تاجىكستاندا كورىپكەلگە بارعاندار دا جازالانادى

استانا. KAZINFORM - تاجىكستاندا باقسىلىق جانە كورىپكەلدىكپەن كۇرەسۋدىڭ جاڭا ءتاسىلى قولعا الىندى. بۇل تۋرالى ەلدىڭ ىشكى ىستەر مينيسترلىگىنىڭ باسپا ءسوز قىزمەتى حابارلادى.

ەندى ىشكى ىستەر مينيسترلىگى باقسىلار مەن كورىپكەلدەردىڭ وزدەرىن جاۋاپقا تارتۋمەن قاتار، ولارعا جۇگىنگەن ازاماتتارعا دا شارا قولداناتىنى اتاپ ءوتىلدى.

- جۇرگىزىلگەن پروفيلاكتيكالىق ءىس-شارالاردىڭ ناتيجەسىندە كورىپكەلدەر مەن باقسىلارعا جۇگىنگەن ازاماتتار ولاردىڭ قىزمەتتەرىنە اقى تولەپ، سول ارقىلى كورىپكەلدەر ءىسىن جانداندىرىپ وتىرعان. قىزمەتىنە جۇگىنگەن بارلىق تۇلعالار ءى ءى م- ءنىڭ ايماقتىق ورگاندارىنا شاقىرىلىپ، ولارعا قاتىستى ءتيىستى حاتتامالار جاسالىپ، ولاردىڭ مالىمەتتەرى مەن فوتوسۋرەتتەرى مينيسترلىكتىڭ مالىمەتتەر بازاسىنا ەنگىزىلەدى، - دەلىنگەن ۆەدومستۆو مالىمەتىندە.

سوڭعى ءبىر ايدا مينيسترلىكتە 150-دەن استام كورىپكەل تىركەلىپ، ولارعا زاڭ اياسىندا شارا قولدانىلىپ جاتقانى حابارلاندى.

سونداي-اق، سوڭعى كەزدەرى قۇقىق قورعاۋ ورگاندارى كورىپكەلدەردى انىقتاپ، تۇراقتى رەيدتەر وتكىزۋمەن بەلسەندى اينالىسۋدا. وسى ارەكەتتەرگە قاراماستان، ولاردىڭ قىزمەتىن پايدالاناتىندار سانى ءالى دە كوپ.

ىشكى ىستەر مينيسترلىگىنىڭ مالىمەتىنشە، جىل باسىنان بەرى دۋشانبەدە باقسىلىقپەن اينالىسقان 141 ادام ۇستالعان.

اعىمداعى جىلدىڭ 21-ماۋسىمىندا تاجىكستان رەسپۋبليكاسىنىڭ «اكىمشىلىك جاۋاپكەرشىلىك تۋرالى كودەكسىنىڭ» 482-بابىنا ەنگىزىلگەن وزگەرتۋلەرگە سايكەس، كورىپكەلدىك جانە باقسىلىقپەن اينالىسقانى ءۇشىن ەڭ تومەنگى ايلىق جالاقىنىڭ 80-نەن 100-گە دەيىنگى مولشەرىندە ايىپپۇل سالۋ نەمەسە 10-نان 15 تاۋلىككە دەيىنگى مەرزىمگە اكىمشىلىك قاماققا الۋ جازاسى تاعايىندالادى.

اۆتور

جانات قاپالبايەۆا