تاسقىن سۋ باسقان قۇلسارىنىڭ تۇرعىندارىنا 62 ءۇي بەرىلدى
قۇلسارى. KAZINFORM - اتىراۋ وبلىسىنداعى تاسقىن سۋ باسقان قۇلسارى قالاسىنىڭ تۇرعىندارىنا 62 ءۇي بەرىلدى.
تاسقىن سۋدان زارداپ شەككەن تۇرعىندار ءۇشىن قۇلسارى قالاسىندا جاڭا شاعىن اۋدان بوي كوتەردى. شاعىن اۋداندى «بولاشاق» دەپ اتاۋ ۇيعارىلعان. مۇندا 100 تۇرعىن ءۇي سالۋعا جەرگىلىكتى 8 مەردىگەر كومپانيا تارتىلدى. تۇرعىن ءۇي قۇرىلىسىنا قازاقستاندىق ماتەريالدار قولدانىلعان.
«قازاقستان حالقىنا» قورىنىڭ باسپا ءسوز قىزمەتىنەن ءمالىم ەتكەندەي، قۇلسارى قالاسىندا 80 تۇرعىن ءۇيدىڭ قۇرىلىسىن جۇرگىزۋگە 2 ميلليارد 640 ميلليون تەڭگە بولىنگەن. مۇندا 1 ءۇيدى سالۋعا جۇمسالعان قارجى 31 ميلليون 975 مىڭ تەڭگە بولدى.
تيپتىك ۇلگىدەگى جاڭا ۇيلەردىڭ ءارقايسىسىنىڭ اۋدانى - 100 شارشى مەتر. تۇرعىن ۇيلەردىڭ اۆتورلىق ديزاينىن «ETALON PROJECT GROUP»ج ش س دايىنداعان. بۇل سەرىكتەستىك ديزايننىڭ ساقتالۋىنا باقىلاۋ جۇرگىزدى. ال تەحنيكالىق قاداعالاۋدى «ZAF- سترويسەرۆيس» ج ش س جۇزەگە اسىرعان.
اتىراۋ وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ مالىمەتىنشە، ماۋسىمدا 100 ءۇي سالىنا باستالعان. ونىڭ ىشىندە 62 ءۇيدىڭ قۇرىلىسى تولىق اياقتالعان.
«جاڭا ۇيلەرگە سۋ، گاز، ەلەكتر جەلىسى تارتىلدى. ءار ءۇيدىڭ قۇرىلىسىن جۇرگىزۋگە 10 سوتىق جەر تەلىمى ءبولىندى. ەندى 58 ءۇيدىڭ قۇرىلىسى قىركۇيەكتىڭ سوڭىنا دەيىن اياقتالادى»، - دەدى نۇربەرگەن قۇسايىنوۆ.
تۇرعىندار قۋانىشىمەن بولىسۋگە كەلگەن وبلىس اكىمى سەرىك شاپكەنوۆتىڭ ايتۋىنشا، قۇلسارىدا جاڭا تۇرعىن ۇيلەرمەن بىرگە 2 مىڭ ورىندىق Binom مەكتەبىن، 300 ورىندىق بالاباقشا نىسانىن سالۋ جوسپارلانىپ وتىر. سونداي-اق شاعىن اللەيالار سالىنادى.
«شاعىن اۋداننىڭ اتى «بولاشاق» اتالعان سوڭ وسىندا تۇراتىن وتباسىندا بالالاردىڭ كەلەشەگى جارقىن بولعانىن قالايمىز. الداعى جىلى مەكتەپ، بالاباقشامەن بىرگە دەنە شىنىقتىرۋ-ساۋىقتىرۋ ورتالىعى سالىنادى»، - دەدى سەرىك شاپكەنوۆ.
ەسكە سالا كەتەلىك، بۇدان بۇرىن سۋ باسقان قۇلسارى قالاسىندا 100 ءۇيدىڭ قۇرىلىسى قالاي ءجۇرىپ جاتقانىن جازعان ەدىك.
اۆتور
جولداسبەك شوپەعۇل
