سيريا تۇركيادان شەكاراسىن قورعاۋعا كومەكتەسۋدى سۇرادى
استانا. قازاقپارات - سيريادا بيلىككە كەلگەن وپپوزيتسيالىق ۇكىمەت تۇركيادان ەل شەكاراسىن قورعاۋدا كومەك بەرۋىن سۇرادى، دەپ حابارلايدى 24kz.
احمەت اش-شارا اكىمشىلىگى، سونداي-اق، گولان جوتالارى ءۇشىن الاڭداۋشىلىعىن ءبىلدىردى. قازىر جاڭا ۇكىمەت كۇشتىك قۇرىلىمداردى رەفورمالاۋعا كىرىسكەن. اسكەري جانە قاۋىپسىزدىك دوكتريناسىن تولىعىمەن جاڭارتپاقشى. شەكارا قاۋىپسىزدىگى مەن ارميانى قايتا قۇرىلىمداۋدا الدىنا ءبىرقاتار ماقسات قويىپ وتىر. يزرايلمەن شەكارانى باقىلاۋ ءۇشىن وزىق قاۋىپسىزدىك جۇيەسىن ورناتۋدى قالايدى.
ەمراح كايا، حالىقارالىق قاتىناستار ساراپشىسى:
- سيريا تۇركيادان شەكارالارىن قورعاۋ جانە گولان جوتاسىن ساقتاۋ ءۇشىن كومەك سۇرادى. تۇركيا العاشقى كۇندەردەن باستاپ سيريانىڭ اۋماقتىق تۇتاستىعىن قولداپ، قاۋىپسىزدىك ماسەلەسىندە نەگىزگى ويىنشىعا اينالدى. سيرياداعى وپپوزيتسيانىڭ جالعىز قولداۋشىسى - تۇركيا. سونداي-اق تۇركيا ايماقتا ءوز قاۋىپسىزدىگىن قامتاماسىز ەتۋ ءۇشىن تاۋەلسىز كۇش رەتىندە ارەكەت ەتەدى. وسى سەبەپتى سيريا تۇركيادان ءتۇرلى كومەك سۇراۋى - قالىپتى جاعداي. سونداي-اق رەجيم قۇلاعاننان كەيىن يزرايلدىڭ سيرياداعى اسكەري ايماقتاردى اتقىلاعانىن بىلەمىز. يزرايلدىڭ ارەكەتى سيريانىڭ قاۋىپسىزدىگىن السىرەتەدى. ونى قايتادان قالپىنا كەلتىرۋ ءۇشىن شامعا تۇركيا سياقتى سەنىمدى ەلدەردىڭ قولداۋى قاجەت.
