سيفرلىق سالادا بيۋروكراتياعا جول بەرۋگە بولمايدى - پرەمەر- مينيستر

- مەملەكەت باسشىسى جاساندى ينتەللەكتىنىڭ ىقپالىمەن ەكونوميكانىڭ بارلىق سالاسىندا جانە جالپى ادام ومىرىندە تۇبەگەيلى وزگەرىستەر بولىپ جاتقانىن اتاپ ءوتتى. سوندىقتان جاڭا تەحنولوگيالار مەن سەرۆيستەر وزىق قارقىنمەن دامۋعا ءتيىس. «Digital Qazaqstan» ستراتەگياسىن ءبىز ايتارلىقتاي سيفرلىق بازامەن ىسكە اسىرۋعا كىرىستىك. ەل اۋماعىن ينتەرنەتپەن قامتۋ دەڭگەيى جوعارى بولدى، ەلەكتروندىق قىزمەتتەر مەن سەرۆيستەر كەڭىنەن قولدانىلىپ جاتىر. وسىنىڭ بارلىعى ەندى جەكەلەگەن پروتسەستەردى سيفرلاندىرۋ كەزەڭىنەن مەملەكەتتى دامىتۋدىڭ جاپپاي سيفرلىق مودەلىنىڭ ءبىرىڭعاي جۇيەسىنە كوشۋگە مۇمكىندىك بەرەدى. قازىرگى تاڭدا مەملەكەتتىك قىزمەتتەردى كورسەتۋ فورماتى ەداۋىر جەڭىلدەتىلدى. كوپتەگەن سەرۆيستەردى «ءبىر عانا باتىرمانى باسۋ» ارقىلى الۋعا بولادى. حالىققا قىزمەت كورسەتۋ ورتالىقتارى دا جاڭا فورماتقا كوشىپ جاتىر. جاساندى ينتەللەكت مينيسترلىگى جۇرگىزىلىپ جاتقان جۇمىس قارقىنىن ارتتىرا ءتۇسۋى كەرەك،-دەدى و. بەكتەنوۆ.

ونىڭ ايتۋىنشا، مەملەكەتتىك قىزمەتتەردىڭ ەكوجۇيەسى ودان ءارى پرواكتيۆتى تۇردە دامۋى كەرەك، ياعني، ازاماتتارعا قىرۋار ءوتىنىش جىبەرۋدىڭ قاجەتى بولمايتىنداي جاعداي جاسالۋعا ءتيىس.

- سيفرلىق سالادا دا باسى ارتىق بيۋروكراتياعا جول بەرۋگە بولمايدى. ول ءۇشىن، ەڭ الدىمەن، ءتۇرلى سالالارداعى ءبىرقاتار ماسەلەنى شەشۋ قاجەت. ەنەرگەتيكا سالاسىندا ەنەرگيا جۇيەسىن سيفرلاندىرۋ دەڭگەيى ءالى دە جەتكىلىكسىز. ونى تولاسسىز تەلەمەتريانىڭ، ينتەگراتسيالانعان دەرەكتەر مەن تالداۋ قۇرالداردىڭ جوقتىعىنان بايقاۋعا بولادى. جاڭا جوبالار وسى ماسەلەنى شەشۋگە باعىتتالعان. ەنەرگيا جۇيەسى بولجامدى سيفرلىق الگوريتمدەر نەگىزىندە باسقارۋ قاعيداتىنا كوشۋگە ءتيىس. بۇل ءارتۇرلى جاعدايلارعا قارسى شۇعىل ارەكەت ەتۋگە، اپاتتاردىڭ الدىن الۋعا جانە ەنەرگيا نىساندارى جۇمىسىنىڭ سەنىمدىلىگىن ارتتىرۋعا مۇمكىندىك بەرەدى. وسىعان بايلانىستى ەنەرگەتيكا مينيسترلىگى دەرەكتەردى Energy Command Center- گە شىعارىپ، سالانىڭ نەگىزگى نىساندارى مەن اقپاراتتىق جۇيەلەرىن ءبىرىڭعاي تسيفرلىق كونتۋرعا بىرىكتىرۋى قاجەت،-دەدى ۇكىمەت باسشىسى.

پرەمەر-ءمينيستردىڭ سوزىنە قاراعاندا، وسى جىلدىڭ سوڭىنا دەيىن نەگىزگى نىساندارعا سيفرلىق تۇگەندەۋ جۇرگىزىپ، سالالىق دەرەكتەردىڭ قۇرامىنا، ساپاسى مەن بەرىلۋىنە قويىلاتىن ءبىرىڭعاي تالاپتاردى بەكىتۋ كەرەك. مۇناي-گاز سالاسىندا سارقىلىپ بىتۋگە تاياعان كەن ورىندارى مەن الىنۋى قيىن قورلاردى يگەرۋ جاعدايىندا رەنتابەلدىلىك پەن تەحنولوگيالىق تيىمدىلىكتى ساقتاۋ ماسەلەسى وتكىر تۇر.

- جاساندى ينتەللەكت جانە كەن ورىندارىنىڭ سيفرلىق تەلنۇسقالارى تەحنولوگيالارىن قولدانۋ ءىس جۇزىندە تيىمدىلىگىن كورسەتىپ وتىر. سوندىقتان ولار وندىرىستىك پروتسەستەردى باسقارۋدىڭ نەگىزگى ستاندارتىنا اينالۋعا ءتيىس. ەنەرگەتيكا مينيسترلىگىنە «سامۇرىق-قازىنا» قورىمەن جانە «قازمۇنايگاز» كومپانياسىمەن بىرلەسىپ، وسى شەشىمدەردىڭ بارلىق وندىرىستىك اكتيۆتەردە كەڭىنەن قولدانىلۋىن قامتاماسىز ەتۋدى تاپسىرامىن. 2028-جىلدىڭ سوڭىنا دەيىن 12 نەگىزگى كەن ورنىندا سيفرلىق تەلنۇسقالاردى تولىق ىسكە قوسۋ قاجەت،- دەدى و. بەكتەنوۆ.

بۇعان دەيىن حابارلانعانداي، قالالىق سەرۆيستەردى باسقارۋ بويىنشا استانا تاجىريبەسى ەل وڭىرلەرىندە ەنگىزىلەدى.