ەت قىمباتتاي ما - ا ش م جاۋابى

استانا. KAZINFORM - اۋىل شارۋاشىلىعى مينيسترلىگى اگرارلىق ازىق-تۇلىك نارىقتارى جانە اۋىل شارۋاشىلىعى ءونىمىن قايتا وڭدەۋ دەپارتامەنتىنىڭ ديرەكتورى نازگۇل حاتەپوۆا ەت باعاسى وسپەيتىنىن ايتتى.

«قازىر ەت باعاسىنىڭ ءوسۋ فاكتىلەرى جوق. جىلدىڭ باسىنان باستاپ ەلىمىزدە ەتتىڭ باعاسى تۇراقتى. جالپى ازىق- تۇلىك تاۋارلارىنا بايلانىستى ينفلياتسيا دەڭگەيى جوق. قازىر كەرىسىنشە «-0,1 پايىز» بايقالۋدا»، - دەدى ول.

مينيسترلىك وكىلى ەتتىڭ قىمباتتاماۋىنا ەكسپورتقا قويعان شەكتەۋ سەبەپكەر بولدى دەپ ەسەپتەيتىنىن ايتادى.

«ەتتى قايتا وڭدەۋ كاسىپورىندارىنا شيكىزات قولجەتىمدىلىگىن قامتاماسىز ەتۋ ءۇشىن ءىرى قارانىڭ ەكسپورتىنا شەكتەۋ قويدىق. ول دەگەنىمىز شيكىزاتتىڭ ەكسپورتقا شيكىزات رەتىندە كەتۋىن ەمەس، ىشتەگى قولدانىستاعى جۇكتەمەلەردى كوتەرۋ ارقىلى ولاردى ىشتە قايتا وڭدەپ، ودان كەيىن دايىن ءونىم تۇرىندە ەكسپورتقا شىعارۋ بويىنشا جۇمىستار جۇرگىزىلىپ جاتىر. 2021 -جىلدان باستاپ بۇل شارا جۇزەگە اسىرىلۋدا. قازىرگى كەزدە ءبىز ىشكى نارىقتاعى جۇكتەمەنىڭ ۇلعايعانىن بايقاپ وتىرمىز»، - دەدى نازگۇل حاتەپوۆا.

بۇعان دەيىن 26-قازاننان باستاپ قازاقستان اۋماعىنان ءۇشىنشى ەلدەرگە جانە ەۋرازيالىق ەكونوميكالىق وداق ەلدەرىنە وگىزشەلەر مەن توقتىلاردى ەكسپورتتاۋ كۆوتاسىن ءبولۋ قاعيدالارى كۇشىنە ەنەتىنىن جازعان ەدىك.

اۆتور

ەسىمجان ناقتىباي