سيريامەن ساۋدا-ساتتىققا قاۋىپ ءتونىپ تۇر: تۇرىكتىڭ مال ەتى ونىمدەرىنىڭ ەكسپورتى توقتاتىلدى
استانا. KAZINFORM - سيريادا يمپورت تاۋارلارعا سالىناتىن باج سالىعىنىڭ %500- عا دەيىن كۇرت كوتەرىلۋى تۇركيا ەكسپورتىنىڭ توقتاتىلۋىنا اكەلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

جەرورتا تەڭىزى ايماعى بالىق جانە مال شارۋاشىلىعى ەكسپورتتاۋشىلار وداعى (ASHİB) ءتوراعاسىنىڭ ورىنباسارى ءالي دجان يامانيىلماز اتاپ وتكەندەي، بۇرىن تۇرىك مال ونىمدەرى ەكسپورتىنىڭ 11- ەڭ ۇلكەن نارىعى بولعان سيريا تۇركيامەن ساۋدا قارىم-قاتىناسىندا ۇلكەن داعدارىسقا ۇشىرادى.
- باج سالىعىن ارتتىرۋ ەكسپورتتىق شىعىندارىمىزدى كۇرت ءوسىرىپ، سۇرانىستى ازايتىپ، نارىقتىڭ جوعالۋىنا اكەلىپ وتىر، - دەپ اتاپ ءوتتى يامانيىلماز.
ول بۇل ماسەلە اسىرەسە جەرورتا تەڭىزى ايماعىنان ەكسپورتتاۋشىلارعا قاتتى اسەر ەتەتىنىن قوسىپ ءوتتى. وداق ءتوراعاسىنىڭ ايتۋىنشا، 2024 -جىلى تۇركيانىڭ سيرياعا ەكسپورت كولەمى قۇنى 96,8 ميلليون دوللارعا 60 مىڭ توننا ءونىمدى قۇراعان. الايدا 11-قاڭتاردان باستاپ باج سالىعى كۇرت كوتەرىلىپ، شەكارادا تاۋار جينالىپ، توڭازىتۋ جاعدايلارى بولماعاندىقتان تەز بۇزىلاتىن ونىمدەردىڭ بۇزىلۋ قاۋپىنە اكەلدى.
جوعارى باج سالىعى سونداي اق ەندى يمپورتتىق ونىمدەردىڭ باعاسىن انىقتاي الماي وتىرعان سيريالىق كاسىپكەرلەرگە دە كەرى اسەرىن تيگىزدى.
- قالىپتاسقان جاعداي سيريامەن ساۋدا-ساتتىقتى ءىس جۇزىندە مۇمكىن ەمەس ەتىپ وتىر. بۇل بيزنەس ءۇشىن دە، تۇتىنۋشىلار ءۇشىن دە قاۋىپ تۋدىرىپ، زاڭسىز ساۋدا ۇلەسىن ارتتىرادى. بۇدان باسقا، ساۋدا سورەلەرىندەگى باعانىڭ ءوسۋى ساتىپ الۋ قابىلەتىنىڭ تومەندەۋىنە جانە ونسىز دا اشتىق شەگىندە تۇرعان سيريا حالقىنىڭ ازىق-تۇلىك قاۋىپسىزدىگىنىڭ ناشارلاۋىنا اكەلەدى، - دەدى ول.
ەكسپورتتاۋشىلار تاريفتەردىڭ كوتەرىلۋى تۋرالى شەشىم قايتا قارالىپ، ديپلوماتيالىق كۇش-جىگەر تۇراقتى ساۋدا قاتىناستارىن قالپىنا كەلتىرەدى دەپ ۇمىتتەنىپ وتىر.
بۇعان دەيىن سيريا تۇرىك تاۋارلارىنا كەدەندىك باج سالىعىن كۇرت ارتتىرعانىن جازعان بولاتىنبىز.
اۆتور
زارينا تۋعانبايەۆا