تاعى ءبىر اقاۋلى ۇشاق اقتاۋ اۋەجايىنا قوندى

استانا. KAZINFORM - الماتى - انتاليا باعىتىنداعى Airbus A321 ۇشاعى اقاۋىنا بايلانىستى اقتاۋ اۋەجايىنا قوندى. وقيعانىڭ ءمان-جايىن Air Astana اۋە كومپانياسى حابارلادى.

- 8- قاڭتاردا الماتى - انتاليا باعىتى بويىنشا КС915 رەيسىن ورىندايتىن Airbus A321 ۇشاعى اۋەجايدان جەرگىلىكتى ۋاقىت بويىنشا 08:35-تە ۇشىپ كەتتى. تەحنيكالىق سەبەپپەن ۇشاق اقتاۋ اۋەجايىنا شتاتتىق رەجيمدە قوندى. بۇعان ورتالىق باكتىڭ وتىن جۇيەسىنىڭ ساقتاندىرعىش كلاپانىنىڭ اقاۋى سەبەپ بولدى، - دەپ جازىلعان رەسمي حابارلامادا.

رەيس الماتىدان قوسالقى بولىكتى جەتكىزۋ قاجەتتىلىگىنە بايلانىستى 9- قاڭتاردا ساعات 09:20-عا اۋىستىرىلدى.

جولاۋشىلارعا تاماق بەرىلىپ، قوناق ۇيگە ورنالاستىرىلدى. وسىنداي شارالار انتالياداعى جولاۋشىلارعا قاتىستى دا قولدانىلىپ جاتىر.

ەسكە سالا كەتسەك، 25- جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىراعان ەدى.

ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى.

ايجان سەرىكجان قىزى
اۆتور