تاجىكستان مەن قىتاي «ماڭگىلىك دوستىق» تۋرالى كەلىسىمگە قول قويدى
استانا. KAZINFORM - تاجىكستان مەن قىتاي باسشىلارى ماڭگىلىك دوستىق، تاتۋ كورشىلىك جانە ىنتىماقتاستىق تۋرالى كەلىسىمگە قول قويدى.
بۇل تۋرالى Kazinform اگەنتتىگىنىڭ دۋشانبەدەگى مەنشىكتى ءتىلشىسى حابارلادى.
تاجىكستان پرەزيدەنتىنىڭ باسپا ءسوز قىزمەتى مالىمەتىنشە، جوعارى دەڭگەيدەگى كەزدەسۋلەر مەن كەلىسسوزدەر قورىتىندىسىندا ەكى ەل اراسىندا 31 جاڭا ىنتىماقتاستىق قۇجاتى راسىمدەلگەن.
- ەكى مەملەكەت باسشىسى - قۇرمەتتى ەمومالي راحمون مەن قۇرمەتتى شي جينپيڭ جاڭا داۋىردەگى جان-جاقتى ىنتىماقتاستىق پەن ستراتەگيالىق سەرىكتەستىكتى تەرەڭدەتۋ تۋرالى تاجىكستان رەسپۋبليكاسى مەن قىتاي حالىق رەسپۋبليكاسىنىڭ بىرلەسكەن مالىمدەمەسىنە، سونداي-اق ەكى ەل اراسىنداعى ماڭگىلىك دوستىق، تاتۋ كورشىلىك جانە ىنتىماقتاستىق تۋرالى كەلىسىمگە قول قويدى. بۇل قۇجاتتىڭ باستى ۇرانى - «ماڭگىلىك دوس، ەشقاشان جاۋ ەمەس»، - دەپ حابارلادى تاجىكستان پرەزيدەنتىنىڭ باسپا ءسوز قىزمەتى.
قۇجات دۋشانبە مەن بەيجىڭ اراسىنداعى قارىم-قاتىناستى جاڭا دەڭگەيگە كوتەرۋدى كوزدەيدى.
كەلىسىم ىنتىماقتاستىقتىڭ كەڭ اۋقىمىن قامتيدى.
اتاپ ايتقاندا، ساياسي كونسۋلتاتسيالار، ساۋدا-ەكونوميكالىق بايلانىستار، مادەني الماسۋ جانە قاۋىپسىزدىك ماسەلەلەرى قۇجاتقا ەنگىزىلگەن.
وسىعان دەيىن تاجىكستان مەن قىتاي 8 ميلليارد دوللاردان استام سوماعا كەلىسىمشارتتارعا قول قويعانى تۋرالى جازدىق.
