تارازدا قازاق كۇرەسىنەن ەل چەمپيوناتىنا 450-دەن اسا بالۋان قاتىسۋدا
استانا. KAZINFORM - تاراز قالاسىندا قازاق كۇرەسىنەن ەرەسەكتەر اراسىندا قازاقستان رەسپۋبليكاسىنىڭ چەمپيوناتى ءوتىپ جاتىر، دەپ حابارلايدى تۋريزم جانە سپورت مينيسترلىگىنىڭ باسپا ءسوز قىزمەتى.
جاقسىلىق ۇشكەمپىروۆ اتىنداعى «تاراز- ارەنا» سپورت كەشەنىندە ءوتىپ جاتقان باسەكەگە استانا، الماتى جانە شىمكەنت قالالارىنان، 17 وبلىستان كەلگەن 450-دەن استام بالۋان قاتىسۋدا.
جارىستىڭ سالتاناتتى اشىلۋ راسىمىنە ق ر تۋريزم جانە سپورت ءمينيسترى ەربول مىرزابوسىنوۆ قاتىسىپ، كەيىنگى جىلدارى ءتول كۇرەسىمىزدىڭ قارقىندى دامىپ كەلە جاتقانىنا، چەمپيوناتتىڭ ماڭىزدىلىعىنا توقتالدى.
«مەملەكەت باسشىسىنىڭ قولداۋىمەن ۇلتتىق سپورت تۇرلەرى قارقىندى دامىپ كەلەدى. سونىڭ ىشىندە ۇلتتىق برەندىمىز - قازاق كۇرەسىنىڭ ورنى بولەك. اتاپ ايتقاندا، الەمنىڭ 40-تان استام ەلىندە قازاق كۇرەسى فەدەراتسيالارى جۇمىس ىستەيدى. ءتول كۇرەسىمىز جابىق عيماراتتاعى ازيا ويىندارىنىڭ، دۇنيەجۇزىلىك جەكپە- جەك ويىندارىنىڭ باعدارلاماسىنا ەندى. پالۋاندارىمىز استانادا وتكەن 5- دۇنيەجۇزىلىك كوشپەندىلەر ويىندارىندا ۇزدىك ناتيجە كورسەتىپ، 12 التىن، 1 كۇمىس، 2 قولا مەدال يەلەندى. سپورتشىلارىمىزدىڭ حالىقارالىق دودالاردا توپ جارىپ، ۇلت ابىرويىن اسقاقتاتىپ جۇرگەنى ءبىز ءۇشىن ۇلكەن ماقتانىش! بۇگىنگى جارىسقا ساقا پالۋاندارمەن قاتار جاس سپورتشىلاردىڭ تاجىريبەسىن جەتىلدىرىپ، سالاۋاتتى، بەلسەندى ءومىر سالتىن كەڭىنەن ناسيحاتتاپ، وسكەلەڭ ۇرپاقتىڭ قازاق كۇرەسىنە دەگەن قىزىعۋشىلىعىن ارتتىرادى دەپ سەنەمىن»، - دەدى ەربول مىرزابوسىنوۆ.
بىلەكتى بالۋاندار باسەكەسى ك س ر و- نىڭ جانە قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، جامبىل وبلىسىنىڭ قۇرمەتتى ازاماتى مارات نۇرمۇحامبەت ۇلى جاقىتتىڭ 80 جىلدىق مەرەيتويىنا ورايلاستىرىلىپ وتىر. وسى ورايدا، مينيستر سانالى عۇمىرىن ۇلتتىق كۇرەسكە ارناعان مارات نۇرمۇحامبەت ۇلىنا قۇتتىقتاۋ حاتىن تابىستادى.
مارات جاقىت - 20 جىل قازاقستان، 10 جىل ك س ر و قۇراماسىن باسقارىپ، سپورتقا زور ەڭبەك سىڭىرگەن تۇلعا. ول جالپى 2 ەڭبەك سىڭىرگەن سپورت شەبەرىن، 25 حالىقارالىق دارەجەدەگى سپورت شەبەرىن، 130 سپورت شەبەرىن تاربيەلەگەن.
ايتا كەتەيىك، بالۋاندار ەل بىرىنشىلىگىندە 16 سالماق دارەجەسىندە باق سىناپ جاتىر.
اۆتور
اينۇر تۋماكبايەۆا
