكەرىپ، سالماقتى جانە نەگىزدەلگەن شەشىم قابىلداۋ قاجەت، - دەپ اتاپ ءوتتى.

ايتا كەتەيىك، 70 كە جۋىق قازاقستاندىق يراننان شىعارىلعانىن جازعانبىز.

اۆتور

تاستان تويانوۆ