تارازدا 85 جاستاعى دارىگەر جۇرەككە وپەراتسيا جاسايدى
استانا. قازاقپارات - تارازدا 85 جاسقا كەلسە دە جۇرەككە وپەراتسيا جاساپ جۇرگەن كارديوحيرۋرگ بار. سەيىتحان جوشىبايەۆ وڭىردە ءوزىنىڭ كلينيكاسىن اشقان. مەكەمەدە جىلىنا 1000-عا جۋىق ناۋقاس ەم الۋدا.
ال الدىنان وتكەن شاكىرتتەرى بىلىكتى مامان اتانىپ، رەسپۋبليكانىڭ ءار ايماعىندا قىزمەت ەتىپ ءجۇر. سەيىتحان جوشىبايەۆ ەڭبەك جولىن 63 جىل بۇرىن قىرعىزستاندا باستاعان. العاشقى 5 جىلىندا جالپى حيرۋرگ بولىپ قىزمەت ەتتى. ودان كەيىن ماسكەۋگە 3 جىلدىق اسپيرانتۋراعا وقۋعا تۇسەدى. سودان بەرى تەك جۇرەك دەرتىن ەمدەپ ءجۇر. بۇگىنگە دەيىن 3000-نان اسا ءساتتى وپەراتسيا جاساعان.
سەيىتحان جوشىبايەۆ، مەديتسينا عىلىمدارىنىڭ دوكتورى، اكادەميك:
- مەن ول ءوزىمنىڭ مىندەتىم عوي دەپ ويلايمىن. اق حالاتتى كيىپ ۆراچ بولامىن، وسى ەلگە جاردەم بەرەمىن دەگەننەن كەيىن، ول مەنىڭ مىندەتىم. وعان بىرەۋگە وسىنداي مەن جاسادىم دەپ ايتۋعا بولمادى. وسى بىلگەنىمدى وسى جەتىستىگىمدى ەلگە قالدىرسام، ارتىمدا ءىز قالسا دەيمىن.
اكادەميك 2007 -جىلى تۋعان جەرگە قىزمەت ەتۋگە ورالدى. ءسويتىپ، ايماقتاعى العاشقى كارديوحيرۋرگيا ورتالىعىن اشتى. بۇگىندە ونىڭ 20-عا جۋىق شاكىرتى عالىم رەتىندە اتى شىققان. جۇزگە جۋىعى رەسپۋبليكانىڭ ءار ايماعىنداعى بەلدى مەديتسينالىق ورتالىقتاردا قىزمەت ەتۋدە.
سەيىتحان جوشىبايەۆ ءالى كۇنگە كۇردەلى وپەراتسيالارعا قاتىسادى. ونىسى سان جىلعى تاجىريبەسىن جاستارمەن ءبولىسۋى. ءوزى اشقان ورتالىقتا جىلىنا 250 وپەراتسيا جاسالىپ، 1000 ادام ەم الادى. ناۋقاستاردىڭ ەڭ ەگدەسى 90 جاسقا كەلگەن قاريا بولسا، ەڭ كىشىسى 2-3 كۇندىك شاقالاق ءسابي.
ۇلجان حۋبييەۆا، مەركى اۋدانىنىڭ تۇرعىنى:
- نەشە ءتۇرلى قيىن اقاۋلارمەن قيىن پوروگتارمەن جاقسى بولىپ شىعىپ كەتىپ جاتىر ۇيلەرىنە. قازىر وپەراتسيادان كەيىن بالامنىڭ جاعدايى جاقساردى. سالماق قوسىپ دامۋى جاقسى بولىپ كەلە جاتىر. وسىنداي مىقتى مامانداردى تاربيەلەپ شىعارعانىنا سەيىتحان جوشىبايەۆ اتامىزعا راقمەت ايتامىن.
85 جاسقا كەلگەن دارىگەر بىلگەنىمەن ءبولىسۋدى جالعاستىرا بەرمەك. بيىل دارىگەرلەردى دايىندايتىن حالىقارالىق اكادەميا اشۋدى جوسپارلاپ وتىر. ول ءۇشىن وقۋ عيماراتىن دا دايارلاپ قويعان. ايماقتا اق حالاتتىلاردى وقىتاتىن جوعارى وقۋ ورداسىنىڭ جوقتىعىن ەسكەرسەك، بۇل وتە ماڭىزدى باستاما بولماق.
24.kz
