تاسقىننان كەلگەن زالالدى باعالاۋ جۇمىسى كەشىگىپ جاتىر، جەدەلدەتۋ كەرەك - ولجاس بەكتەنوۆ

استانا. KAZINFORM - قازاقستان پرەمەر-ءمينيسترى ولجاس بەكتەنوۆ مەملەكەت باسشىسى قاسىم-جومارت توقايەۆتىڭ سۋ تاسقىنى سالدارىن جويۋ جانە قالپىنا كەلتىرۋ جۇمىستارىنىڭ بارىسى جونىندەگى تاپسىرمالارىن ورىنداۋعا قاتىستى كەڭەس وتكىزدى.

جەتەكشىلىك ەتەتىن باعىتتار بويىنشا زارداپ شەككەن وڭىرلەردىڭ اكىمدەرى مەن مينيسترلەردىڭ بايانداماسى تىڭدالدى.

ەلىمىز سۋ تاسقىنىنىڭ ءقاۋىپتى كەزەڭىنەن ءوتتى. قازىرگى ساتتە اتىراۋ وبلىسىندا جايىق وزەنىندەگى سۋدىڭ ءقاۋىپتى دەڭگەيىنىڭ ساقتالۋىنا بايلانىستى سۋ تاسقىنىنا قارسى جۇمىستار جالعاسىپ جاتىر.

وسىعان بايلانىستى اتىراۋ وبلىسىنىڭ اكىمى سەرىك شاپكەنوۆ سۋ تاسقىنىنا قارسى ءىس-شارالاردى ىسكە اسىرۋ جالعاسىپ جاتقان وڭىردەگى احۋال تۋرالى باياندادى.

جاعالاۋدى نىعايتۋ بوگەتتەرىنىڭ بويىندا (ۇزىندىعى 520 كيلومەتردەن استام) تاۋلىك بويى كەزەكشىلىك ۇيىمداستىرىلدى.

بۇل رەتتە اتىراۋ وبلىسىنىڭ سۋ تاسقىنى جاعدايى تۇراقتى اۋداندارىندا زارداپتاردى جويۋ جونىندەگى كوميسسيالار بەلسەندى جۇمىس ىستەۋدە.

ماسەلەن، جىلىوي اۋدانىندا 3730 ءوتىنىش بەرۋشى تۇرعىنعا جالپى سوماسى 1,3 ميلليارد تەڭگەگە 100 ا ە ك مولشەرىندە ءبىرجولعى جاردەماقى تولەندى.

كوميسسيا 2727 ءوتىنىشتى قابىلداپ، 2671 ۇيگە تەحنيكالىق تەكسەرۋ جانە 2624 ۇيگە باعالاۋ جۇرگىزگەن. 10 تۇرعىن ءۇيدىڭ قۇرىلىسى باستالىپ، 14 تۇرعىن جوندەۋ-قالپىنا كەلتىرۋ جۇمىستارىنا تولەم الدى. باعالاۋشى ماماندار تاۋلىك بويى جۇمىس ىستەپ جاتىر.

جالپى، قازاقستاننىڭ سۋ تاسقىنىنان زارداپ شەككەن وڭىرلەرىندە 60 مىڭنان استام ادام ءوز ۇيلەرىنە ورالدى. ەۆاكۋاتسيالىق پۋنكتتەردەگى تۇرعىندارعا جەرگىلىكتى اتقارۋشى ورگاندار قاجەتتى كومەك كورسەتۋدە.

26651 وتباسى 10 ميلليارد تەڭگەدەن استام سوماعا 100 ا ە ك مولشەرىندە ءبىرجولعى تولەم الدى.

جەرگىلىكتى اكىمدىكتەر زارداپ شەككەن تۇرعىنداردى ساپالى تۇرعىن ۇيمەن قامتاماسىز ەتۋ بويىنشا جۇمىس جۇرگىزىپ كەلەدى. 239 وتباسى قيراعان باسپاناسىنىڭ ورنىنا پاتەرلەر مەن ۇيلەرگە يە بولدى.

اقتوبە، باتىس قازاقستان، قوستاناي، اتىراۋ، سولتۇستىك قازاقستان، پاۆلودار وبلىستارىندا زارداپ شەككەن ازاماتتارعا ارنالعان 794 جاڭا ءۇيدىڭ قۇرىلىسى جۇرگىزىلۋدە.

سونىمەن قاتار 891 وتباسى تۇرعىن ءۇيىن جوندەۋگە جانە قالپىنا كەلتىرۋ ءۇشىن وتەماقى الدى. جالپى زارداپ شەككەن وڭىرلەردە 11137 تۇرعىن ءۇي تەكسەرىلىپ، 7863 نىسانعا باعالاۋ جۇمىسى جاسالدى.

ايتا كەتۋ كەرەك، سۋعا كەتكەن مالدىڭ وتەمى ءۇشىن مەملەكەتتىك كومەك كولەمى 1,3 ميلليارد تەڭگەدەن استى.

ۇكىمەت باسشىسى جۇمىس قارقىنىنا باسا نازار اۋداردى.

«باعالاۋ، زالالدى وتەۋ، قالپىنا كەلتىرۋ جانە قۇرىلىس جۇرگىزۋ ءۇشىن اۋقىمدى جۇمىس كۇتىپ تۇر. ءبىز قازىرگى كەزەڭدە جۇمىس قارقىنىن كورىپ وتىرمىز، ءبىراق كەلتىرىلگەن زالالدى باعالاۋ ساتىسىندا كەشىگۋ بار. توتەنشە جاعدايدا بارلىق پروتسەستەردى جەدەلدەتۋ كەرەك. باعالاۋشى مامانداردى شىعىندى ەسەپتەۋ اياقتالعان وڭىرلەردەن اتىراۋ جانە باسقا دا وبلىستارعا جەدەل باعىتتاۋ قاجەت»، - دەپ اتاپ كورسەتكەن ولجاس بەكتەنوۆ بارىنشا قىسقا مەرزىمدە باعالاۋدى ساپالى جۇرگىزۋدى تاپسىردى.

جەرگىلىكتى اكىمدىكتەرگە كەلگەن ماماندارعا كومەك كورسەتۋدى جۇكتەدى.